ބްރިޖްޓައުން، ބާބަޑޯސް (ޖޫން 30) - ހަތް ލަނޑުން ދެކުނު އެފްރިކާ ބަލިކޮށް، އިންޑިއާ އިން 17 އަހަރަށް ފަހު ޓީ20 ވޯލްޑް ކަޕްގެ ޗެމްޕިއަންކަން ހޯދި މެޗަށް ފަހު، އިންޑިއާގެ ލެޖެންޑަރީ ދެ ތަރި، ވިރާތު ކޯލީ އާއި ރޯހިތު އިންޑިއާގެ ޓީ20 ގައުމީ ޓީމުން ރިޓަޔާކުރިކަން އިއުލާނުކޮށްފި އެވެ.
ވިރާތު، 35، ވަނީ ރޭގެ ފައިނަލުގެ މޮޅު ކުޅުންތެރިޔާގެ މަގާމު ހޯދައިފަ އެވެ. ވިރާތު ވަނީ ރޭގެ މެޗުގައި، 59 ބޯޅައިން 76 ލަނޑު ހަދައިފަ އެވެ. މިއީ، މި ފަހަރުގެ ޓީ20 ވޯލްޑް ކަޕްގައި އޭނާގެ ކުޅުން އެންމެ ރަނގަޅު މެޗެވެ.
ރޯހިތު، 37، ރިޓަޔާކުރިކަން އިއުލާނުކުރީ، ފައިނަލް މެޗަށް ފަހު ބޭއްވި އުފާފާޅުކުރުންތަކަށް ފަހު އެވެ.
އިންޑިއާ އިން އައިސީސީ ވޯލްޑް ކަޕެއްގެ ތަށީގައި މި އަތްލީ 13 އަހަރަށް ފަހު އެވެ.
މެޗަށް ފަހު މޮޅު ކުޅުންތެރިޔާގެ ޓްރޮފީއާ ހަވާލުވުމަށް ފަހު، ދިން އިންޓަވިއުގައި ވިރާތު ވަނީ ޓީ20 ގައުމީ ޓީމުން ރިޓަޔާކުރިކަން އިއުލާނުކޮށްފަ އެވެ.
ވިރާތު ބުނީ މިއީ ވަރަށް ކުރިން ވެސް އޭނާ ނިންމާފައި އޮތް ނިންމުމެއް ކަމަށާއި މިއީ އެކަން ކުރަން އެންމެ ރަނގަޅު ވަގުތު ކަމަށެވެ.
"މިއީ އިންޑިއާގެ ގައުމީ ޓީ20 ޓީމަށް އާ ޖީލެއް އަންނަންވީ ވަގުތު. ވަރަށް ހުނަރުވެރި މޮޅެތި ކުޅުންތެރިން އެބައާދޭ. މިއީ އެ މީހުންނަށް ފުރުސަތު ދޭންވީ ވަގުތު. ދެން އެ މީހުންގެ ޒިންމާއެއް މި ޓީމު އިތުރަށް ކުރިއަށް ގެންދިއުމަކީ، މިހާރު ވޯލްޑް ކަޕެއް މި ވަނީ ހޯދައިފައި އަނެއްކާ ވެސް،" ވިރާތު ބުންޏެވެ.
މި ފަަހަރުގެ ޓީ20 ވޯލްޑް ކަޕްގައި އެންމެ ރަނގަޅު ކުޅުން ނުދެއްކޭ ކަމަށާއި އެކަމަކު، ފައިނަލް މެޗުގައި ޔަގީންކަމާ އެކު ކުޅެ، ޓީމަށް މި ކާމިޔާބީ ހޯދަން އެހީތެރިވެދެވުނީތީވެ، އުފާކުރާ ކަަމަށް ވިރާތު ވަނީ ބުނެފަ އެެވެ.
ވިރާތު ވަނީ 2014 ވަނަ އަހަރު އިންޑިއާ އިން ޓީ20 ވޯލްޑް ކަޕް ފައިނަލުގައި ސްރީ ލަންކާ އަތުން ބަލިވި މެޗުގައި ކުޅެފަ އެވެ. ވިރާތަށް ޓީ20 ވޯލްޑް ކަޕްގެ ޗެމްޕިއަންކަން މި ލިބުނީ ހަ ވަނަ މުބާރާތުގަ އެވެ.
އިންޑިއާގެ ޓީ20 ޓީމުން ރިޓަޔާކުރަން ނިންމިއިރު، ވިރާތު މި ވަނީ ޓީ20 ވޯލްޑް ކަޕާ އެކު، އައިސީސީގެ ތިން މުބާރާތް ކާމިޔާބުކޮށްފަ އެވެ. އެ ގޮތުން، ވިރާތު ވަނީ މީގެ ކުރިން، 2011 ވަަނަ އަހަރު އައިސީސީ ކްރިކެޓް ވޯލްޑް ކަޕާއި 2013 ވަނަ އަހަރު އައިސީސީ ޗެމްޕިއަންސް ޓްރޮފީ ކާމިޔާބުކޮށްފަ އެވެ.
ރޯހިތު އަކީ 2007 ވަނަ އަހަރު އިންޑިއާ އިން އެންމެ ފުރަތަމަ ޓީ20 ވޯލްޑް ކަޕް ކާމިޔާބުކުރިއިރު، ވެސް އެ ޓީމުގެ މެމްބަރެކެވެ. އެކަމަކު، މި ފަހަރުގެ ކާމިޔާބީ ހާއްސަވަނީ ކެޕްޓަންކަމުގައި ހޯދުމުންނެވެ. ރޯހިތު، އޭނާގެ ކެރިއަރުގައި، ކެޕްޓަންކަން ކުރި ޓީ20 މުބާރާތްތަކުގެ ހުރިހާ ފައިނަލަކުން މޮޅުވި އެވެ. އަށް ފައިނަލުގައި މި ގޮތަށް ކާމިޔާބު ހޯދި އެވެ.
ރިޓަޔާކުރަން އިއުލާނުކުރުމަށް ފަހު، ރޯހިތު ބުނީ، ވަންޑޭއިންޓަނޭޝަަނަލް (އޯޑީއައި) އާއި ޓެސްޓް ކްރިކެޓް ގައުމީ ޓީމަށް ކުޅޭނެ ކަމަށެވެ.
