ލޯކަލް ކައުންސިލުތަކުގެ ހިންގުން ހަރުދަނާކުރުމަށްޓަކައި މޯލްޑިވްސް ލޯކަލް ކައުންސިލް އެސޯސިއޭޝަން (އެމްއެލްސީއޭ) އުފައްދައި، އެ ޖަމިއްޔާގެ މެމްބަރަކަށް ވުމުގެ ފުރުސަތު ލޯކަލް ކައުންސިލުތަކަށް ހުޅުވާލައިފި އެވެ.
އެމްއެލްސީއޭ އުފައްދައި ރަޖިސްޓްރީ ކުރީ މިދިޔަ އޭޕްރީލް 29، ގަ އެވެ. އެ ޖަމިއްޔާ އުފެއްދުމުގެ މައިގަނޑު މަގުސަދަކީ ކައުންސިލުތަކުގެ ހިންގުން ހަރުދަނާކުރުމުގެ އިތުރުން، ފަންނީ ގާބިލުކަން އިތުރުކޮށް ކައުންސިލުތަކުގެ ހައްގުގައި ވަކާލާތުކުރާނެ ޖަމިއްޔާއަކަށް ވުމެވެ.
ރާއްޖޭގެ ލޯކަލް ކައުންސިލުތަކުގެ މެދުގައި އޮންނަ ގުޅުން ހަރުދަނާކުރުމާއި، ދިމާވާ ގޮންޖެހުންތައް މަޝްވަރާކޮށް، ކައުންސިލުތަކުގެ މުވައްޒަފުންނަށް ރާއްޖެއިން ބޭރުން ތަމްރީނާއި ތައުލީމު ހާސިލުކުރުމުގެ ފުރުސަތު ހޯދައިދިނުމަކީ ވެސް އެމްއެލްސީއޭ އުފެއްދުމުގެ ބޭނުމެވެ.
އެމްއެލްސީއޭގެ އާއްމު މެމްބަރަކަށް ވެވޭނީ ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން އުފައްދާފައިވާ ސިޓީ ކައުންސިލުތަކާއި، އަތޮޅު ކައުންސިލުތަކުގެ އިތުރުން، ރަށު ކައުންސިލުތަކަށެވެ.
ކައުންސިލުތަކުގެ ފަރާތުން އެމްއެލްސީއޭގެ ބައްދަލުވުންތަކުގައި ބައިވެރިވުމުގެ ފުރުސަތު ލިބޭނީ އެކަމަށް އައްޔަނުކުރެވޭ މަންދޫބަށް ކަމަށް އެ އެސޯސިއޭޝަނުން ނެރެފައިވާ އިއުލާނުގައި ބުނެފައިވެ އެވެ.
މި ޖަމިއްޔާގެ މެމްބަރަކަށް ވާން ބޭނުންވާ ކައުންސިލުތަކުން އެގޮތަށް ނިންމައި ގަރާރެއް ފާސްކުރަންޖެހެ އެވެ. މި ގަރާރުގައި މެމްބަރަކަށްވުމަށް އެއްބަސްވެ، ޗަންދާ ދެއްކުމަށް އެއްބަސްވުމުގެ އިތުރުން، ކަނޑައަޅާފައިވާ މަންދޫބުގެ މައުލޫމާތު ހިމަނަންޖެހޭނެ އެވެ. އަދި ގަރާރުގެ ކޮޕީއެއް މެއިލް ކުރަން ޖެހި އެވެ.
އެމްއެލްސީއޭގެ މެމްބަރުން ދައްކަންޖެހޭ ޗަންދާ
- ސިޓީ ނުވަތަ އަތޮޅު ކައުންސިލެއް ނަމަ، ކޮންމެ މީލާދީ މަހަކަށް 5،000ރ.
- އާބާދީ 3،000 އަށް ވުރެ ބޮޑު ރަށު ކައުންސިލެއް ނަމަ، ކޮންމެ މީލާދީ މަހަކަށް 1،000ރ.
- އާބާދީ 3،000 އަށް ވުރެ ކުޑަ ރަށު ކައުންސިލެއް ނަމަ، ކޮންމެ މީލާދީ މަހަކަށް 500ރ.
އެމްއެލްސީއޭގެ ހިންގާ ކޮމިޓީގައި ހިމެނޭނީ އާންމު މެމްބަރުންގެ ތެރެއިން އިންތިހާބުކުރެވޭ ނުވަ މެމްބަރުންނެވެ. އޭގެ ތެރޭގައި:
- ސިޓީ ކައުންސިލުތަކުން ދެ މެމްބަރުން
- އަތޮޅު ކައުންސިލުތަކުން ތިން މެމްބަރުން
- ރަށު ކައުންސިލުތަކުން ތިން މެމްބަރުން
- ޖަމިއްޔާގެ ޗެއާޕާސަން
ހިންގާކޮމިޓީގެ މަގާމުތަކަށް ކުރިމަތިލުމުގެ ފުރުސަތު މި މަހުގެ 27، ގައި ހުޅުވާލާނެ އެވެ. އެމްއެލްސީއޭގެ ހުރިހާ މެމްބަރުންނަށް މައުލޫމާތު ފޯރުކޮށްދީ، ސޯޝަލް މީޑިއާގައި އެ މަގާމުތަކުގެ ތަފްސީލު އިއުލާނުކުރާނެކަމަށް އެ ޖަމިއްޔާއިން ބުނެ އެވެ.
އެމްއެލްސީއޭގެ މުއައްސިސުންނަކީ ހއ. އަތޮޅު ކައުންސިލު، ށ. އަތޮޅު ކައުންސިލު، ބ. އަތޮޅު ކައުންސިލު އަދި ފުވައްމުލަކު ސިޓީ ކައުންސިލެވެ. މީގެ އިތުރުން އެމްއެލްސީއޭ އެކުލަވާލުމުގައި ހދ. ކުޅުދުއްފުށި ސިޓީ ކައުންސިލާއި، ނ. އަދި ލ. އަތޮޅު ކައުންސިލުން އިސްކޮށް ހަރަކާތްތެރިވީކަމަށް އެ ޖަމިއްޔާއިން ބުންޏެވެ.
