ސަަރުކާރުން އަލަށް އިމާރާތް ކުރާނެ 50 ރަށު ކައުންސިލް މި މަހުގެ ތެރޭގަ ކަނޑައެޅޭނެ ކަމަށް ލޯކަލް ގަވަމަންޓް މިނިސްޓަރު އަދާމް ޝަރީފް އުމަރު ވިދާޅުވެއްޖެ އެވެ.
މިނިސްޓަރު އާދަމް ޝަރީފް މިއަދު ވިދާޅުވީ ކައުންސިލް އިމާރާތް އަޅާނެ ރަށްތައް ކަނޑައެޅުމުގެ މަސައްކަތް އަދި ނުނިމޭ ކަމަށާއި މި މަހުގެ ތެރޭގައި ރަށްތައް ކަނޑައެޅޭނެ ކަމަށެވެ.
ކުރިން ސަރުކާރުން ބުނެފައިވާ ގޮތުގަ އިމާރާތް ކުރާ 50 ކައުންސިލް ހޮވާނީ ރައްޔިތުންގެ ހިޔާލާ މަޝްވަރާގެ ދަށުން އެކުލަވައިލާ އުސޫލެއްގެ ދަށުންނެވެ.
މިދިޔަ މަހު ހދ. ހަނިމާދޫގަ ކުރިއަށް ގެންދިޔަ "ފަނޯއްލަ" ދަރުބާރު 2024 ގައި އާދަމް ޝަރީފް ވިދާޅުވީ އަތޮޅު ތެރޭގައި ސަރުކާރުން އަޅައިދޭން ނިންމާފައިވާ 50 ކައުންސިލަށް ބޭނުންވާ ވަސީލަތްތައް ޗައިނާ ސަރުކާރުން ލިބޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ކަމަށެވެ.
އެއާއެކު މި އަހަރު ތެރޭގައި އެ 50 ކައުންސިލްގެ އަމަލީ މަސައްކަތް ފެށިގެންދާނެ ކަމުގެ އުންމީދު އެބަ އޮތް ކަމަށާއި ކުރިއަށް އޮތްތަނުގަ އެހެން ކައުންސިލްތަކަށް ވެސް ރަނގަޅު ގޮތްތައް ފަހިކުރާނެ ކަމަށް އޭނާ ވިދާޅުވި އެވެ.
ރާއްޖޭގެ 50 ރަށެއްގެ ކައުންސިލް އިމާރާތް މިއަހަރު ސަރުކާރުން އަޅަައިދޭން ނިންމާފައިވާކަން ރައީސް ޑރ. މުހައްމަދު މުއިއްޒު ވިދާޅުވީ ފެބްރުއަރީ 26، ގަ އެވެ.
