މާލޭގައި ޕާކުކޮށްފައި ހުރި ސައިކަލްތަކެއްގައި އަލިފާން ރޯވެ، ފަސް ސައިކަލެއް ބޭނުން ނުކުރެވޭ މިންވަރަށް އަނދައިފި އެވެ. މިއީ ދެ ހަފުތާތެރޭގައި ހިނގި މި ފަދަ ދެ ވަނަ ހާދިސާ އެވެ.
މިފަހަރު އަލިފާން ރޯވެފައި ވަނީ ހެންވޭރު މެހެލިގޯޅީގައި (ހެންވޭރުގައި ހުންނަ ފިއުލް ސަޕްލައިގެ ޝެޑު ކުރިމަތީގައި އޮންނަ ގޯޅި) ޕާކުކޮށްފައި ހުރި ސައިކަލްތަކެއްގަ އެވެ.
އެމްއެންޑީއެފުން ބުނީ މި ހާދިސާގެ ރިޕޯޓް މިރޭ 12:37 ހާއިރު ލިބުމާއެކު ފަޔާ އެންޑް ރެސްކިޔު ސާވިސްއިން އެ ސަރަހަށްދަށް ގޮސް ކުޑަ ވަގުތުކޮޅެއްގެ ތެރޭގައި އަލިފާން ނިއްވާލާފައިވާ ކަމަށެވެ.
ރޯވި ސައިކަލްތައް ފުލުހުން ގެންދަނީ.. -- ފޮޓޯ: ލީވާން/ އަދަދު
"މި ހާދިސާގައި ފަސް ސައިކަލެއް ބޭނުން ނުކުރެވޭ ވަރަށް ވަނީ އަނދާފަ. އެއްވެސް މީހަކަށް މި ހާދިސާގައި އަނިޔާ ލިބިފައި ނުވޭ،" އެމްއެންޑީއެފުން ބުނެ އެވެ.
މި މައްސަލަ ތަހުގީގު ކުރަން ފަށާފައިވާ ކަމަށް ފުހުން ވަނީ ބުނެފަ އެވެ.
މިރޭގެ އަލިފާނުގެ ހާދިސާގައި އެނދި ސައިކަލްތައް ފުލުހުން ވަނީ ގެންގޮސްފަ އެވެ.
މި ޖޫން މަހު ދެ ވަނަ ދުވަހުގެ ރޭ މެންދަމު، ރައްޔިތުންގެ މަޖިލިސް ކުރިމަތީގައި އޮންނަ ޕާކިން ޒޯނުގައި ހުރި ސައިކަލުތަކެއްގައި ރޯކޮށްލި އެވެ.
އެ ހާދިސާގައި ތިން ސައިކަލެއް ބޭނުން ނުކުރެވޭ މިންވަރަށް ހަލާކުވި އެވެ. އެ މައްސަލައިގެ ތުހުމަތުގައި މީހަކު ވަނީ ހައްޔަރުކޮށްފަ އެވެ.
