ފަލަސްތީނު މީހުންނާ ދެކޮޅަށް ބޮޑު ގަތުލުއާއްމެއް ހިންގާތީ، އިޒްރޭލު ޕާސްޕޯޓުގައި ރާއްޖެއަށް މީހުން އެތެރެވުން މަނާކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލްގެ ބަހުސް އިއްޔެ ކުރިއަށް ގެންގޮސް، ކޮމިޓީއަށް ފޮނުވަން ވަނީ ފާސްކޮށްފަ އެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމު ހުށަހެޅުއްވި އެ ބިލަށް މެންބަރުންގެ މެދުގައި ތަފާތު ހިޔާލުތައް ހުއްޓެވެ. ސަރުކާރު ކޯލިޝަންގެ މެންބަރުންގެ މެދުގައި ވެސް މަނާކުރުމާމެދު ތަފާތު ހިޔާލުތައް ހުއްޓެވެ.
އިޒްރޭލު ޕާސްޕޯޓުގައި މީހުން އެތެރެވުން ސީދާ ސަރުކާރުން މަނާކުރަން ނިންމުމުގެ ބަދަލުގައި އެކަން މަނާކުރަން މަޖިލީހަށް ހުށަހަޅަން ކެބިނެޓުން އޮތީ ނިންމައިފަ އެވެ. މީކާއިލްގެ ބިލް މަޖިލީހަށް ވެއްދީ ކެބިނެޓުގެ ނިންމުމުގެ ކުރިންނެވެ.
މިދިޔަ މެއި 30، ވަނަ ދުވަހު މީކާއިލް މަޖިލީހަށް ހުށަހެޅުއްވީ ގާނޫނު ނަންވަރު 1/2007 (ދިވެހިރާއްޖޭގެ އިމިގުރޭޝަން ގާނޫނު) ގެ އަށްވަނަ މާއްދާގެ ހ. ގެ ހަތް ވަނަ ނަންބަރުގެ ފަހަތަށް ނަންބަރެއް އިތުރު ކުރުމަށެވެ.
މީކާއިލް ހުށަހެޅުއްވި އިސްލާހުގައި ބުނެފައި ވަނީ ރާއްޖެ އެތެރެ ނުވެވޭނެ މީހުންގެ ތެރޭގައި "އިޒްރޭލު ޕާސްޕޯޓު ގެންގުޅޭ މީހުން (މީގެ ތެރޭގައި އިޒްރޭލުގެ ޕާސްޕޯޓުގެ އިތުރުން، އެހެން ގައުމެއްގެ ޕާސްޕޯޓު ގެންގުޅޭ މީހުން ވެސް ހިމެނޭ)" ކަމަށެވެ.
އެ ބިލު، އިއްޔެ ޖަލްސާގައި މަޖިލީހަށް ތައާރަފު ކުރައްވަމުން އޭނާ ވިދާޅުވީ އެ ބިލުގެ މަގުސަދަކީ ދިވެހިރާއްޖޭން ވެސް އިޒްރޭލާ ދެކޮޅަށް ފެންހިފޭ ފިޔަވަޅުތަކެއް އެޅުން ކަމަށެވެ. އެއީ އޭނާ ވިދާޅުވި ގޮތުގައި އިޒްރޭލުގެ އަނިޔާވެރިކަން ދެނެގަނެ، ބައިނަލް އަގުވާމީ މުޖުތަމައުން ވެސް އެކަން ފާހަގަކުރަމުން ގެންދާތީ އެވެ.
"އަަޅުގަނޑު އުއްމީދުކުރަން މި ބިލަކީ ދިވެހިރާއްޖޭގައި މި ހިމެނޭ ސިޔާސީ ޕާޓީތަކުގެ މެދުގައި އެކެއް އަނެކަކަށް ސިޔާސީބޯޅަ ޖެހުމާއި ގުދޯގުދޯ ގޮވުމުގެ ބަދަލުގައި އަަޅުގަނޑުމެންނަށް ހުރިހާ ޕާޓީއެއް އެކުވެ، ރަނގަޅު މަސައްކަތެއް، ބައިޕާޓީޝަން [ސިޔާސީ ތަފާތުތައް އެއްފަރާތްކޮށްފައި ކުރާ] މަސައްކަތެއް ކުރެވޭނެ ބިލެއްގެ ގޮތުގައި މި ބިލު ވެގެން ދިއުން،" މީކާއީލް ވިދާޅުވި އެވެ.
މަޖިލީހުގެ ހުރިހާ މެންބަރުން ވެސް ތާއީދުކުރައްވައި ވީހާ ވެސް އަވަހަކަށް އެ ބިލުގެ މަސައްކަތް ކުރިއަށް ގެންދަން އޭނާ ގޮވައިލެއްވި އެވެ.
އިޒްރޭލު މީހުން ރާއްޖެއަށް އެތެރެވުން ހުއްޓުވުމަށް ޓަކައި މީކާއީލް ހުށަހެޅުއްވި ބިލުގައި އޮތީ އިމިގްރޭޝަން ގާނޫނަށް އަކުރެއް އިތުރުކޮށް، އިޒްރޭލުގެ ޕާސްޕޯޓް އޮންނަ މީހުންނާއި އިޒްރޭލު ޕާސްޕޯޓާއި އެކު އެހެން ގައުމެއްގެ ޕާސްޕޯޓް އޮންނަ މީހުންނަށް ވެސް ރާއްޖެއަށް އެތެރެނުވެވޭ ގޮތަށް އެ ގާނޫނު ބަދަލުކުރުމަށެވެ.
