ގއ. ވިލިނގިލީގައި މީހަކު ބުޅަލަކަށް އަނިޔާކޮށް، އެ ސޮރު އަތުކޮޅަށް ހޫރާލި މައްސަލައެއް ފުލުހުން ތަހުގީގު ކުރަން ފަށައިފި އެވެ.
އެ މައްސަލަ ތަހުގީގު ކުރަމުންދާ ކަމަށް ފުލުހުން ބުނީ އެ ހާދިސާގެ ވީޑިއޯއެއް ސޯޝަލް މީޑިއާގައި އާންމުވި ފަހުންނެވެ. ފުލުހުންގެ ތަރުޖަމާނު އަހުމަދު ޝިފާން ބުނީ އެ މައްސަލަ ބަލަނީ ވިލިނގިލީ ފުލުހުން ކަމަށެވެ.
އާންމު ވީޑިއޯއިން ފުރަތަަ ފެންނަނީ ފިރިހެނަކު ބުޅަލެއްގެ އަތުގައި ހިފައި ހިއްލާލައިގެން އަންނަ ތަނެވެ. ފަހުން އެ ސޮރުގެ ދެ އަތުގައި ހިފައި ވަރަށް އުސް ފާރެއްގެ މަތިން އަނެއްކޮޅަށް ހޫރާލާތަން ފެނެ އެވެ.
ބުޅަލަށް އަނިޔާ ކުރާ މައްސަލަ މިފަހުން ވަރަށް ބޮޑަށް ވަނީ އިތުރުވެފަ އެވެ. މާލެ ތެރޭގައި އުޅޭ ވަގު ބުޅާތައް މަރާ ސީރިއަލް ގާތިލެއް އުޅޭ މައްސަލައެއް 2019 ވަނަ އަހަރު ފެންމަތިވި އެވެ. އޭނާ ބުޅާ މެރީ އެސޮރުމެންގެ ބޮލުގައި އެއްޗަކުން ތަޅައިގެންނެވެ.
އޭގެ ފަހުން މިދިޔަ ނޮވެމްބަރު މަހު މަގުމަތީގައި އޮތް ބުޅަލެއްގެ ބަނޑަށް ވަޅިއެއް ހަރާލި މައްސަލައެއް ވެސް ފެންމަތިވި އެވެ. ވަޅި ހެރީ ބަނޑުބޮޑު ބުޅަލެއްގެ ބަނޑަށެވެ. ފުލުހުން އޭނާ ހައްޔަރު ކުރި އެވެ.
