ފްރޭންކްފަޓް (ޖޫން 22) - މިހާރު ޖަރުމަނުގައި ކުރިއަށްދާ ޔޫރޯ ފުޓްބޯޅަ މުބާރާތުގެ ބައެއް މެޗުތައް ކުޅެމުންދާ ފްރޭންކްފާޓް އެރީނާގެ ސްޓޭޑިއަމްގެ ޕިޗުގެ ބައެއް މައްސަލަތައް ފާހަގަވެ އެކަން ހައްލުކުރުމުގެ މަސައްކަތް ޔުއެފާ އިން ފަށައިފި އެވެ.
މި ދަނޑުގައި އެންމެ ފަހުން ކުޅުނު މެޗަކީ ގުރޫޕް ސީގައި އިންގްލެންޑާއި ޑެންމާކް ބުރާސްފަތި ދުވަހުގެ ރޭ ކުޅުނު މެޗެވެ.
ޖަރުމަން ބުންޑަސްލީގާގެ އެއިންޓްރަކްޓް ފްރޭންކްފަޓްގެ ހޯމް ސްޓޭޑިއަމް ކަމަށްވާ ފްރޭންކްފަޓް އެރީނާގައި އިންގްލެންޑާއި ޑެންމާކް ކުޅުނު މެޗުގެ ކުރީކޮޅުގައިވެސް ވިނަ ގަނޑުތައް ނެއްޓެމުން ދިޔަތަން ފެނުނެވެ. އަދި މެޗަށްފަހު ޕިޗުގެ މެއިންޓަނަންސް އިން ވަނީ ގިނަ އަދަދެއްގެ ނެއްޓިފައިވާ ވިނަ ގަނޑުތައް ނަގައިފަ އެވެ.
އިންގްލެންޑާއި ޑެންމާކް ކުޅުނު މެޗުގެ ތެރެއިން ފްރޭންކްފާޓް ޕިޗް.
ޔުއޭފާ އިން ބުނީ ފްރޭންކްފަޓް ދަނޑުގެ ހާލަތު ރަނގަޅުކުރުމުގެ ގޮތުން މެއިންޓަންސްގެ މަސައްކަތްތައް ކުރިއަށް ގެންދާނެ ކަމަށެވެ. އަދި އެ ދަނޑުގައި ދެން ކުޅޭ މެޗުތަކުގެ ކުރިން ޕިޗުގެ މައްސަލަތައް ހައްލުކުރާނެ ކަމަށެވެ.
"ޔުއެފާ އާއި ކޮންސަލްޓަންޓުންގެ ޓީމުން ދަނީ މުބާރާތުގެ ކުރިންވެސް ސްޓޭޑިއަމްގެ ގްރައުންޑް މެއިންޓަނަންސް ޓީމާއެކު ގުޅިގެން މި މައްސަލަ ހައްލުކުރަން މަސައްކަތްކުރަމުން. ކުރީގެ ހާލަތާ އަޅާބަލާއިރު މިހާރުވެސް ވަރަށް ބޮޑުތަނުން ޕިޗުގެ ހާލަތު ވަނީ ރަނގަޅުކުރެވިފައި،" ޔުއޭފާ އިން ނެރުނު ބަޔާނުގައި ބުނެފައިވެެއެވެ.
މި ދަނޑުގައި ކުޅެން އޮތް މެޗަކީ ގުރޫޕް އޭގައި މާދަމާ ރޭ ޖަރުމަނާއި ސްވިޓްޒަލޭންޑް ބައްދަލުކުރާ މެޗެވެ. އަދި ގުރޫޕް އީގައި މި މަހުގެ 26 ވަނަ ދުވަހު ރޫމޭނިއާ އާއި ސްލޮވާކިއާ ބައްދަލުކުރާ މެޗުވެސް ކުޅެނީ މި ދަނޑުގައެވެ.
ފްރޭންކްފަޓް އެރީނާގައި ކުޅޭ ފަހު މެޗަކީ ޖުލައި 1 ވަނަ ދުވަހު ކުޅޭ ގަދަ 16 ގެ މެޗެކެވެ.
