ލާމަރުކަޒީ ގާނޫނަށް އިސްލާހު ގެނައުމަށް ބޭނުންވާ ދިރާސާ ހެދުމުގެ މަސައްކަތް މި މަހު ގައުމީ ޔުނިވާސިޓީން ފައްޓާނެ ކަމަށް، ސިޓީތަކާއި އިދާރީ ދާއިރާތައް ހިންގުމާބެހޭ މިނިސްޓަރު އާދަމް ޝަރީފު ވިދާޅުވެއްޖެ އެވެ.
ދައުލަތުގެ ޕީއެސްއެމްގެ "ރާއްޖެމިއަދު" ޕްރޮގްރާމުގައި މައުލޫމާތު ދެއްވަމުން މިނިސްޓަރު ވިދާޅުވީ، ދުނިޔޭގެ ގިނަ ގައުމުތަކުގައި ގާނޫނުތައް ހަދަނީ ވަރަށް ބޮޑަށް ދިރާސާތައް ކުރެވި، އެކަންކަމުން ނިކުންނާނެ ނަތީޖާ ދެނެގަތުމަށް ފަހު ކަމަށެވެ.
އެގޮތުން ދިރާސާ ކުރިއަށް ގެންދާނީ މިނިވަންކަމާއިއެކު، އިލްމީ ދިރާސާއެއްގެ ގޮތުގައި ކަމަށް މިނިސްޓަރު ވިދާޅުވި އެވެ. އަދި މި ދިރާސާގެ ޒަރިއްޔާއިން ލާމަރުކަޒީ ގާނޫނުގައި މިހާރު ހުރި ކަންކަމާއި މެދު ކައުންސިލްތަކުން ދެކޭގޮތުގެ އިތުރުން، ކަންކަން ތަންފީޒުކުރުމަށް ހުރި ގޮންޖެހުންތައް އަދި ލާމަރުކަޒީ ނިޒާމާއި ގުޅިގެން އާންމުންގެ ހިޔާލުވެސް ހޯދާނެ ކަން މިނިސްޓަރު ފާހަގަކުރެއްވި އެވެ.
"ރަށްރަށް ކުރިން ހިންގަމުން ދިޔައީ ކުޑަކަތީބަކާއި ބޮޑުކަތީބަކާއެކު. އެހެން އޮތް ވެރިކަމެއް އޮވެފައި، ކުއްލިއަކަށް ފަސް ކައުންސިލަރުން ނުވަތަ ހަތް ކައުންސިލަރުންނާ އެކު މަސައްކަތް ފެށީމާ ހިދުމަތްތައް ވަކި އަވަހަށް ފަހިވެއްޖެތޯ، މީގެ ސަބަބުން އައީ ކޮން ބަދަލެއްތޯ. މިކަންކަމަށް ރައްޔިތުންނާ ސުވާލުކުރަން ބޭނުންވޭ،" މިނިސްޓަރު އާދަމް ޝަރީފު ވިދާޅުވި އެވެ.
ލާމަރުކަޒީ ނިޒާމްގެ ތެރެއިން ކައުންސިލުތައް ބާރުވެރިކުރުމަށް ސަރުކާރުން ކުރަމުން އަންނަ މަސައްކަތްތަކުގެ ތެރޭގައި ރަށްރަށުގައި ހިންގާ ގެސްޓުހައުސް ތަކަށް ލޯކަލް ޓޫރިޒަމްގެ ތެރެއިން ލިބޭ ޓީޖީއެސްޓީން ވަކި ޕަސަންޓެއް ކައުންސިލްތަކުގެ އާމްދަނީއަށް އިތުރު ކުރުމަށް ލާމަރުކަޒީ ގާނޫނު އަދި ޓޫރިޒަމް ގާނޫނަށް އިސްލާހު ގެނައުން ހިމެނެ އެވެ.
މީގެ އިތުރުން ފަޅުރަށްތައް ކުއްޔަށް ދޫކުރާ މުއްދަތު 25 އަހަރަށް އިތުރުކޮށްދިނުމާއި، ކައުންސިލުތަކުގެ ބަޖެޓު އިތުރުކުރުމާއެކު، ކައުންސިލުތަކަށް އޮފީސް އިމާރާތްތައް އަޅައިދިނުމަކީ ވެސް މި ސަރުކާރުން ކައުންސިލުތަށް ބާރުވެރިކުރުމަށް ކުރަން ނިންމާފައިވާ ކަންކަމެވެ.
