ހައިދަރުއާބާދު (މެއި 17) - އިންޑިއަން ޕްރިމިއާ ލީގު (އައިޕީއެލް)ގައި ރޭ ގުޖުރާތު ޓައިޓަންސްއާ ދެކޮޅަށް ކުޅެން އޮތް މެޗު ވިއްސާރައިގެ ސަބަބުން ސަންރައިޒާސް ހައިދަރުއާބާދަށް މެޗު ނުކުޅެވުނު ނަމަވެސް، ލިބުނު ޕޮއިންޓާ އެކު ޕްލޭއޮފަށް ދަތުރުކޮށްފި އެވެ.
އައިޕީއެލްގެ ގަވާއިދުގައިވާ ގޮތުން، ޝެޑިއުލްގައިވާ މެޗެއް ވިއްސާރައިގެ ސަބަބުން ނުކުޅެވިއްޖެނަަމަ، ދެ ޓީމަށް ޕޮއިންޓެއް ލިބޭ ގޮތަށް ނިންމައިލަނީ އެވެ. އެ ގޮތުން، ރޭ ގުޖުރާތާއި ހައިދަރުއާބާދުގެ މެޗު ވެސް އެ ގޮތަށް ނިންމަން ޖެހުނީ އެވެ. ލިބުނު ޕޮއިންޓާ އެކު، ހައިދަރުއާބާދުން ވަނީ ގަދަ ހަތަރެއް ޔަގީންކޮށްފަ އެވެ.
ހައިދަރުއާބާދަކީ މި ފަހަރުގެ، އައިޕީއެލްގެ ގަދަ ހަތަރަކުން ފުރުސަތު ހޯދި ތިން ވަނަ ޓީމެވެ. މީގެ ކުރިން، ކަލްކަތާ ނައިޓް ރައިޑާސް އާއި ރާޖަސްތާން ރޯޔަލްސް ވެސް ވަނީ ޕްލޭއޮފަށް ދަތުރުކޮށްފަ އެވެ.
ރޭގެ ނަތީޖާއާ އެކު، ލަކްނައު ސުޕަ ޖަޔަންޓްސް އާއި ދިއްލީ ކެޕިޓަލްސް އަށް ޕްލޭއޮފްގެ ދޮރު ވަނީ ބަންދުވެފަ އެވެ. މިހާރު އޮތްގޮތުން، ގަދަ ހަތަރެއްގެ ފަހު ޖާގަ ހޯދައި، ޕްލޭއޮފަށް ދިއުމުގެ ފުރުސަތު އޮތީ ދެ ޓީމަކަށެވެ. އެއީ ރޯޔަލް ޗެލެންޖާސް ބެންގަލޫރު އާއި ޗެންނާއި ސުޕަކިންގްސް އަށެވެ.
ތާވަލުގެ ކުރީގައި، ކަލްކަތާ އޮތީ، 13 މެޗުން 19 ޕޮއިންޓާ އެކު އެވެ. ދެ ވަނައިގައި އޮތް ރާޖަސްތާން ރޯޔަލްސް އަށް 12 މެޗުން ވަނީ 16 ޕޮއިންޓް ލިބިފަ އެވެ. ތިން ވަނައިގައި އޮތް، ސަންރައިޒާސް ހައިދަރުއާބާދަށް ވަނީ 13 މެޗުން 15 ޕޮއިންޓް ލިބިފަ އެވެ. ހަތަރެއްގައި އޮތް، ޗެންނާއި ސުޕަ ކިންގްސް އަށް 13 މެޗުން 14 ޕޮއިންޓް ލިބިފައިވާއިރު، ފަސް ވަނައިގައި އޮތް، ދިއްލީ ކެޕިޓަލްސް އިން ހުރިހާ މެޗެއް ހަމަވެފައިވާއިރު، 14 މެޗުން ހަމަކުރެވުނީ 14 ޕޮއިންޓެވެ. ހަ ވަނައިގައި އޮތީ، 13 މެޗުން 12 ޕޮއިންޓާ އެކު، ރޯޔަލް ޗެލެންޖާސް ބެންގަލޫރު އެވެ.
ފުލުގައި އޮތް ހަތަރު ޓީމު ވަނީ މުބާރާތުން ކަޓައިފަ އެވެ. އެއީ، ލަކްނައު، ގުޖުރާތު، ޕަންޖާބް އަދި މުމްބައި އެވެ.
އެ ގޮތުން، ހަތް ވަނައިގައި އޮތް ލަކްނައު އަށް 13 މެޗުން 12 ޕޮއިންޓް ލިބިފައިވެ އެވެ. އަށް ވަނައިގައި 14 މެޗުން 12 ޕޮއިންޓާ އެކު އޮތް ގުޖުރާތު ޓައިޓަންސް އޮތްއިރު، ނުވަ ވަނައިގައި އޮތް ޕަންޖާބަށް ވަނީ 13 މެޗުން 10 ޕޮއިންޓް ލިބިފަ އެވެ. އަދި ފުލުގައި، އޮތް މުމްބައި އަށް ވަނީ 13 މެޗުން އަށް ޕޮއިންޓް ލިބިފަ އެވެ.
