47 އަހަރަށްވުރެ ގިނަ ދުވަހު ދިވެހި ދައުލަތަށް ހިދުމަތް ކުރެއްވި މުހައްމަދު ޒަކީ ނިޔާވެއްޖެ އެވެ.
ޒަކީ ނިޔާވުމުން, އޭނާއަށް ހެޔޮ ރަހްމަތް ލައްވައި ސުވަރުގޭގެ ދާއިމީ ނިއުމަތް މިންވަރު ކުރެއްވުމަށް އެދި ދުއާ ކުރައްވާ, ރައީސް ޑރ. މުހައްމަދު މުއިއްޒު ވަނީ ޕޯސްޓު ކުރައްވާފަ އެވެ.
ރައީސް ވިދާޅުވީ ޒަކީ އަކީ ދިވެހި ދައުލަތަށް 47 އަހަރަށް ވުރެ ގިނަ ދުވަހު ހިދުމަތްކުރައްވައި، އެކަމުގެ އަގު ދައުލަތުން ވަޒަންކުރައްވާ އިނާމު ދެއްވަވާފައިވާ ހިދުމަތްތެރިއެއް ކަމަށެވެ.
ދިވެހި ދައުލަތަށް ހިދުމަތް ކުރުމުގެ އިނާމު ޒަކީއަށް އެރުވީ މިދިޔަ އަހަރު ބޭއްވި ގައުމީ އިނާމު ދިނުމުގެ ހަފްލާގައި ކުރީގެ ރައީސް އިބްރާހިމް މުހައްމަދު ސޯލިހެވެ.
ޒަކީ، ދިވެހި ދައުލަތަށް ހިދުމަތް ކުރައްވަން ފެއްޓެވީ، 1973, މާރިޗު 3ގަ އެވެ. އޭނާ 2020, އޮކްޓޯބަރު 28ގައި ރިޓަޔާ ކުރެއްވީ އުމުރުން 65 އަހަރުވެގެންނެވެ. އޭރު ހުންނެވީ, ޑިޕާޓްމަންޓް އޮފް ޕަބްލިކް އެގްޒޭމިނޭޝަންސްގެ ސީނިއާ ޕްރިންޓިން ސުޕަވައިޒަރެއްގެ މަގާމުގަ އެވެ.
މުޙައްމަދު ޒަކީ ވަޒީފާ އަދާކުރެއްވިއިރު، އެ ޑިޕާޓްމަންޓުން ހިންގާ ބައިނަލްއަގުވާމީ އިމްތިހާނުތައް ކަމަށްވާ ޖީސީއީ އޯ-ލެވެލް އިމްތިހާނާއި, ސެކަންޑަރީ ސްކޫލް ސެޓުފިކެޓު އިމްތިހާނާއި، ހަޔާ ސެކަންޑަރީ ސްކޫލްގެ ސެޓުފިކެޓު އިމްތިހާނުތަކުގެ ސުވާލު ކަރުދާސްތަކުގެ އެންމެހައި މަސައްކަތް އަމާނާތްތެރިކަމާއި ފަރުވާތެރިކަމާއެކު އޭނާ ކުރެއްވި އެވެ.
ޑިޕާޓްމަންޓް އޮފް ޕަބްލިކް އެގްޒޭމިނޭޝަންސުން، އޯ-ލެވެލް އާއި، އޭ-ލެވެލްގެ ސެންޓަރުތަކަށް، އިމްތިހާނުގެ ސުވާލު ކަރުދާސްތައް ގެންދިޔުމަށްޓަކައި ރާއްޖޭގެ ހުރިހާ ރަށްތަކަށް ކުރަންޖެހޭ ދަތުރުތަކުގައި ވެސް ޒަކީ އަމަލީގޮތުން ބައިވެރިވެވަޑައިގެންފައިވެ އެވެ.
ދިގު މުއްދަތެއްގައި މި މަސައްކަތް ކުރެއްވިއިރު، އެއްވެސް އިރެއްގައި މައްސަލައެއް ޖެހިގެން ސުވާލެއް ކުރަން ޖެހިފައި ނުވާކަން އޭނާއަށް އިނާމު އެރުވިއިރު ފާހަގަކޮށްފައިވެ އެވެ. އަދި މިފަދަ ޒިންމާދާރު މަސައްކަތްތަކެއް ކުރައްވަމުން، ލިބިވަޑައިގެންފައިވާ ތަޖުރިބާގެ އަލީގައި ތަނުގެ ސިއްރު ހިފެހެއްޓުމުގައި ޒަކީއަކީ، އެހެން މުވައްޒަފުންނަށް ނަމޫނާ ދެއްކެވި ވަރަށް އިހުލާސްތެރި ތެދުވެރި ބޭފުޅެއްކަން ވެސް ފާހަގަ ކުރެ އެވެ.
