ސިންގަޕޫރުގެ އާ ބޮޑުވަޒީރަކަށް ލޯވްރެންސް ވޮންގް، 51، މިއަދު މަގާމުގެ ހުވާ ކުރައްވައިފި އެވެ.
ސިންގަޕޫރުގެ ބޮޑުވަޒީރުގެ ނައިބުކަން އަދި ފިނޭންސް މިނިސްޓަރުކަން ފުރުއްވަމުން ގެންދެވި ވޮންގްއަކީ ސިންގަޕޫރަށް މިނިވަންކަން ލިބުނު ފަހުން އެ ގައުމާ ހަވާލުވި ހަތަރު ވަނަ ބޮޑުވަޒީރެވެ.
ސިންގަޕޫރުގެ ބޮޑުވަޒީރުކަމުގެ މަގާމު ހުސްވީ، 20 އަހަރުވަންދެން އެ މަގާމު ފުރުއްވި ލީ ސިއެން ލޫންގް، 72، އިސްތިއުފާ ދެއްވުމުންނެވެ.
ނަމަވެސް ވޮންގްގެ ކެބިނެޓުގައި ސީނިއާ މިނިސްޓަރެއްގެ ގޮތުގައި ލީ ދެމިހުންނަވާނެ އެވެ.
ވޮންގް ވަނީ އޭނާގެ ނައިބަކަށް ޓްރޭޑް މިނިސްޓަރު އައްޔަނު ކުރައްވައި، ގައުމުގެ ހާލަތު އިތުރަށް ވަރުގަދަ ކުރާނެ ކަމަށް ވައުދުވެފަ އެވެ.
ސިންގަޕޫރުގެ އާ ބޮޑުވަޒީރު ވޮންގްއަށް ރާއްޖެއިން ވެސް ވަނީ މަރުހަބާ ކިޔާފަ އެވެ. އަދި ރައީސް ޑރ. މުހައްމަދު މުއިއްޒު ވަނީ ސިންގަޕޫރާ އެކު މަސައްކަތް ކުރެއްވުމަށް ޝައުގުވެރިކަން ފާޅުކުރައްވާފަ އެވެ.
