ޕަޕުއާ ނިއު ގިނީގައި ހުކުރު ދުވަހު ބިންގަނޑު ކަނޑައިގެން ގޮސް މަރުވި މީހުންގެ އަދަދު 670 އަށް އަރައިފި އެވެ.
ޕަޕުއާ ނިއު ގިނީގައި ހަރަކާތްތެރިވާ ޔުނައިޓެޑް ނޭޝަންސް (ޔޫއެން) ގެ އޮފިޝަލަކާ ހަވާލާދީ ސްކައި ނިއުސްއިން ބުނީ ހާދިސާގެ އަސަރު 4،000 މީހުންނަށް ކޮށްފައިވާ ކަމަށެވެ. އަދި އެ ހާދިސާގައި އެތައް ގެޔެއް ވަޅުލެވިފައިވާ ކަމަށް ވެސް ރިޕޯޓުތަކުން ބުނެ އެވެ.
މި ހާދިސާގެ އަސަރު ހަ އަވަށަކަށް ކޮށްފައިވާއިރު، އަދިވެސް އެ ސަރަހައްދުތަކުގައި ރެސްކިއު ޓީމުތަކުން އަންނަނީ ހަރަކާތްތެރިވަމުންނެވެ.
މީގެ އިތުރުން ހާދިސާގައި ޕަޕުއާ ނިއު ގިނީގެ އެކި މަގުތައް ނުދުއްވޭ ވަރަށް ވަނީ ހަލާކުވެފަ އެވެ. އަދި ގެތައް ވަނީ ސުންނާފަތިވެފަ އެވެ.
ހާދިސާގައި ގެއްލުންވި ސަރަހައްދުތަކަށް ބޭނުންވާ އެހީތެރިކަން އަންނަނީ ފޯރުކޯށްދެމުންނެވެ. އެގޮތުން ބޭނުންވާ ޒަރޫރީ ކާނާ، ފެން އަދިވެސް އިތުރު އެއްޗެހި ހިމެނެ އެވެ.
ޕަޕުއާ ނިއު ގިނީއަށް މާޗު މަހު 6.9 މެގްނިޓިއުޑްގެ ބާރު މިނުގައި ބިންހެލުމެއް އައިސްފައިވާއިރު، އެ ބިންހެލުމުގައި ވެސް ގިނަ ބަޔަކަށް ވަނީ އަސަރުކޮށްފަ އެވެ.
