ޑޯޓްމަންޑް (ޖޫން 15) - ޔޫރޯ ފުޓުބޯޅަ މުބާރާތުގައި މިރޭ އަލްބޭނިއާ އިން އެންމެ ފަހުގެ ޗެމްޕިއަން އިޓަލީއާ ދެކޮޅަށް ނުކުންނައިރު, ހުރިހާ ގޮތަކުންވެސް ޕްރެޝަރު އޮތީ އިޓަލީ އަށް ކަމަށާއި އޭގެ ފައިދާ އަލްބޭނިއާ އަށް ނެގިދާނެ ކަމަށް އެ ޓީމުގެ ކޯޗު ސިލްވީނިއޯ ބުނެފި އެވެ.
އަލްބޭނިއާ ހިމެނިފައި އޮތީ މި ފަހަރު ޔޫރޯގެ މަރުގެ ގްރޫޕް ކަމަށް ގިނަބަޔަކު ބަލާ ގްރޫޕް ބީ ގަ އެވެ. މި ގްރޫޕްގައި އަލްބީނިއާގެ އިތުރުން ދެން ހިމެނެނީ, ސްޕެއިން, ކްރޮއޭޝިއާ އަދި އެންމެ ފަހުގެ ޗެމްޕިއަން އިޓަލީ އެވެ.
ފުރަތަމަ މެޗުގައި އެންމެ ފަހުގެ ޗެމްޕިއަނުން އިޓަލީއާ ދެކޮޅަށް އަލްބޭނިއާ ނުކުންނަން ޖެހުމަކީ އެ ޓީމަށް އޮތް ޕްރެޝަރެއްގެ ގޮތުގައި ނުދެކޭކަމަށް އެ ޓީމުގެ ކޯޗު ސިލްވީނިއޯ ވަނީ އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ބުނެފަ އެވެ.
"ޔޫރޯ މުބާރާތުގައި ކުޅެލަން ލިބުން އެއީ އަލްބީނިއާ އަށް ލިބުން އުފަލެއް. މިއީ ފަސޭހައިން އާދެވުނު ހިސާބެއް ނޫން. ކޮލިފިކޭޝަން ވެސް ދިޔައީ ވަރަށް އުނދަގޫކޮށް" ސިލްވީނިއޯ ބުންޏެވެ.
ސިލްވީނިއޯ ބުނީ މި މެޗަށް ނުކުންނައިރު, އަލްބޭނިއާ އަށް މިއީ ޕްރެޝަރަކަށް ނުވުން, އެއީ އެ ޓީމަށް ލިބޭ އެޑުވާންޓޭޖެއް ކަމަށެވެ.
އަދި އިޓަލީން މި މެޗަށް ނުކުންނައިރުވެސް އެ ޓީމުގެ ސަޕޯޓަރުން އަދި ކޯޗު ލޫޝިއާނޯ ސްޕަލެއްޓީ ވެސް މެޗުން ބަލިވާން ނޭދޭނެ ކަމަށާއި, އެހެންވެ އިޓަލީން މުޅި މެޗުގައި ވެސް ފެންނާނީ ޕްރެޝަރުގައި ތިބެ ކުޅޭ މަންޒަރު ކަމަށް ސިލްވީނިއޯ ބުނެފައިވެ އެވެ.
އިޓަލީގެ ފުޓްބޯޅައިގައި ވެސް ތަޖުރިބާތަކެއް ކޮށްފައިވާ ސިލްވީނިއޯ ބުނީ އަލްބޭނިއާ އަށް މި މުބާރާތުގައި ޖެހިފައި މި އޮތީ އެންމެ ވަރުގަދަ ގްރޫޕް ކަމަށާއި, އެ ޓީމުގެ އަމާޒަކީ މެޗުތަކުގައި ރަނގަޅު ޕާފޯމެއް ދައްކާ ނަތީޖާ ރަނގަޅު ކުރުން ކަމަށެވެ.
އިޓަލީ އާއި އަލްބޭނިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
