ހެމްބާގް (ޖޫން 16) - ޔޫރޯ ފުޓުބޯޅަ މުބާރާތުގައި, ވައުޓް ވެގްހޯސްޓް ފަހު ވަގުތު ޖަހައިދިން ގޯލުން ޕޮލެންޑްގެ މައްޗަށް، 2-1 އިން ކުރިހޯދައި ނެދަލެންޑްސް އިން މުބާރާތުގެ ފެށުން ރަނގަޅުކޮށްފި އެވެ.
މި މެޗު ފަށައިގެން ނެދަލަންޑްސް އިން ވަނީ ފުލުފުލުގައި ޕޮލަންޑްގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދާފަ އެވެ. އެގޮތުން މެޗުގެ ހަތަރު ވަނަ މިނެޓުގައި ނެދަލަންޑްސްގެ ކޯޑީ ގަކްޕޯ ފޮނުވަލި ބާރު ހަމަލާގެ ހުރަހަކަށްވީ ޕޮލެންޑްގެ ކީޕަރު، ވޮޒްޝިއޭ ޝެޒްނީ އެވެ. އޭގެ ފަހުން މެޗުގެ ނުވަވަނަ މިނެޓުގައި ނެދަލަންޑްސްގެ ޖޭޑީ ޝައުޓަން އޭރިއާ ތެރެއަށް ނަގާދިން ހުރަސް މުޅިން ހުސްކޮށްހުރެ ޓިޖާނީ ރައިންޑަސް ފޮނުވާލި ނަމަވެސް އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.
އެކަމަކު މެޗުގެ 16 ވަނަ މިނެޓުގައި ލިބުނު ކޯނަރެއްގެ ފައިދާ ނަގާ ޕޮލެންޑުން ވަނީ ގޯލު ޖަހާ ލީޑު ނަގައިފަ އެވެ. މި ގޯލު އެ ޓީމަށް ޖަހާދިނީ އެޑަމް ބަކްސާ އެވެ. އޭގެ ފަހުން، މެޗުގެ 20 ވަނަ މިނެޓުގައި ޕޮލެންޑްގެ އޭރިއާ ތެރެއިން ނެދަލަންޑްސްގެ ކެޕްޓަން ވާޖިލް ވެން ޑައިކް ފޮނުވާލި ބާރު ހަމަލާގެ ހުރަހަކަށްވީ ވެސް ޕޮލެންޑްގެ ކީޕަރު ޝެޒްނީ އެވެ.
އެކަމަކު މެޗުގެ 29 ވަނަ މިނެޓުގައި ނެދަލަންޑްސް އިން ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. އޭރިއާ ބޭރުން ގަކްޕޯ ފޮނުވާލި ބާރު ހަމަލާ ޕޮލެންޑްގެ ޑިފެންޑަރެއްގެ ފައިގައި ޖެހިފައި ވަނީ ގޯލު ތެރެއަށެވެ.
ނެދަލަންޑްސް އާއި ޕޯލަންޑް ބައްދަލުކުރި މެޗުގެ ތެރެއިން
ދެ ވަނަ ހާފުގައި ވެސް ނެދަލަންޑްސް އިން ވަނީ ޕޮލެންޑްގެ ހާފަށް ބާރުބޮޑު ކޮށް ގިނަ ހަމަލާތަކެއް އުފައްދާފަ އެވެ.
އެކަމަކު, ނެދަލަންޑްސް އަށް ގޯލެއް ޖެހޭ ވަރުވީ މެޗު ނިމެން ހަތް މިނެޓަށް ވެފައިވަނިކޮށެވެ. މިއީ އޭރިއާ ތެރެއަށް ނެދަލަންޑްސްގެ ޑިފެންޑަރު ނޭތަން އަކޭ ދިން ޕާހަކުން ބަދަލު ކުޅުންތެރިއެއްގެ ގޮތުގައި ކުޅެން އެރި ވޯޓް ވެގްހޯސްޓް ކާމިޔާބު ކޮށްދިން ގޯލެކެވެ.
ގްރޫޕް ޑީގައި ހިމެނޭ ނެދަލަންޑްސް އިން މުބާރާތުގައި ކުޅޭ ދެ ވަނަ މެޗުގައި އަންނަ ހޮނިހިރު ދުވަހު ނުކުންނާނީ ފްރާންސްއާ ދެކޮޅަށެވެ. އަދި ގްރޫޕް ސްޓޭޖުގެ ފަހު މެޗުގައި މި މަހުގެ 25 ވަނަ ދުވަހު ނުކުންނާނީ އޮސްޓްރިއާ އާ ދެކޮޅަށެވެ.
