ސްޓުޓްގާޓް (ޖޫން 16) - ޑެންމާކްގެ މިޑްފީލްޑަރު ކްރިސްޓިއަން އެރިކްސަން ލަނޑެއް ޖަހައި ޑެންމާކަށް ލީޑު ހޯދައިދިން ނަމަވެސް ޔޫރޯގައި މިރޭ ސްލޮވީނިއާ ދެކޮޅަށް ޑެންމާކް ކުޅުނު މެޗު ނިމުނީ 1-1 އިން ދެ ޓީމު އެއްވަރުވެގެންނެވެ.
މި މެޗުގެ 17 ވަނަ މިނިޓުގައި ޑެންމާކަށް ލީޑު ހޯދައިދިނީ ތަޖުރިބާކާރު މިޑްފީލްޑަރު އެރިކްސަން އެވެ. މިއީ އެރިކްސަންއަށް ވަރަށް ހާއްސަ ލަނޑެކެވެ.
އެންމެ ފަހުން 2021 ވަނަ އަހަރު އޮތް ޔޫރޯގައި ޑެންމާކް ކުޅުނު ފުރަތަމަ މެޗުގައި ކުޅެނިކޮށް ދިމާވި ހިތުގެ މައްސަލައަކާ ގުޅިގެން އެރިކްސަން ދަނޑު މައްޗަށް ވެއްޓި، އޭނާގެ ކެރިއަރާމެދު ސުވާލު އުފެދުނެވެ. އެކަމަކު، އައިސީޑީއެއް ލައްވައި، ބްރެންޓްފޯޑަށް ކުޅެން ފެށުމަށް ފަހު، އޭގެ ފަހުން، މެންޗެސްޓާ ޔުނައިޓަޑަށް ބަދަލުވެ، ކުޅެމުންދާ އެރިކްސަން ވަނީ އަލުން ދަނޑަށް ނުކުމެފައެވެ.
އޭގެ ފަހުން އެރިކްސަން ވަނީ ގަތަރުގައި 2022 ވަނަ އަހަރު އޮތް ވޯލްޑް ކަޕްގައި ވެސް ކުޅެފަ އެވެ. އެކަމަކު، ޔޫރޯގެ ލަނޑު އެރިކްސަން އަށް ހާއްސަވީ، މިިދިޔަ އަހަރު ހިތްދަތި ގޮތަކަށް ފުރަތަމަ މެޗުން މުބާރާތާ ވަކިވާން ޖެހުމުންނެވެ.
މެޗުގެ ފުރަތަމަ ހާފުގައި އެރިކްސަންގެ ކުޅުން ފާހަގަވި އެވެ. އަދި ޑެންމާކް އިން މެޗު ކޮންޓުރޯލްކޮށް ގިނަ ހަމަލާތަކެއް އުފެއްދިއެވެ.
އެކަމަކު، މެޗުގެ ފުރިހަމަ ވަގުތު ހަމަވާން 13 މިނިޓަށްވެފައި ވަނިކޮށް، ސްލޮވީނިއާގެ އެރިކް ޔަންޒާ ވަނީ ލަނޑެއް ޖަހައި، ސްލޮވީނިއާ އަށް ނަތީޖާ އެއްވަރުކޮށްފަ އެވެ. ޕެނަލްޓީ އޭރިޔާ ބޭރުން ޔަންޒާ ފޮނުވާލި ބާރު ޝޮޓްގެ ގޯލަށް އަމާޒުވީ ޑެންމާކްގެ ކުޅުންތެރިއެއްގެ ގައިގައި ޖެހިފަ އެވެ.
ސްލޮވީނިއާ އަތުން ބަލިނުވެ، ޑެންމާކުން މި ނިންމާލީ ޖެހިޖެހިގެން ހަތް ވަނަ މެޗެވެ. މީގެ ތެެރެއިން ފަސް މެޗުން ސްލޮވީނިއާ ވަނީ ބަލިވެފަ އެވެ.
