މާފުށީ ޖަލުގައި އިއްޔެ މަރުވި ށ. ފުނަދޫ ޒަމާނީ ވިލާ މުހައްމަދު ޖަމީލް 45, ގެ ހަށިގަނޑު އާއިލާގެ ރުހުމާއި ދެކޮޅަށް، "އިތުރަށް ބަލަން ޖެހޭ ކަންކަން ބެލުމަށް" ކަމަށް ބުނެ ހަށިގަނޑު ގެންދަން ފުލުހުން މަސައްކަތް ކުރުމަށްފަހު، ވަޅުލުމަށް ދާދި ދެންމެ ހުއްދަ ދީފި އެވެ.
ހުޅުމާލެ ސަހަރާ ހިމެނޭ ސަރަހައްދުގައި އެސްއޯ ފުލުހުން ހަރަކާތްތެރި ވަމުން އަންނައިރު، އާއިލާއިން ފުލުހުންނާ ހަށިގަނޑު ހަވާލުކުރަން ދެކޮޅު ހެދުމާ ގުޅިގެން ފުލުހުން ވަނީ ވަޅުލާން ފަހުން ފުރުސަތު ދީފަ އެވެ. އެ ފުރުސަތު ދިނީ ހޯމް މިނިސްޓަރު އަލީ އިހުސާން ސަހަރާއަށް ވަޑައިގަތުމަށް ފަހު އެވެ.
ފުލުހުން އަންގާފައިވާތީ މައްޔިތާގެ ޖަނާޒާގެ ކަންކަން ކުރިއަށް ނުގެންދެވޭނެ ކަމަށް މާލެ ސިޓީ ކައުންސިލުން ފުރަތަމަ ބުނި އެވެ. ނަމަވެސް ފަހުން ފުލުހުންގެ ހުއްދައާއެކު މިހާރު ޖަނާޒާގެ ކަންކަން އަންނަނީ ކުރަމުންނެވެ.
ޖަމީލުގެ ހަށިގަނޑު އާއިލާއާ ހަވާލުކޮށް، ހުޅުމާލޭ ސަހަރާގައި މިހާރު އޮތް އިރު އޭނާގެ މޫނުމަތީގައި ނޫފައިގެންފައިވާ ދެ ނަތަކާއި ކޮންމެވެސް ވަރަކަށް މަށައިގެން ގޮސްފައިވާ ތަނެއް ހުރުމުން، އޭނާ މަރުވީ އަނިޔާގެ ސަބަބުން ކަމަށް ބައެއް މީހުން ދަނީ ތުހުމަތުކުރަމުންނެވެ.
ހޯމް މިނިސްޓަރު ހުޅުމާލެ ސަހަރާގައި -- ފޮޓޯ: އަދަދު
ނަމަވެސް ޖަމީލްގެ އާއިލާއިން މަސައްކަތް ކުރަމުން ދިޔައީ އޭނާގެ ހަށިގަނޑު ވީހާވެސް އަވަހަށް ވަޅުލުމަށެވެ. އެގޮތުން ރޭ 12:00 ޖެހިއިރު ވަޅުލާން ފުރަތަމަ ނިންމުމަށްފަހު، ފަހުން ފަތިސް ނަމާދަށްފަހު ވަޅުލާން ނިންމި އެވެ.
ސޯޝަލް މީޑިއާގައި އެތައް ބަޔަކު އެ ތުހުމަތުތައް ކުރަމުން ދަނިކޮށް އެކްސްގައި ކުރެއްވި ޕޯސްޓެއްގައި ރޭ އިހުސާން ވިދާޅުވީ އެ މައްސަލައިގެ ފުރިހަމަ ތަހުގީގެއް ކުރަން ފުލުހުންނަށް އަންގަވާފައިވާނެ ކަަމަށެވެ.
އާއިލާގެ ރުހުން އޮތް ނަމަ ޖަމީލުގެ ޕޯސްޓްމޯޓަމް ހަދަން ވެސް ފުލުހުންނަށް އަންގަވާފައިވާނެ ކަމަށް އިހުސާން ވިދާޅުވި އެވެ.
ޖަމީލުގެ މަރާ ގުޅިގެން ކަރެކްޝަނަލް ސާވިސް އިން މީޑިއާއަށް ކުރިން ބުނީ ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށެވެ.
އޭނާ ބަންދުކޮށްފައި ހުރީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ޝަރީއަތް ނިމެންދެނެވެ. އޭނާއަކީ ނަފްސާނީ ބައްޔަކަށް ފަރުވާކުރަމުން އައި މީހެއް ވެސްމެ އެވެ.
