ދިވެހިރާއްޖޭގެ ސިއްހީ ނިޒާމު ތަރައްގީ ކުރުމަށާއި އެއާޕޯޓު ޕްރޮޖެކްޓަށް ޖުމުލަ 562.5 މިލިއަން ރިޔާލުގެ ދެ ލޯނު ސަރުކާރުން ނަގައިފި އެވެ.
އެ ދެ ލޯނުގެ ތަފުސީލުތައް ހާމަކުރީ މިއަދު އޮތް މަޖިލީހުގެ މާލިއްޔަތު ކޮމެޓީގެ ބައްދަލުވުމުގަ އެވެ.
އޭގެތެރެއިން ފުރަތަމަ ލޯނަކީ ސައޫދީ ފަންޑު ފޯ ޑިވެލޮޕްމެންޓުގެ އެހީގައި ދިވެހިރާއްޖޭގައި ހިންގުމަށް ހަމަޖެހިފައިވާ ސިއްހީ ދާއިރާ ހަރުދަނާ ކުރުމަށް ނަގާފައިވާ 187.5 މިލިއަން ސައޫދީ ރިޔާލުގެ ލޯނެކެވެ.
އެ ލޯނުގެ އިންޓްރެސްޓު ރޭޓަކީ 2.5 ޕަސެންޓެވެ. އިންޓްރެސްޓު ރޭޓުގެ ގޮތުގައި ހިނގާނެ ކަމަށް ބެލެވެނީ މުޅި ޖުމުލަ 41.8 މިލިއަން ރުފިޔާ އެވެ. ލޯނު ސާވިސް ކުރުމުން ހިނގާނެ ކަމަށް ބެލެވެނީ 232.6 މިލިއަން ރުފިޔާ އެވެ. އަދި ލޯނުގެ ގްރޭސް ޕީރިއަޑަކީ ފަސް އަހަރެވެ.
ލޯނު ނެގި ބޭނުމުގެ ގޮތުގައި ފިނޭންސް މިނިސްޓަރީން ބުނެފައި ވަނީ ސިއްހީ ހިދުމަތް ދޭ ތަންތަނުގައި ރައްޔިތުންގެ ރައްކާތެރިކަމާ އެއްގޮތަށް ހިދުމަތް ދޭކަން ކަށަވަރު ކުރުމަށް އަޅަންޖެހޭ ފިޔަވަޅުތައް އެޅުމާއި ސިއްހީ ހިދުމަތް ދޭ އިމާރާތްތައް އެޅުމެވެ.
އެގޮތުން އެ ލޯނުން ރާއްޖޭގެ ތިން ރަށެއްގައި 50 އެނދުގެ ހޮސްޕިޓަލްތަކެއް އެޅުމަށް ހަމަޖެހިފައިވާ ކަމަށް މާލިއްޔަތު ކޮމެޓީއާ މިއަދު ހިއްސާ ކުރި ކަރުދާހުގައި ބުނެފައިވެ އެވެ.
އެ ލޯނު އަނބުރާ ދައްކަންޖެހޭ އެންމެ ފަހު ތާރީހަކީ 2044 އެވެ.
ސަރުކާރުން ނަގާފައިވާ އަނެއް ލޯނަކީ އެއާޕޯޓު ތަރައްގީ ކުރުމުގެ މަޝްރޫއުއަށް ސައޫދީ ފަންޑުން ނަގާފައިވާ 375 މިލިއަން ރިޔާލުގެ ލޯނެކެވެ.
އެ ލޯނުގެ އިންޓްރެސްޓު ރޭޓާއި އިތުރު ތަފުސީލެއް ކޮމެޓީގައި ހާމަކޮށްފައެއް ނުވެ އެވެ.
ސަރުކާރުން އިތުރު ދެ ލޯނެއް ނަގާފައި މިވަނީ ރާއްޖޭގެ އިގުތިސާދީ ހާލަތު ވަރަށް ބޮޑަށް ގޯސްވެފައިވާ ކަމަށް އަޑުތައް ފެތުރިފައިވާ ދަނޑިވަޅެއްގަ އެވެ. މާލިއްޔަތު ކޮމެޓީގައި މީގެ ކުރިން މަޖިލީހުގެ ނައިބު ރައީސް، އަހުމަދު ނާޒިމް ވެސް ވަނީ ރާއްޖޭގެ އިގުތިސާދީ ހާލަތާ ގުޅޭގޮތުން ކަންބޮޑުވާ ފަދަ ކަންތައްތަކެއް ފާހަގަކޮށްފަ އެވެ.
