ސްލޮވާކިއާ ބޮޑުވަޒީރު ރޮބާޓް ފީކޯ ގަޔަށް ބަޑި ޖަހައިގެން ލިބުނު ޒަހަމްތަކަށް ފަރުވާ ހޯދުމަށް ކުރި އޮޕަރޭޝަން ކާމިޔާބު ކަމަށް އެ ގައުމުން ބުނެފި އެވެ.
ސްލޮވާކިއާ ބޮޑުވަޒީރުގެ ނައިބު ތޯމަސް ޓަރަބާ "ބީބީސީ" އަށް ދިން އިންޓަވިއުއެއްގައި ވިދާޅުވީ ފީކޯގެ އޮޕަރޭޝަން ކާމިޔާބު ކަމަށާއި، ފުރާނަ ސަލާމަތްވާނެ ކަމަށް އުންމީދު ކުރެވޭ ކަމަށެވެ.
"އަހަރެންނަށް ލިބުނީ ބޮޑު ސިހުމެއް. މައުލޫމާތު ލިބޭ ގޮތުގައި މިހާރު ފީކޯ އޮތީ ފުރާނައަށް ނުރައްކާވާ ފަދަ ހާލަތެއްގައެއް ނޫން،" ތޯމަސް ވިދާޅުވި އެވެ.
ފީކޯއަށް ހަމަލާދިނީ ހެންޑްލޯވާ ސިޓީގައި ހުންނަ މިނިސްޓްރީ އޮފް ކަލްޗާގެ ބޭރުގައި ހުންނަވަނިކޮށް، 71 އަހަރުގެ ލިޔުންތެރިޔަކެވެ. އޭނާ ވަނީ ފީކޯއަށް އަމާޒުކޮށް ހަތަރު ފަހަރު ބަޑިން ހަމަލާދީފަ އެވެ.
ހަމަލާދިން ސަރަހައްދުން ލިޔުންތެރިޔާ ވަގުތުން ހައްޔަރުކޮށްފައިވާއިރު، ހަމަލާދިން ސަބަބު ދެނެގަތުމަށް ސީރިއަސް ތަހުގީގެއް ވަނީ ފަށާފަ އެވެ.
މިއީ ފީކޯ ބޮޑުވަޒީރުގެ މަގާމު އަދާ ކުރައްވާ ތިން ވަނަ ދައުރެވެ. އެންމެ ފަހުން އޭނާ އިންތިހާބުވީ ސެޕްޓެމްބަރު، 2023، ގައި ބޭއްވި އިންތިހާބު ކާމިޔާބުކޮށްގެންނެވެ.
