އިންޑިއާގެ ބޮޑުވަޒީރު ނަރެންދުރަ މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމުމުން, އެކަމަށް ފާޑުކިޔުން އަމާޒުވި ފަހުން އެ ކަވަރޭޖު ނުގެނެސްދޭން ޕަބްލިކް ސާވިސް މީޑިއާ (ޕީއެސްއެމް) އިން އިއްޔެ ނިންމި އެވެ.
މައުލޫމާތު ލިބިފައި ވާގޮތުގައި ޕީއެސްއެމްގެ މުވައްޒަފުން އިންޑިއާއަށް ގޮސްފައި ވަނީ ވެސް ލައިވް ކުރަން ބޭނުންވާ އިކުއިޕްމެންޓުތައް ހިފައިގެންނެވެ. އިއްޔެ ހެނދުނު 10 ގެ ހަބަރުގައި ވެސް ވަނީ ޕީއެސްއެމްގެ ލައިވް އިންޑިއާއިން ގެނެސްދީފަ އެވެ.
މޯދީގެ ރަސްމިއްޔާތު ޕީއެސްއެމުން ލައިވް ކުރަން ނިންމި ހަބަރު މި ނޫހުން ގެނެސްދިނުމުން އާންމުން ވަނީ ސޯޝަލްމީޑިއާގައި ޕީއެސްއެމްއަށް ނަފުރަތުގެ ބަސްތައް އޮއްސާލައިފަ އެވެ.
މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމިކަން ޕީއެސްއެމްގެ ތިން މުވައްޒަފަކު މި ނޫހަށް ކަށަވަރުކޮށްދިނެވެ. ނަމަވެސް އާންމުންގެ ފާޑުކިޔުންތައް އިންތިހާއަށް އަމާޒުވުމުން އެ ކަވަރޭޖު ކެންސަލް ކުރިކަން އެތަނުގެ މުވައްޒަފުންނަށް އެންގި އެވެ.
ލައިވް ކެންސަލް ކުރި ސަބަބާ ގުޅޭ ގޮތުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު، ޔާމީން ރަޝީދުއާ ސުވާލު ކުރުމުން އިއްޔެ ވިދާޅުވީ މޯދީ ހުވާ ކުރައްވާ ރަސްމިއްޔާތު ލައިވް ކުރަން އެއް އިރަކު ވެސް ނުނިންމާ ކަމަށެވެ.
"އަޅުގަނޑުމެން އެއްވެސް އިރެއްގައި ލައިވް ކުރާކަށް ނުނިންމަން، އެއީ ކަނޑައެޅިގެން ދޮގު ހަބަރެއް،" ޔާމީން ވިދާޅުވި އެވެ.
ނަމަވެސް "އަދަދު" އަށް ވަނީ ޕީއެސްއެމް ޕްރޮގްރާމްތަކުގެ ޝޫޓިން ތާވަލު ލިބިފަ އެވެ. މޯދީގެ ރަސްމިއްޔާތުގެ ލައިވް ކަވަރޭޖު ގެނެސްދިނުމަށް ޕީއެސްއެމް ޕްރޮގުރާމްތަކުގެ ޝޫޓިން ތާވަލުގައި ހިމަނާފައި އޮތީ އިއްޔެ އިރުއޮއްސި 6:00 އިން 8:00 އާ އަށެވެ.
އެ ކަވަރޭޖު ގެނެސްދިނުމަށް އެގަޑިއަށް ތާވަލުކޮށް ޕްރެޒެންޓަރުންނާއި ޓެކްނީޝަނުންގެ އިތުރުން ސައުންޑް އަދި ލައިޓްްސްއަށް ވެސް މުވައްޒަފުން ހަމަޖައްސާފައިވެ އެވެ.
އިންޑިއާގެ ބޮޑުވަޒީރަކު ހުވާ ކުރައްވާ ރަސްމިއްޔާތު މީގެ ކުރިން ދުވަހަކު ވެސް ރާއްޖޭގެ މީޑިއާއަކުން ލައިވްކޮށްފައެއް ނުވެ އެވެ.
