އިސްތަންބޫލް (އޭޕްރީލް 8) - ތުރުކީގެ ސުޕަ ކަޕްގައި ރޭ ގަލަޓަސަރާއީއާ ދެކޮޅަށް ފެނަބަޗޭ އިން 19 އަހަރުން ދަށުގެ ޓީމު ނެރެ، މެޗުގެ ފުރަތަމަ މިނިޓުގައި ގަލަޓަސަރާއީ އިން ލަނޑެއް ޖެހުމާއެކު ޓީމު ދަނޑުން ބާލައިފިއެވެ.
މި މެޗުގައި އިތުރަށް ކުޅުމަށް ފެނަބާޗޭ އިން ބޭނުން ނުވުމުން ގަލަޓަސަރާއީ އަށް ވަނީ މެޗު ލިބިފައެވެ.
ފެނަބާޗޭ އިން 19 އަހަރުން ދަށުގެ ޓީމު ސުޕަ ކަޕަށް ނެރުނީ މެޗު ފަސްކޮށްދިނުމަށް އެ ޓީމުން އެދުމުން އެކަމަށް ތުރުކީގެ ފުޓްބޯލް ފެޑަރޭޝަނުން އެއްބަސްނުވުމުންނެވެ. މި މެޗު ފަސްކޮށްދިނުމަށް ފެނަބާޗޭ އިން އެދުނީ ޔޫރޮޕާ ލީގުގެ ކުއާޓާ ފައިނަލްގައި ބުރާސްފަތި ދުވަހުގެ ރޭ އޮލިމްޕިއާކޮސްއާ ދެކޮޅަށް އެ ޓީމު ކުޅެންޖެހޭތީއެވެ.
މި ނިންމުމާމެދު ހިތްހަމަނުޖެހިގެން، ރޭ ކުޅުނު ސުޕަ ކަޕް މެޗަށް ފެނަބާޗޭ އިން ނެރުނީ 19 އަހަރުން ދަށުގެ ޓީމެވެ. އަދި މެޗު ފެށުނުތާ މިނިޓެއްގެ ތެރޭގައި ގަލަޓަސާރީއގެ ފޯވަޑް މައުރޯ އިކާޑީ އެ ޓީމަށް ލީޑު ހޯދައިދިނުމާއެކު، ފެނަބާޗޭ އިން ވަނީ ޓީމު ދަނޑުން ބާލުވައިފައެވެ.
އިތުރަށް މެޗު ކުރިއަށް ގެންދިއުމަށް ފެނަބާޗޭ އިން އެއްބަސްނުވުމުން، މެޗު ވަނީ ގަލަޓަސަރާއީ އަށް ދީފައެވެ. މި ނިންމުމާއެކު ގަލަޓަސަރާއީގެ ކުޅުންތެރިން ވަނީ އުފާފާޅުކުރަން ފަށައިފައެވެ.
މެޗަށްފަހު ފެނަބާޗޭ އިން ނެރުނު ބަޔާނެއްގައި ބުނީ މި މެޗަށް ނުކުތީ މެޗުން މޮޅުވާކަށް ނޫން ކަމަށެވެ. އަދި މިއީ ތުރުކީގެ ފުޓްބޯޅައިގެ "ހަގީގީ ހާލަތު" ފެނުނު މެޗެއް ކަމަށެވެ.
ތުރުކީގެ ރެފްރީން ބޭއިންސާފުވެރިކަމަށް ބުނެ، މި މެޗަށް ތުރުކީގެ ރެފްރީން ބޭނުންނުކުރުމަށްވެސް ފެނަބާޗޭ އިން ވަނީ ގޮވާލައިފައެވެ. -
