ސްލޮވާކިއާ ބޮޑުވަޒީރު ރޮބާޓް ފީކޯ ގަޔަށް ބަޑި ޖަހައިގެން ލިބުނު ޒަހަމްތަކަށް ފަރުވާ ހޯދުމަށް އިތުރު އޮޕަރޭޝަނެއް ކޮށްފައިވާ ކަމަށާއި، ހާލު އަދިވެސް ސީރިއަސް ކަމަށް އެ ގައުމުގެ ސަރުކާރުން ބުނެފި އެވެ.
ސްލޮވާކިއާގެ ބޮޑުވަޒީރުގެ ނައިބު ރޮބަޓް ކަލިނަކް ވިދާޅުވީ ފީކޯ ކުރި އިތުރު އޮޕަރޭޝަން ދެ ގަޑިއިރަށް ދެމިގެންދިޔަ ކަމަށާއި، އެ މަނިކުފާނުގެ ހާލު ސީރިއަސް ކަމުން ފަރުވާ ދެމުން އަންނަނީ އައިސީޔޫގައި ކަމަށެވެ.
ފީކޯއަށް ހަމަލާ ދިނީ ހެންޑްލޯވާ ސިޓީގައި ހުންނަ މިނިސްޓްރީ އޮފް ކަލްޗާގެ ބޭރުގައި ހުންނަވަނިކޮށް، 71 އަހަރުގެ ލިޔުންތެރިޔެކެވެ. އޭނާ ވަނީ ފީކޯއަށް އަމާޒުކޮށް ފަސް ފަހަރު ބަޑިން ހަމަލާދީފަ އެވެ.
ޝޮޕިން މޯލްއެއްގެ ސެކިއުރިޓީއަކަށް ވެސް އުޅުނު އެ މީހާގެ މައްޗަށް ގަސްތުގައި މީހަކު މެރުމުގެ ދައުވާ ވަނީ އުފުލައިފަ އެވެ. އަދި އޭނާ ވަގުތުން ހައްޔަރުކޮށް ހުރީ ފުލުހުންގެ ބެލުމުގެ ދަށުގަ އެވެ.
މިއީ ފީކޯ ބޮޑުވަޒީރުގެ މަގާމު އަދާ ކުރައްވާ ތިން ވަނަ ދައުރެވެ. އެންމެ ފަހުން އޭނާ އިންތިހާބުވީ ސެޕްޓެމްބަރު، 2023، ގައި ބޭއްވި އިންތިހާބު ކާމިޔާބުކޮށްގެންނެވެ.
