ރަޝިއާގެ ދެ ސިޓީއެއްގައި ފެންބޮޑުވެ، ގިނަ ބަޔަކު ރައްކާތެރި ސަރަހައްދުތަކަށް ބަދަލުކޮށްފި އެވެ.
ރަޝިއާގައި ފެންބޮޑުވެފައި ވަނީ އުރަލް ކޯރުގެ ފެން ހުރި މިންވަރު އުފުލި، ކޯރު ބަންޑުންވުން ހުއްޓުވުމަށް ހަދާފައިވާ "ޑޭމް" ތަކުގެ މަތިން ފެން އަރައިގެންނެވެ.
ރިޕޯޓްތައް ބުނާ ގޮތުން އެ ޑޭމް ހަދާފައި ވަނީ 5.5 މީޓަރުގެ ފެނުގެ އުސްމިނަށެވެ. ނަމަވެސް ފެނުގެ އުސްމިން ވަނީ 9.9 މީޓަރަށް އުފުލުނެވެ.
ފެންބޮޑުވުމާ ގުޅިގެން 6،000 އަށްވުރެ ގިނަ ގެތަކުން މީހުން ރައްކާތެރި ހިސާބުތަކަށް ބަދަލު ކޮށްފައިވާއިރު، ރަޝިއާގެ ސަރުކާރުން އަންނަނީ އެހީތެރިކަން ފޯރުކޮށްދެމުންނެވެ.
ރަޝިއާގެ އެހެން ބައެއް ސަރަހައްދުތަކުގައި ވެސް ފެންބޮޑުވެދާނެ ކަމަށް އިންޒާރު ވަނީ ނެރެފަ އެވެ. އަދި ރައްކާތެރިވުމުގެ ފިޔަވަޅުތައް އެޅުމަށް ވަނީ އިލްތިމާސް ކޮށްފަ އެވެ.
