އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގައި އަބްދުﷲ ފިޒާން ޖެހި ގޯލުން ޓީސީ ސްޕޯޓްސް ކްލަބުން 1-0 އިން އޮޑި ސްޕޯޓްސް ކްލަބް ބަލިކޮށް މުބާރާތުގެ ފުރަތަމަ މޮޅު ހޯދައިފި އެވެ.
ގަލޮޅު ދަނޑުގެ ލައިޓްތަކުގެ މައްސަލަ އަށް ހައްލެއް ނުލިބޭތީވެ، ޔޫތު ޗެމްޕިއަންޝިޕްގެ މެޗުތައް ކުޅެނީ ހެނދުނު 8 ޖަހާއިރު އާއި ހަވީރު 4 ޖަހާއިރު އެވެ. މެޗުތައް ހެނދުނު ކުޅެން ޖެހޭތީ ޓީމުތަކުގެ ކޯޗުން ވަނީ އެކަމާ ކަންބޮޑުވުން ފާޅުކޮށްފަ އެވެ.
މުބާރާތުގެ ފުރަތަމަ މެޗު މިއަދު ހެނދުނު ކުޅުނުއިރު، ކޮންމެ ހާފެއްގައި ވެސް ވަނީ 25 މިނިޓަށް ފަހު ވޯޓާ ބްރޭކެއް ނަގައިފަ އެވެ.
އެ ގޮތުން، މެޗުގައި ފެނިގެންިދޔަ ހަމައެކަނި ލަނޑު ފުރަތަމަ ހާފުގެ 25 ވަނަ މިނިޓްގައި ޓީސީ އަށް ކާމިޔާބުކޮށްދިނީ ފިޒާން އެވެ. އޭރިއާބޭރުން އޭނާ ޖެހި ބޯޅަ ގޯލަށް ވަނީ އޮޑިގެ ކީޕަރު، ޒަހުރާން ހަސަން ޒިޔާދު އަތްކައިރިންނެވެ.
ޓީސީ އާއި އޮޑި ކުޅުނު މެޗުގެ ތެރެއިން: އޮޑި ޓީމުގެ ޖައުޝަން ބޯޅަ ހިފައިގެންދަނީ.--- ފޮޓޯ: ނައުޝަމް ވަހީދު / އަދަދު
މި މެޗުގައި އޮޑި އިން ގިނަ ވަގުތު ބޯޅަ ހިފަހައްޓައިގެން ކުޅެ ގޯލެއް ޖެހޭތޯ މަސައްކަތް ކުރި ނަމަވެސް، ޓީސީން ވަނީ ރަނގަޅަށް ޑިފެންސްކޮށް، ސްކޯ ހިފަހައްޓައި މެޗުން މޮޅުވެފަ އެވެ.
މި ފަަހަރުގެ މުބާރާތުގައި ޓީސީގެ ކޯޗަކީ އެންމެ ފަހުން، މި މުބާރާތް 2022 ވަނަ އަހަރު ބޭއްވިއިރު، އީގަލްސް އަށް ތަށި ހޯދައިދިން ކޯޗު އަހުމަދު ނިމާދު (ނިމާ) އެވެ. ޓީސީގެ ޔޫތު ޓީމަކީ، މޯލްޑިވްސް ސޮކަ މޭޓްސް (އެމްއެސް މޭޓްސް)އާ ގުޅިގެން ހިންގާ ޓީމެކެވެ.
މިއީ މިދިޔަ ސީޒަނުގެ ދެ ވަނަ ޑިވިޝަނުގެ ޗެމްޕިއަންކަން ހޯދި އޮޑި ސްޕޯޓްސް ކްލަބުން ޔޫތު ޗެމްޕިއަންޝިޕެއްގައި ކުޅުނު ފުރަތަމަ މެޗެެވެ. އޮޑި ސްޕޯޓްސް ކްލަބް، ފުރަަތަމަ ޑިވިޝަނަށް ޕްރޮމޯޓްވުމުގެ ކުރިން، އެ ޓީމު ކުޅުނީ މަސް އޮޑި ސްޕޯޓްސް ކްލަބްގެ ނަމުގަ އެެވެ.
އޮޑި ޓީމުގެ ކޯޗުންނަކީ، ހެޑް ކޯޗު ޔޫސުފް އަޒީމް (ޔޫއްޓޭ)ގެ އިތުރުން، ކޯޗިން ސްޓާފުންގެ ތެރޭގައި އިސްމާއިލް އާސިފް (ކުޑަހީނާ) އެވެ.
ޔޫތު ޗެމްޕިއަންޝިޕްގައި މިއަދު ހަވީރު ކުޅޭ މެޗުގައި، ބުރު ސްޕޯޓްސް ކްލަބް ބައްދަލުކުރާނީ ސުޕަ ޔުނައިޓެޑް ސްޕޯޓްސް (ސަސް)އާ އެވެ. މެޗު ފަށާނީ 21:00 ގަ އެވެ.
