އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުނގެނުމާއި އުނގަންނައި ދިނުމަށް ޓީޗަރުން އަހުލުވެރިކުރުމަށް މި ދިރާސީ އަހަރުގައި ހާއްސަ އިސްކަމެއް ދެއްވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެ އެވެ.
ބޮޑު ޗުއްޓީއަށް ފަހު ސްކޫލުތަކުގެ ކިޔެވުން މިއަދު ފަށާފައި ވާއިރު، މި މުނާސަބަތާ ގުޅިގެން އެޑިއުކޭޝަން މިނިސްޓަރު ދެއްވި ހިތާބުގައި ވިދާޅުވީ ޓެކްނޮލޮޖީގެ ބޮޑު ބަދަލަކަށް ދުނިޔެ މިސްރާބު ޖަހާފައި ވާއިރު ތަރައްގީގެ މައިދާނުގައި ދިވެހިރާއްޖޭގެ މުސްތަގުބަލުގެ ޖީލު ބައްޓަން ކުރަން ވާނީ ޓެކްނޮލޮޖީއަށް އަހުލުވެރި، ކުރިއެރުމަށް ލޯބިކުރާ، އިސްލާމީ މަތިވެރި އަގުތައް އަށަގަނެފައިވާ ބައެއްގެ ގޮތުގައި ކަމަށެވެ. އެކަން ކާމިޔާބު ކުރަން ޓީޗަރުން ބިނާކުރަންޖެހޭ ކަމަށް މިނިސްޓަރު ފާހަގަ ކުރެއްވި އެވެ.
"އާޓިފިޝަލް އިންޓެލިޖެންސް ފަދަ ޒަމާނީ ޓެކްނޮލޮޖީ ބޭނުންކޮށްގެން އުނގެނުމާއި އުނގަންނައި ދިނުން ހަރުދަނާ ކުރުމާއި މުދައްރިސުން އަހުލުވެރިކުރުވުމާއި ޝާމިލުކޮށްގެން އުނގަންނައި ދިނުމުގައި އެސިސްޓިވް ޓެކްނޮލޮޖީ ބޭނުންކޮށްގެން އުނގަންނައި ދިނުމަށް މުދައްރިސުން އަހުލުވެރި ކުރުވުމަށް ހާއްސަ އިސްކަމެއް މި ދިރާސީ އަހުރުގެ ތެރޭގައި ދެވިގެންދާނެ،" މިނިސްޓަރު ވިދާޅުވި އެވެ.
ތައުލީމީ ނިޒާމަށް މިއަދު ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ފެންވަރު ރަނގަޅު މުދައްރިސުން މަދުވުމުގެ މައްސަލަ ކަމަށާއި މިކަން ހައްލުކުރުމަށް މުދައްރިސުން ސްކޫލުގައި ހޭދަކުރާ މަސައްކަތުގެ ވަގުތު ވަކި މިންގަނޑެއްގައި ހިފެހެއްޓުމުގެ އިތުރަށް ރާއްޖޭގެ ސްކޫލުތަކުގައި ކިޔަވައިދޭ މުދައްރިސުންނަކީ ދޭސީ މުދައްރިސުންނަށް ހެދުމަށް ގައުމީ ފެންވަރުގައި މުދައްރިސުން ތަމްރީނުކުރުރުމުގެ ޕްރޮގްރާމެއް މި ދިރާސީ އަހަރުގެ ތެރޭގައި ފެށިގެންދާނެ ކަމަށް ވެސް މިނިސްޓަރު ވިދާޅުވި އެވެ.
"ފެންވަރު ރަނގަޅު ތައުލީމަކާއި ތަރުބިއްޔަތެއް ދަރިވަރުންނަށް ފޯރުކޮށްދެވޭނީ ފެންވަރު ރަނގަޅު އުފެއްދުންތެރި ވިސްނުމުގެ މުދައްރިސުން ދާއިރާގެ ހިދުމަތުގައި ތިބެގެން،" މިނިސްޓަރު ވިދާޅުވި އެވެ.
އޭލެވެލްގައި ބައިވެރިކުރާ ދަރިވަރުން އިތުރު ކުރަނީ
ގްރޭޑު 10 ނިންމުމަށް ފަހު، ގްރޭޑު 11 އަދި 12 ގައި ތައުލީމު ހާސިލުކުރާ ދަރިވަރުންގެ އަދަދު ދަށްވަމުން ދާއިރު އެކަމަށް ހައްލެއް ގެނައުމުގެ ވިސްނުން ގެންގުޅުއްވާ ކަމަށް މިނިސްޓަރު ހިތާބުގައި ވިދާޅުވި އެވެ.
ދަރިވަރުންނަށް އުނގެނުމުގެ މައިދާނުގެ ތަފާތު ރޮނގުތަކުން، - އިލްމީ، ކުޅިވަރު ނުވަތަ މަސައްކަތްތެރިކަމުގެ ރޮގުން - ކުރިއަށް ދެވޭނެ މަގުތައް ތަނަވަސް ވެފައި ވުމަކީ ގައުމުގެ ތަރައްގީއަށް ބޭނުންތެރި ކަމެއް ކަށާއި އެ މަގަށް ކަންތައްތައް ތަރުތީބު ކުރުމުގެ ފުރަތަމަ ފިޔަވަޅެއްގެ ގޮތުން އޭލެވެލް މަރުހަލާގައި ދަރިވަރުން ބައިވެރިވުން އިތުރުކޮށް ފަންނީ ތަފާތު ދާއިރާތަކުން މަސައްކަތްތެރިކަމުގެ ތަމްރީނު ލިބޭނެ ޕްރޮގްރާމުތަކެއް ކައިރި މުސްތަގުބަލެއްގައި ފެށުމުގެ މަސައްކަތް ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ.
"އިލްމީ ފަންނުވެރި މަސައްކަތްތެރި ޖީލެއް ބިނާކުރުމަށް ކުރާ މަސައްކަތް ކާމިޔާބު ވަނީ އަޅުގަނޑުމެން އެންމެން ވިސްނުންތެރިކަމާއި ހިކުމަތްތެރިކަމާއެކު ގުޅިގެން ކުރާ މަސައްކަތުން،" މިނިސްޓަރު ވިދާޅުވި އެވެ.
އެކަން ކާމިޔާބުކުރަން އެންމެ މުހިއްމު ކަމަކީ ސްކޫލުތަކާއި ބެލެނިވެރިންގެ ގުޅުން ވަރުގަދަވެ ހަރުދަނާވުން ކަމަށާއި މި ފެށޭ ދިރާސީ އަހަރަކީ އެ ގުޅުން އިތުރަށް ތަރައްގީވެ ދަރިވަރުންގެ ކުރިއެރުމަށް އެންމެންގެ ވިސްނުމާއި ފިކުރު ސީދާވެގެން ދާނެ އަހަރަކަށް ވެގެންދާނެ ކަމަށް އުއްމީދު ކުރައްވާ ކަމަށް ވެސް މިނިސްޓަރު ފާހަގަ ކުރެއްވި އެވެ.
މިނިސްޓަރު ވިދާޅުވި ގޮތުގައި ދަރިވަރުން އެންމެ ބޮޑު އިސްކަމެއް ދޭންވީ އިސްލާމް ދީނަށް ލޯބިކުރާ، މައިންބަފައިންނަށް ކިޔަމަންތެރި، މުދައްރިސުންނަށް ގަދަރާއި އިހުތިރާމުކުރާ އަދި ހިތްމަތާއެކު އުނގެނުމަށް މަސައްކަތްކުރާ ޒިންމާދާރު ދަރިވަރަކަށް ވުމަށް ކަމަށެވެ. އަދި އެކަކު އަނެކަކަށް އިހުތިރާމުކުރުމާއެކު ތިމާ އާއި ތިމާ ވަށައިގެންވާ އެންމެންގެ ސަލާމަތާއި ރައްކާތެރިކަމަށް އިސްކަންދޭ ދަރިވަރަކަށް ވުމަށް ކަމަށް ވެސް މިނިސްޓަރު އިލްތިމާސް ކުރެއްވި އެވެ.
"އުނގެނުމަށް ލިބިފައިވާ ރަނުގެ ފުރުސަތު އެންމެ ހެޔޮ ގޮތުގައި ބޭނުންކުރުމަށް ތިޔަ ހުރިހާ ދަރިވަރުންނަށް ނަސޭހަތްތެރިވަން،" މިނިސްޓަރު ވިދާޅުވި އެވެ.
ސްކޫލުތައް ފިނިކުރުމުގެ މަޝްރޫއު
އުނގެނުމަށާއި އުނގަންނައިދިނުމަށް ކުރިމަތިވާ ހުރަސްތައް ނައްތާލައި އުފާވެރި ހިތްފަސޭހަ މާހައުލެއް ސްކޫލުތަކުގައި ގާއިމު ކުރުމަކީ ސަރުކާރުން ވަރަށް ބޮޑު އިސްކަމެއް ދީގެން ކުރިއަށް ގެންދާނެ ކަމެއް ކަމަށް މިނިސްޓަރު ފާހަގަ ކުރެއްވުމަށް ފަހު ވިދާޅުވީ ކްލާސްރޫމުތަކުގައި އެއާ ކަންޑިޝަން ހަރުކުރުމުގެ މަޝްރޫއުގެ ވާހަކަ އެވެ.
"ކްލާސްތަކުގައި ދަރިވަރުން ތިބޭއިރު އިހުސާސް ކުރެވޭ ހޫނުމިނުގެ ދަރަޖަ މަތިވެ އެކަމުގެ ސަބަބުން ދަރިވަރުންނާއި މުދައްރިސުން ތަހައްމަލުކުރަންޖެހޭ އުނދަގޫތަކަށް ދާއިމީ ހައްލެއް ހޯދުމުގެ ގޮތުން ސްކޫލުތައް އޭސީ ކުރުމުގެ ބޮޑު ޕްރޮޖެކްޓެއް ދާދި އަވަހަށް ފެށިގެން ކުރިއަށް ދާނެ،" މިނިސްޓަރު ވިދާޅުވި އެވެ.
މިދުވަސްވަރު މޫސުން ގޯސްވެ، ބޯކޮށް ވާރޭ ވެހޭއިރު ފުރަތަމަ ތިން ދުވަހުގެ ކިޔެވުމުގެ ވަގުތު ކުޑަކުރަން ސްކޫލުތަކަށް ވަނީ އަންގައިފަ އެވެ.
