ޑިމޮކްރަޓިކް ރިޕަބްލިކް އޮފް ކޮންގޯގައި 25 ސިފައިންގެ މީހަކު މެރުމަށް ހުކުމް ކޮށްފި އެވެ.
ކޮންގޯގެ ކޯޓަކުން ހުކުމްކުރީ އެއް ދުވަހުން ބޭއްވި ޝަރީއަތުގައި ގިނަ ދައުވާތައް ވަނީ އެ ސިފައިންގެ މައްޗަށް ވަނީ ސާބިތުވެފަ އެވެ. އޭގެ ތެރޭގައި ކުށްވެރިން ސަލާމަތްކޮށްދިނުން ހިމެނެ އެވެ.
މަރަން ހުކުމްކުރި 25 ސިފައިންގެ ތެރޭގައި ދެ ކެޕްޓަނުން ވެސް ހިމެނެ އެވެ.
ކޮންގޯގައި މަރުގެ ހުކުމް ތަންފީޒުކުރުން 2003 ގައި ހުއްޓާލި ނަމަވެސް، މިދިޔަ މާޗުގައި ވަނީ އަލުން މަރުގެ ހުކުމް ތަންފީޒު ކުރުމަށް ނިންމާފަ އެވެ.
އެ ގައުމުގައި މިދިޔަ މެއި މަހު ވެސް ވަނީ އަށް ސިފައިންނަށް މަރުގެ ހުކުމް އިއްވާފަ އެވެ. އޭގެ ތެރޭގައި ފަސް އޮފިސަރުން ހިމެނެ އެވެ.
ކޮންގޯގެ ރައްޔިތުންނާއި އެ ގައުމުގައި އުޅޭ ބޭރުގެ ގްރޫޕްތަކާއި ދެމެދު ހަމަނުޖެހުންތައް ހިންގަމުންދާތާ އަހަރުތަކެއް ވެފައިވާއިރު، އެކަން ހުއްޓުވޭނެ މަގެއް މިހާތަނަށް ފެނިފައެއް ނުވެ އެވެ.
