މުމްބާއި (މެއި 15) - އިންޑިއަން ޕްރިމިއާ ލީގު (އައިޕީއެލް)ގެ މި ސީޒަނުގެ ޕްލޭއޮފް ހަތަރު ޖާގައިގެ ތެރެއިން، ފުރަތަމަ ދެ ޖާގަ، ކަށަވަރުވެފައިވާއިރު، ބާކީ ދެ ޖާގައިގެ ފުރުސަތު ފަސް ޓީމަކަށް އެބައޮތެވެ.

ދިއްލީ ކެޕިޓަލްސް އިން ރޭ 19 ލަނޑުން ލަކްނައު ސުޕަ ޖަޔަންޓްސް ބަލިކުރުމާ އެކު، ރާޖަސްތާން ރޯޔަލްސް އަށް ވަނީ ޕްލޭއޮފްގެ ޖާގައެއް ލިބިފަ އެވެ. ޕްލޭއޮފްގެ ޖާގަ އެންމެ ފުރަތަމަ ހޯދީ، ދެ ފަހަރު ޗެމްޕިއަންކަން ހޯދާފައިވާ ކަލްކަތާ ނައިޓް ރައިޑާސް އަށެވެ.

ތާވަލުގެ ކުރީގައި، ކަލްކަތާ އޮތީ، 13 މެޗުން 19 ޕޮއިންޓާ އެކު އެވެ. ދެ ވަނައިގައި އޮތް ރާޖަސްތާން ރޯޔަލްސް އަށް 12 މެޗުން ވަނީ 16 ޕޮއިންޓް ލިބިފަ އެވެ. ތިން ވަނައިގައި އޮތް، ޗެންނާއި ސުޕަ ކިންގްސް އަށް 13 މެޗުން 14 ޕޮއިންޓް ލިބިފައިވާއިރު، ހަތަރު ވަނައިގައި އޮތް، ސަންރައިޒާސް ހައިދަރުއާބާދަށް ވަނީ 12 މެޗުން 14 ޕޮއިންޓް ލިބިފަ އެވެ. ފަސް ވަނައިގައި އޮތް، ދިއްލީ ކެޕިޓަލްސް އިން ހުރިހާ މެޗެއް ހަމަވެފައިވާއިރު، 14 މެޗުން ހަމަކުރެވުނީ 14 ޕޮއިންޓެވެ.

ހަ ވަނައިގައި އޮތީ، 13 މެޗުން 12 ޕޮއިންޓާ އެކު، ރޯޔަލް ޗެލެންޖާސް ބެންގަލޫރު އެވެ. ހަތް ވަނައިގައި އޮތް ލަކްނައު އަށް 13 މެޗުން 12 ޕޮއިންޓް ލިބިފައިވެ އެވެ.

އެންމެ ފުލުގައި އޮތް ތިން ޓީމު ވަނީ ކަޓައިފަ އެވެ. އެއީ، އަށް ވަނައިގައި 13 މެޗުން 11 ޕޮއިންޓާ އެކު އޮތް ގުޖުރާތު ޓައިޓަންސް އާއި 13 މެޗުން އަށް ޕޮއިންޓާ އެކު، ނުވަ ވަނައިގައި އޮތް މުމްބައި އިންޑިއަންސް އަދި އެންމެ ފުލުގައި އޮތް ޕަންޖާބް ކިންގްސް އެވެ. ޕަންޖާބަށް 13 މެޗުން ލިބުނީ އަށް ޕޮއިންޓެވެ.

އައިޕީއެލްގެ ހަ މެޗާ ކުރިމަތިލާއިރު، ޕްލޭއޮފްގެ ފަހު ދެ ޖާގައިގެ ފުރުސަތު އޮތީ، ޗެންނާއި، ހައިދަރުއާބާދު، ދިއްލީ، ބެންގަލޫރު އަދި ލަކްނައު އެވެ.

ޕްލޭއޮފްގެ ބާކީ ދެ ޖާގަ އަށް ޓީމުތަކަށް ފުރުސަތު އޮތް ގޮތް:

ސަންރައިޒާސް ހައިދަރުއާބާދު

ސަންރައިޒާސް ހައިދަރުއާބާދަށް ބާކީ އޮތީ ދެ މެޗެެވެ. އެއީ މުބާރާތުން ކަޓާފައިވާ ގުޖުރާތު ޓައިޓަންސް އާއި ޕަންޖާބް ކިންގްސްއާ ދެކޮޅަށެެވެ. ދެ މެޗުން ވެސް ބޮޑު ތަފާތަކުން ބަލިވެގެން ނޫން ގޮތަކަށް ހައިދަރުއާބާދު ނުކަޓާނެ އެވެ. އެ ދެ މެޗުން، މޮޅުވެއްޖެނަމަ، ހައިދަރުއާބާދަށް ގަދަ ދެ ޓީމުގެ ތެރޭގައި ހިމެނުމުގެ ފުރުސަތު ވެސް އެބައޮތެވެ.

ޗެންނާއި ސުޕަ ކިންގްސް

ފަސް ފަަހަރު ޗެމްޕިއަންކަން ހޯދާފައިވާ، ޗެންނާއި ސުޕަ ކިންގްސް އަށް ވެސް އަމިއްލަަ ބާރުގައި ޕްލޭއޮފަށް ދިއުމުގެ ފުރުސަތު އެބައޮތެވެ. އެއީ ފަހު މެޗުގައި، ރޯޔަލް ޗެލެންޖާސް ބެންގަލޫރުގެ މައްޗަށް ކުރިހޯދައިގެންނެވެ. ބެންގަލޫރު އަތުން، ބަލިވިޔަސް، ނަތީޖާ ނުުކުންނަ ގޮތަކުން ވެސް ޗެންނާއި އަށް ޕްލޭއޮފްގެ ފުރުސަތު ލިބުމުގެ ޖާގަ އެބައޮތެވެ.

ރޯޔަލް ޗެލެންޖާސް ބެންގަލޫރު

މި ފަހަރުގެ އައިޕީއެލް ސީޒަނުގައި ރޯޔަލް ޗެލެންޖާސް ބެންގަލޫރު ކުޅުނު ފުރަތަމަ މެޗުތަކުގައި ނަތީޖާތަށް ނެރެން ދަތިވި ނަމަވެސް، އެ ޓީމުން ވަނީ އެންމެ ފަހުން ކުޅުނު ފަސް މެޗުން ވެސް މޮޅުވެފަ އެވެ. ބެންގަލޫރަށް ޕްލޭއޮފްގެ ފުރުސަތު އޮތީ، ފަހު މެޗުގައި ޗެންނާއި އަތުން ރަނގަޅު ނަތީޖާ އަކުން މޮޅުވެގެންނެވެ. މި މެޗުން ބެންގަލޫރު ބަލިވެގެން އެ ޓީމަށް ކުރިއަށްދެވޭނެ އެއްވެސް ފުރުސަތެއް ނެތެވެ.

ދިއްލީ ކެޕިޓަލްސް

ދިއްލީ ކެޕިޓަލްސް އަކީ މި ފަހަރުގެ ސީޒަނުގެ ލީގު ބުރުގެ ހުރިހާ މެޗެއް ހަމަކުރި ފުރަތަމަ ޓީމެވެ. ދިއްލީ އަށް ކުރިއަށް ދިއުމުގެ އަމިއްލަ ބާރެއް ނެތެވެ. އެ ޓީމަށް ޕްލޭއޮފްގެ ކިރިޔާ ވެސް ފުރުސަތެއް އޮތީ، ސަންރައިޒާސް ހައިދަރުއާބާދު ބާކީ އޮތް ދެ މެޗުން ފަރަގު ބޮޑުކޮށް ބަލިވެގެންނެވެ.

ލަކްނައު ސުޕަ ޖަޔަންޓްސް

ލަކްނައު ސުޕަ ޖަޔަންޓްސް އަށް ޕްލޭއޮފްގެ ޖާގަ އޮތީ ވަރަށް ހަނިކޮށެވެ. އެ ޓީމަށް ކިރިޔާ ވެސް ފުރުސަތެއް އޮތީ، ފަހު މެޗުގައި، މުމްބާއި އިންޑިއަންސް އަތުން މޮޅުވުމަށް ފަހު، ސަންރައިޒާސް ހައިދަރުއާބާދުގެ ދެ މެޗާއި، ޗެންނާއި ސުޕަ ކިންގްސް އާއި ރޯޔަލް ޗެލެންޖާސް ބެންގަލޫރު ބައްދަލުކުރާ މެޗުގެ ނަތީޖާ އަށް ބަލައިގެންނެވެ. ލަކްނައު އަށް އޮތް އެންމެ ބޮޑު ގެއްލުމަކީ، ނެގެޓިވް ނެޓް ރަން ރޭޓެއް އޮތުމެވެ.