ޔޫރޯ އަކީ ޔޫރަޕްގެ ސަރަހައްދީ ފުޓްބޯޅަ މުބާރާތެވެ. އެކަމަކު، މި މުބާރާތުގައި އެފްރިކާ ހިއްސާއެއް އެބައޮތެވެ. އެފްރިކާ އަށް ނިސްބަތްވާ ގިނަ ކުޅުންތެރިންތަކެއް އެކި ގައުމުތަކަށް ދަނީ ކުޅެމުންނެވެ. އެ ގޮތުން ސީދާ އެފްރިކާ އަށް ނިސްބަތްވާ 58 ކުޅުންތެރިން، މި މުބާރާތުގައި ވާދަކުރާ 24 ޓީމުން ފެނިގެން އެބަދެ އެވެ.
ދާހިލީ ހަމަނުޖެހުން ބޮޑު އަދި ދިރިއުޅުމުގެ ފެންވަރު ދަށްވުމުން އެފްރިކާގެ ބައެއް ގައުމުތަކުން ގިނަ އާއިލާތަކެއް ޔޫރަޕްގެ ގިނަ ޤައުމުތަކަށް ހިޖުރަކުރެ އެވެ. މިފަދަ އާއިލާތަކަށް ނިސްބަތްވާ ކުޅުންތެރިންތައް ގިނަ އެވެ.
މި އަހަރުގެ ޔޫރޯގައި ކުޅޭ އެންމެ ނަން މަޝްހޫރު އަދި މަގުބޫލު އެއް ކުޅުންތެރިޔަކީ ފްރާންސްގެ ކެޕްޓަން ކިލިއަން އެމްބާޕޭ އެވެ. ރެއާލް މެޑްރިޑަށް ބަދަލުވެފައިވާ އެމްބާޕޭ އުފަންވީ ފްރާންސަށެވެ. އެހެން ނަމަވެސް، އޭނާގެ ބައްޕަ ނިސްބަތްވަނީ އަލްޖީރިއާ އަށެވެ. މަންމަ އަކީ ކެމަރޫން މީހެކެވެ. އެކަމަކު، އެމްބާޕޭ ނިންމީ އޭނާގެ އުފަން ގައުމު ކަމަށްވާ ފްރާންސަށް ކުޅުމަށެވެ.
އެމްބާޕޭގެ އިތުރުންވެސް ފްރާންސްގެ ޓީމުގައި އެފްރިކާ ނިސްބަތްވާ ކުޅުންތެރިން ގިނަ އެވެ. އޭގެ ތެރޭގައި އެންގޯލޯ ކާންޓޭ އާއި އެޑުއާޑޯ ކަމަވިންގާ އާއި އިބްރާހިމް ކޮނާޓޭ އަދި އައުރޭލިއަން ޗުއަމޭނީ ހިމެނެ އެވެ. މި ކުޅުންތެރިން ނިސްބަތްވަނީ އެންގޯލާ އާއި މާލީ އަދި ކެމަރޫނަށެވެ.
މި އަހަރުގެ ޔޫރޯގައި ސްޕެއިން ކުޅުނު ފުރަތަމަ މެޗުގައި ސްޕެއިންގެ ފުރަތަމަ 11 ގައި ކުޅެ، ޔޫރޯގެ ތާރީހުގައި ކުޅުނު އެންމެ އުމުރުން ހަގު ކުޅުންތެރިޔާގެ ރެކޯޑް ހޯދި ލަމީން ޔަމާލް ވެސް އެފްރިކާ އަށް ނިސްބަތްވެ އެވެ. ޔަމާލްގެ މަންމަ އަކީ އީކުއެޓޯރިއަލް ގިނީއަށް ނިސްބަތްވާ މީހެކެވެ. ބައްޕަ ނިސްބަތްވަނީ މޮރޮކޯ އަށެވެ.
އިންގްލެންޑް ޓީމުގައި ބުކާޔޯ ސާކާ އާއި ކޯބީ މައިނޫގެ އާއިލާއަކީ ވެސް އެފްރިކާ އަށް ނިސްބަތްވާ ބައެކެވެ. މައިނޫގެ މައިންބަފައިން ނިސްބަތްވަނީ ގާނާ އަށެވެ. ސާކާގެ މައިންބަފައިން ނިސްބަތްވަނީ ނައިޖީރިއާ އަށެވެ. މި ދެ ކުޅުންތެރިންވެސް އުފަންވީ އިންގްލެންޑް އަށެވެ.
"ވަރަށް ފަހުރުވެރިވޭ ނައިޖީރިއާ ދަރިކޮޅަށް ނިސްބަތްވާތީ. މިހާރުވެސް ނައިޖީރިއާގެ މެޗުތައް ބަލަން އަދި ސަޕޯޓްކުރަން،" ސުޕަސްޕޯޓްއާ ކުރިން ވާހަކަދައްކަމުން ސާކާ ބުންޏެވެ.
ޖަރުމަންގެ އުންމީދީ ކުޅުންތެރިޔާ ޖަމާޅް މުސިއާލާގެ ބައްޕަވެސް ނިސްބަތްވަނީ ނައިޖީރިއާއަށެވެ. ޖަމާލް ކުޑައިރު އޭނާގެ އާއިލާ އިންގްލެންޑަށް ދިރިއުޅުން ބަދަލުކުރުމުން، އޭނާ އަށް އިންގްލެންޑަށް ކުޅުމުގެ ފުރުސަތުވެސް އޮތެވެ. ޖަރުމަނާއި އިންގްލެންޑްގެ ޔޫތު ޓީމުތަކަށްވެސް މުސިއާލާ ކުޅުނެވެ.
ޔޫރޯގައި އެންމެ ފާހަގަކޮށްލެވޭ އެއް ފޯވަޑް ރޮމެއޫ ލޫކާކޫގެ މައިންބަފައިން ނިސްބަތްވަނީ ޑިމޮކްރެޓިކް ރިޕަބްލިކް އޮފް ކޮންގޯ އަށެވެ. ލުކާކޫގެ ބައްޕަ ކޮންގޯގެ ގައުމީ ޓީމަށް ކުޅުނެވެ. އެކަމަކު އޭނާގެ ދެ ދަރިންވެސް ކުޅެނީ ބެލްޖިއަމްގެ ގައުމީ ޓީމަށެވެ. ބެލްޖިއަމްގެ ޓީމުގެ ޖެރެމީ ޑޯކޫ އާއި ލޮއިސް އޮޕެންޑާ އާއި ޔޫރީ ޓިއެލްސްމަން އާޢި އަމާޑޫ އޮނާނާ އަދި ޑޯޑީ ލުކެބާކީއޯ ވެސް ނިސްބަތްވަނީ އެފްރިކާއަށެވެ.
