ޔޫރަޕްގެ ސަރަހައްދީ ފުޓްބޯޅަ މުބާރާތް ކަމަށްވާ, ޔޫރޯ ފުޓްބޯޅަ މިހާރު ޖަރުމަންގައި ކުރިއަށްދާއިރު، ފުޓްބޯޅައިގެ ވަރުގަދަ ބާރުތައް މި މުބާރާތުގައި ވާދަކުރެ އެވެ. އަދި ޓީމުތަކުން ދުނިޔޭގެ އެންމެ މަތީ ފަންތީގެ ކުޅުންތެރިންވެސް ފެނިގެން އެބަދެ އެވެ. ޔޫރޯ މުބާރާތުން ކުޅުންތެރިންނާއި ޓީމުތަކަށްވެސް މާލީ ގޮތުން ފައިދާތަކެއްވެ އެވެ.
ކުޅުންތެރިންނަށް ފައިސާ ލިބެނީ ކިހިނެއް؟
ޔޫރޯގައި ވާދަކުރާ ކުޅުންތެރިންނަށް މުބާރާތުގައި ކުޅޭތީ "ފިކްސްޑް" އާމްދަނީއެއް ނުލިބެއެވެ. އަދި ކްލަބުތަކުން ދޭ މުސާރައާ ހިލާފަށް، ގައުމީ ޓީމަށް ކުޅެގެން އެ ކުޅުންތެރިންނަށް މުސާރައެއް ވެސް ނުލިބެ އެވެ. މުބާރާތުގައި ކުޅޭތީ ފެޑަރޭޝަންތަކުން ކޮންމެވެސް ވަރެއްގެ ފައިސާއެއް ދިނަސް، އެއީ އެ ކުޅުންތެރިންނަށް ކްލަބުތަކުގައި ލިބޭގޮތަށް ދޭ "ވީކްލީ މުސާރައެއް" ނޫނެވެ.
ޔޫރޯގައި ކުޅޭ ޓީމުތަކުގެ ކުޅުންތެރިން މުބާރާތުގައި ކުޅުމަށް ފެޑަރޭޝަންސްތަކާ އެކު އެއްބަސްވުމެއް ހަދައެވެ. މި އެއްބަސްވުމުގެ ދަށުން ކުޅުންތެރިންނަށް ފައިސާ ލިބެނީ ދެގޮތަކަށެވެ. އެއް ގޮތަކީ ޓީމުގައި ހޭދަކުރާ ދުވަސްތަކަށް ދޭ ފައިސާ އެވެ. ދެން ކުޅުންތެރިންނަށް ފައިސާ ލިބޭނީ ބޯނަސްގެ ގޮތުގަ އެވެ.
މިސާލަކަށް، މި އަހަރު ޔޫރޯ ޖަރުމަނުން ކާމިޔާބުކޮށްފިނަމަ، ޓީމުގެ ކޮންމެ ކުޅުންތެރިޔަކަށް 400،000 ޔޫރޯ ދިނުމަށް ޖަރުމަންގެ ފެޑަރޭޝަނުން ވަނީ އެއްބަސްވެފަ އެވެ.
ކްލަބްތަކަށް ޔޫރޯ އިން ފައިސާ ލިބޭ
ފުޓްބޯޅަ ކުޅުންތެރިން ކްލަބްތަކުގެ ކޮންޓްރެކްޓުން ޔޫރޯ ފުޓްބޯޅަ މުބާރާތަށް ވީއްލާ މުއްދަތަށް އެ ކްލަބްތަކަށް ވެސް ޔުއެފާ އިން ބަޖެޓެއް ހަމަޖައްސާފައިވެ އެެވެ.
އެ ގޮތުން، އެ ބަޖެޓްގެ ގޮތުގައި ޔުއެފާ އިން މި ފަހަރު ހަމަޖައްސައިފައިވަނީ، 140 މިލިއަން ޔޫރޯ އެވެ. މިއީ، އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގެ އެ ބަޖެޓަށް ވުރެ 10 މިލިއަން ޔޫރޯ އިތުރު އަދަދެކެވެ. މި ފަހަރުގެ ބަޖެޓުން ޔޫރަޕުން ބޭރުގެ ކްލަބްތަކުން ވެސް ފައިސާ ދޭނެ އެވެ. އޭގެ ތެރެއިން އެންމެ ގިނަ ފައިސާ ލިބޭ ކްލަބްތަކަކީ، ސައުދީ ޕްރޯ ލީގުގެ ޓީމުތަކެވެ.
ޔޫރޯގެ ޓީމުތަކަށް ލިބެނީ ކިހާ ފައިސާއެއް؟
ޔޫރޯގައި މޮޅުވާ ޓީމުތަކާއި ނޮކްއައުޓް ބުރަށް ކޮލިފައިވާ ޓީމުތަކަށް މި އަހަރުގެ ޔޫރޯގައިވެސް ދޭނީ ޖުމްލަ 331 މިލިއަން ޔޫރޯ އެވެ. މިއީ 2020 ވަނަ އަހަރުގެ ޔޫރޯގައިވެސް ދިން އަދެވެ. އެޢީ:
* ބައިވެރިވުމަށް: 9.25 މިލިއަން ޔޫރޯ
* މެޗު ބޯނަސް: މޮޅަަކަށް 1 މިލިއަން ޔޫރޯ، ޑްރޯއަކަށް 500،000 ޔޫރޯ
* ގަދަ 16ގެ ބުރަށް ދަތުރުކުރުން: 16.5 މިލިއަން ޔޫރޯ
* ކުއާޓާ ފައިނަލަށް ދަތުރުކުރުން: 2.5 މިލިއަން ޔޫރޯ
* ސެމީ ފައިނަލަށް ދަތުރުކުރުން: 4 މިލިއަން ޔޫރޯ
* ފައިނަަލަށް ދަތުރުކުރުން (ރަނަރަޕް): 5 މިލިއަން ޔޫރޯ
* ޗެމްޕިއަން: 8 މިލިއަން ޔޫރޯ
އެހެންކަމުން، ޔޫރޯގެ ޗެމްޕިއަންކަން ހޯދާ ޓީމަކަށް ޗެމްޕިއަންގެ އިނާމު ފައިސާއާއެކު ޖުމްލަ 28.25 މިލިއަން ޔޫރޯ ލިބޭނެ އެވެ. މިއީ އެހެން ބައްރުތަކުގެ މުބާރާތްތަކުގެ ޗެމްޕިއަނުންނަށް ވުރެ އިތުރު އަދަދެކެވެ. ޔޫރޯއާ އެންމެ ވާދަވެރި، ކޮޕަ އެމެރިކާގެ ޗެމްޕިއަނުންނަށް އެންމެ ގިނަ ވެގެން ވެސް ހޯދެނީ 16 މިލިއަން ޔޫރޯ އެވެ.
