ގުޅީފަޅު ހިއްކުން މަޑު ޖައްސާލަން ނެރުނު ކޯޓު އަމުރު މިއަދު ސުޕްރީމް ކޯޓުން ބާތިލު ކުރިއިރު، އެންވަރަމަންޓް ޕްރޮޓެކްޝަން އެޖެންސީ ބާރުވެރިކޮށް ގާނޫނީ ގޮތުން މިނިވަން ކުރަންޖެހޭނެ ކަމަށް އެ ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެ އެވެ.
ގުޅީފަޅު ހިއްކާތީ ތިމާވެއްޓަށް ގެއްލުން ލިބޭ މައްސަލަ ކޯޓަށް ވެއްދީ ތިމާވެއްޓާ ވަކާލާތު ކުރައްވާ ހުމައިދާ އަބްދުލްޣަފޫރެވެ. އެ މައްސަލައިގައި ބިން ހިއްކުން ވަގުތީ ގޮތުން ހުއްޓަން އަމުރު ނެރުނީ ހައި ކޯޓުންނެވެ.
ބިން ހިއްކުން މަޑުޖައްސާލަން ކުރި އަމުރު ބާތިލު ކުރަން ކުރި ހުކުމުގެ ތެރެއިން ފަނޑިޔާރު ސުއޫދު ނެެރުއްވި އަމުރުގައި ވިދާޅުވެފައި ވަނީ، ސައިންސްވެރިންނާއި ސައިންސުގެ އަލީގައި ކުރާ ދިރާސާތައް ރާއްޖޭގައި ނެތުމުން އެފަދަ މައްސަލަތަކުގައި ކޯޓަށް ގޮތެއް ކަނޑައަޅަން ދަތި ކަމަށެވެ.
އަސްލު މައްސަލަ ދަށު ކޯޓުގައި އަދިވެސް ހިނގަމުންދާއިރު ގުޅީފަޅުގެ ބިން އެއްކޮށް ހިއްކާ ނިމިފައިވާކަން ވެސް ފަނޑިޔާރު ސުއޫދު ފާހަގަ ކުރެއްވި އެވެ. އެހެންކަމުން އެ މައްސަލައިގައި ވަގުތީ އަމުރެއް ނެރުމުގެ މުއާލާތް ކެނޑިފައިވާ ކަމަށް ވެސް ސުއޫދު ވިދާޅުވި އެވެ.
އެފަދަ މައްސަލައެއް އިތުރަށް ތަކުރާރު ނުކުރުމަށް މުޅި ދައުލަތް ޝާމިލުވެގެން ސްޓްރެޓެޖިކަލް އެންވަރަމެންޓަލް އެސެސްމަންޓެއް ހަދަންޖެހޭ ކަމަށް ސުއޫދު ވިދާޅުވި އެވެ.
"އެސެސްމެންޓް ހެދުމުގެ ބޭނުމަކީ މުޅި ދައުލަތުގެ ސަރަހައްދުގައިވާ އެންމެހާ ބިންތަކާއި ފަޅުތަކާއި ދިރުންތައް ދިރާސާކޮށް، އަންނަން އޮތް ޖީލުތަކަށް ދެމި އޮންނާނެ ގޮތަކަށް ހިމާޔަތް ކުރަންޖެހޭ ތަންތަން ފާހަގަކޮށް ކަނޑައަޅުން،" ސުއޫދު ވިދާޅުވި އެވެ.
ގައުމުގެ ތަރައްގީއަށްޓަކައި ބިން ހިއްކާނެ ތަންތަނާއި ތިމާވެއްޓަށް އަސަރު ކުރާނެ ގޮތަށް ދައުލަތުން ހިންގާނެ މަޝްރޫއުތައް ކަނޑައެޅުމަކީ ވެސް އެފަދަ އެސެސްމެންޓެއްގެ ބޭނުން ކަމަށް ފަނޑިޔާރު ވިދާޅުވި އެވެ.
"މިފަދަ ގައުމީ ސްޓްރެޓެޖިކަލް އެންވަރަމެންޓަލް އެސެސްމަންޓެއް ހަދައި ތަންފީޒު ކުރުމަކީ ގާނޫނުއަސާސީގެ 22 ވަނަ މާއްދާއަށް ދިރުން ދިނުމަށްޓަކައި ކުރަންޖެހޭ ކަމެއް ކަމަށް ވެސް ދެކެން،" ސުއޫދު ވިދާޅުވި އެވެ.
އެފަދަ ސިޔާސަތެއް ތަންފީޒު ކުރުމަށް ކުރަންޖެހޭ ދިރާސާތައް ކުރުމާއި ޕްރޮޖެކްޓުތަކުން ތިމާވެއްޓަށް ކުރާ އަސަރު ދަނެގަނެ، ގެއްލުންވާ ނަމަ އެކަމުގެ އަސަރު ކުޑަ ކުރުމަށް ފިޔަވަޅު އަޅާކަން ޔަގީން ކުރުމާއި ޕްރޮޖެކްޓުތައް ނިމުމުން ފެންނަ ބަދަލުތައް ދިރާސާ ކުރުން ގާނޫނުއަސާސީގެ 22 ވަނަ މާއްދާގެ ދަށުން ލާޒިމުވާ ކަމަށް ވެސް ސުއޫދު ވިދާޅުވި އެވެ.
"މިކަން ކުރުމަށްޓަކައި އެންވަރަމަންޓް ޕްރޮޓެކްޝަން އެޖެންސީ މާލީ ގޮތުންނާއި ވަސީލަތްތަކުގެ ގޮތުން ވާޖިބު އަދާ ކުރެވޭ މިންވަރަށް ފުދުންތެރިކުރުމަކީ އަދި އެތަންތަނަށް ބޭނުންވާ ގާނޫނީ މިނިވަންކަމާއި ބާރު ދިނުމަކީ ދައުލަތުން ކުރަންޖެހޭ ކަމެއް ކަމަށް ދެކެން،" ފަނޑިޔާރު ސުއޫދު ވިދާޅުވި އެވެ. "އަދި ދައުލަތުގެ ގްރީން ޓެކްސް މި އެޖެންސީ ރިސޯސްފުލް ކުރުމަށް ބޭނުން ކުރަންޖެހޭ ކަމަށް ވެސް ދެކެން."
އޭގެ އިތުރުނން، އެފަދަ ބޮޑެތި ޕްރޮޖެކްޓުތަކުގެ ކޮންޓްރެކްޓުގައި، ތިމާވެއްޓަށް ގެއްލުން ލިބޭތީ މަސައްކަތް ވަގުތީ ގޮތުން ހުއްޓާލަން ޖެހުނަސް ކޮންޓްރެކްޓަރަށް ގެއްލުމުގެ ބަދަލެއް ދޭން ނުޖެހޭނެކަން ބަޔާން ކުރާ މާއްދާއަކާއި ތިމާވެއްޓާ ބެހޭ އިދާރާތަށް ކޮންޓްރެކްޓަރު އެއްބާރުލުންދޭންޖެހޭ ކަމަށް ބުނާ މާއްދާއެއް ހިމަނަންޖެހޭ ކަމަށް ވެސް ސުއޫދު ވިދާޅުވި އެވެ.
