ޗެންނާއި، އިންޑިއާ (އޭޕްރީލް 9) - އިންޑިއަން ޕްރިމިއާ ލީގުގައި ޗެންނާއި ސުޕަ ކިންގްސް (ސީއެސްކޭ) އިން ހަތް ވިކެޓުން ކަލްކަތާ ނައިޓް ރައިޑާސް (ކޭކޭއާރް) ބަލިކޮށް ހާސްކަން ފިލުވާލައިފި އެވެ.
މި މެޗަށް ނުކުތްއިރު، ޗެންނާއި ވަނީ އެންމެ ފަހުން ކުޅުނު ދެ މެޗުން ބަލިވެފަ އެވެ. އަނެއްކޮޅުން، ކަލްކަތާ އޮތީ މި ފަހަރުގެ ސީޒަނުގައި ކުޅުނު ތިން މެޗުން ވެސް މޮޅުވެ ރަނގަޅު ފޯމެއްގަ އެވެ. އެކަމަކު، އެންމެ ފަހުގެ ޗެމްޕިއަން، ޗެންނާއި އިން ވަނީ ރަނގަޅު ފޯމެއްގައި ކުޅެ މެޗުން މޮޅުވެފަ އެވެ.
ޗިދަމްބަރަމް ސްޓޭޑިއަމްގައި ރޭ ކުޅުނު މެޗުގައި ޓޮސް ދިމާވުމުން ޗެންނާއި އިން ނިންމީ، ހޮވާށެވެ. ކަލްކަތާ އިން ކުޅެން އަރައި، 20 އޯވަރުގެ ތެރޭގައި ނުވަ ކުޅުންތެރިން ނުބައިވެގެން ހެދުނީ 137 ލަނޑެވެ. މިއީ، އިނިންސްއެއްގައި މި ފަހަރުގެ މުބާރާތުގައި ކަލްކަތާގެ އެންމެ ދަށް ސްކޯ އެވެ. ޗެންނާއި ޓީމަށް އެންމެ ރަނގަޅު ކުޅުމެއް ދައްކައިދިނީ ޓީމުގެ ކެޕްޓަން، ޝްރޭޔަސް އައްޔަރު އެވެ. އޭނާ ވަނީ 32 ބޯޅައިން 34 ލަނޑު ހަދައިފަ އެވެ. މުބާރާތުގައި ރަނގަޅު ކުޅުމެއް ދައްކަމުން އައި، ޗެންނާއިގެ ތަޖުރިބާކާރު ކުޅުންތެރިޔާ، ސުނިލް ނާރައިން އަށް ހެދުނީ 20 ބޯޅައިން 27 ލަނޑެވެ.
މި އިނިންގްސްގައި ޗެންނާއި ޓީމުގެ، ތުޝާރު ދޭޝްޕާންޑޭ އާއި ރަވިންދުރަ ޖަދޭޖާ ކޮންމެ ކުޅުންތެރިއަކު ތިން ވިކެޓް ނެގި އެވެ.
ޖަވާބުގައި ކުޅެން އަރައި ޗެންނާއި އިން ވަނީ 17.4 އޯވަރުގެ ތެރޭގައި ތިން ކުޅުންތެރިން ނުބައިވެގެން 141 ލަނޑު ހަަދައި، މެޗުން މޮޅުވެފަ އެވެ. މި މެޗުގައި، ޗެންނާއިގެ ތަރިއަކީ ނުބައިނުވެ 58 ބޯޅައިން 67 ލަނޑު ހެދި ރުތުރާޖު ގައިކްވާޑް އެވެ.
މި އިނިންގްސްގައި ކަލްކަތާގެ ވޭބަވް އަރޯޅާ ދެ ވިކެޓް ނެގި އެވެ.
މި މޮޅާ އެކު، ޗެންނާއި އިން ވަނީ ފަސް މެޗު ކުޅެގެން، ތިން ވަަނަ މޮޅު ހޯދައި، އައިޕީއެލް ތާވަލުގެ ހަތަރަކަށް ޖެހިލައިފަ އެވެ. ކަލްކަތާ އޮތީ ހަތަރު މެޗުގެ ތެރެެއިން ތިން މެޗުން މޮޅުވެ، ދެ ވަނައިގަ އެވެ. އެއް ވަނައިގައި އޮތީ ހަތަރު މެޗުން ވެސް މޮޅުވި، ރާޖަސްތާން ރޯޔަލްސް އެވެ.
އައިޕީއެލްގައި މިރޭ ކުޅޭ މެޗުގައި، ޕަންޖާބް ކިންގްސް ބައްދަލުކުރާނީ ސަންރައިޒާސް ހައިދަރުއާބާދާ އެވެ.
