ޕެރިސް (މެއި 14) - މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ ޑިފެންޑަރު، ރަފައެލް ވަރާން، އެ ޓީމުގެ ކޮންޓްރެކްޓް އާ ނުކުރާނެ ކަމަށް އެ ކްލަބުން ހާމަކޮށްފި އެވެ.
ވަރާން، 31، ޔުނައިޓެޑްގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އެކަމަކު، އެ ކްލަބުން އާ އެއްބަސްވުމެއް ދިނުމުގެ ކަންކަން މަޑުޖައްސާލާފައި އޮތުމުން ވަރާން ވަނީ އެހެން ކްލަބްތަކާ ވެސް މަޝްވަރާކޮށްފަ އެވެ. އޭގެ ތެރޭގައި، ބަޔާން މިއުނިކް އާއި އިޓަލީގެ ބައެއް ޓީމުތައް ހިމެނެ އެވެ.
ޔުނައިޓެޑުން ނެރުނު ބަޔާނެއް މެދުވެރިކޮށް، އެ ކްލަބުން ވަނީ ވަރާން ކޮށްދިން ހިދުމަތަށް ޝުކުރުއަދާކޮށްފަ އެވެ.
ރެއާލް ދޫކޮށް، 2021 ވަނަ އަހަރު، ވަރާން، ޔުނައިޓެޑަށް ބަދަލުވީ 43 މިލިއަން ޑޮލަރުގެ ފީ އަކަށެވެ. ޔުނައިޓެޑާ އެކު މިދިޔަ ސީޒަނުގެ ލީގު ކަޕް ކާމިޔާބުކުރި ވަރާން ވަނީ އެ ޓީމަށް 93 މެޗު ކުޅެދީފަ އެވެ.
ތަޖުރިބާކާރު ޑިފެންޑަރު، ވަރާން، ރެއާލާ އެކު، ތިން ސްޕެނިޝް ލީގާއި ހަތަރު ޗެމްޕިއަންސް ލީގު ކާމިޔާބުކޮށްފައި، ޔުނައިޓެޑަށް ބަދަލުވިއިރު، އެ ޓީމުގެ ކޯޗަކީ އޮލެ ގުނަ ސޯލްޝެއާ އެވެ. ޔުނައިޓެޑްގެ ކޯޗުކަމާ އެރިކް ޓެން ހާގް ހަވާލުވި ފަހުން، ވަރާން އަށް އަނިޔާގެ ސަބަބުން ގިނަ މެޗުތަކެއް ވަނީ ގެއްލިފަ އެވެ.
ފްރާންސުން 2018 ވަނަ އަހަރުގެ ވޯލްޑް ކަޕް ކާމިޔާބުކުރި ޓީމުގައި އިސް ދައުރެއް އަދާކުރި ވަރާން ގައުމީ ޓީމަށް ކުޅުން ހުއްޓާލީ މިދިޔަ އަހަރު ފެބްރުއަރީ މަހުގަ އެވެ.
ވަރާން ހޯދަން ސައުދީ އަރަބިއްޔާގެ ކްލަބްތަކުން ވެސް މަސައްކަތްކުރެ އެވެ.
