އައްޑޫ ސިޓީ ހުޅުމީދޫ މިފްކޯ މަސް ފެކްޓްރީގައި މަސްވެރިން ކުރަމުންދާ އިހުތިޖާޖުގެ ތެރެއިން އެ ފެކްޓްރީން ކަރަންޓު ކަނޑާލާފައިވަނިކޮށް، ފުލުހުން މެދުވެރިވެ އެ ފެކްޓަރީއަށް އަލުން ކަރަންޓު ދީފި އެވެ.
މަސްވެރިން ބާނާ، މިފްކޯއަށް ކިރާފައިވާ މަހަށް ލާރި ނުލިބޭ މައްސަލާގައި ކުރަމުންދާ މި އިހުތިޖާޖުގެ ތެރެއިން އައްޑޫ ފެކްޓަރީއިން ކަރަންޓު ކަނޑާލީ ހޮނިހިރު ދުވަހެވެ. މިކަމާ ގުޅިގެން އެ ފެކްޓްރީގެ މުވައްޒަފުން އެ ރޭ ނިދީ ވެސް ވަނީ ބޭރުގަ އެވެ.
މިކަމާ ގުޅިގެން މިފްކޯއިން މައުލޫމާތު ދިން ގޮތުގައި އޮފީސް އިމާރާތާއި އެކޮމޮޑޭޝަން ބްލޮކަށް ފުލުހުން މެދުވެރިވެގެން ކަރަންޓު ދިނުމަށް އިއްޔެ ހަވީރު މަސައްކަތް ކުރި ކަމަށާއި އެ ކަމުގެ ތެރެއިން "އެއްވެފައިވާ މީހުންގެ އަމަލުތައް ހުރިގޮތުން" ފުލުހުން ބާރުގެ ބޭނުން ކޮށްފައި ވާނެ ކަމަށެވެ.
މި މަސައްކަތުގެ ތެރެއިން ރޭ ކަރަންޓު ދިން ނަމަވެސް، މަސްވެރިންގެ އަމަލުތައް ހުރިގޮތުން ކަރަންޓު އަލުން ކަނޑާލާފައިވާ ކަމަށް ވެސް މިފްކޯއިން ރޭ ބުންޏެވެ.
ފެކްޓަރީއަށް ކަރަންޓު ދީފައިވާއިރު މަސްވެރިންގެ އިހުތިޖާޖު ދަނީ ކުރިއަށެވެ. އެ އިހުތިޖާޖުގެ ތެރެއިން ފެކްޓަރީ އާންމު ހާލަތަށް ގެންދިއުމަށް މުވައްޒަފުން ކުރަމުންދާ މަސައްކަތްތަކާއި, ފުލުހުންގެ ޒިންމާތަކަށް ހުރަސް އަޅާ ދޯނިފަހަރުތަކުން މަސްގަތުން ތިން މަސް ދުވަހަށް ސަސްޕެންޑު ކުރާނެ ކަމުގެ އިންޒާރު މިފްކޯއިން ހޮނިހިރު ދުވަހު ދީފައިވެ އެވެ.
ނަމަވެސް މަސްވެރިން ދަނީ ސަރުކާރުން ދޭ އިންޒާރަކަށް ނުސިހޭނެ ކަމަށާއި އައްޑޫ ފިޝަރީޒް ކޮމްޕްލެކްސްގައި މަސްވެރިން މުޒާހަރާ ކުރަނީ އެ މަސްވެރިންނަށް ދޭން ޖެހޭ ފައިސާ ސަރުކާރުން ނުދޭތީ ކަމަށް ބުނެފަ އެވެ.
