ބެންގަލޫރު (އޭޕްރީލް 3) - ލަކްނައު ސުޕަ ޖަޔަންޓްސް އަތުން 28 ލަނޑުން ބަލިވެ، އިންޑިއަން ޕްރިމިއާ ލީގުގައި ރޯޔަލް ޗެލެންޖާސް ބެންގަލޫރު (އާރްސީބީ) އަމިއްލަ ދަނޑުގައި ޖެހިޖެހިގެން ދެ ވަނަ ނާކާމިޔާބީއާ ކުރިމަތިލާން ޖެހިއްޖެ އެވެ.
ބެންގަލޫރު މި ފަހަރުގެ މުބާރާތް ފަށަން ޖެހުނީ ޗެންނާއީ ސުޕަ ކިންގްސް (ސީއެސްކޭ) ދަނޑުގައި އެ ޓީމު އަތުން ބަލިވެގެންނެވެ. ދެ ވަނަ މެޗުގައި ބެންގަލޫރުން ވަނީ ޕަންޖާބް ކިންގްސް ބަލިކޮށްފަ އެވެ. އެކަމަކު، ދެން ކުޅުނު ދެ މެޗުން އަމިއްލަ ދަނޑު، ޗިންނަސްވާމީ ސްޓޭޑިއަމްގައި މި ވަނީ، ކޮލްކަތާ ނައިޓް ރައިޑާސް އާއި ލަކްނައު ސުޕަ ޖަޔަންޓްސް އަތުން ބަލިވެފަ އެވެ.
ފުރަތަމަ ހަތަރު މެޗުގެ ތެރެއިން ބެންގަލޫރަށް ލިބުނީ އެންމެ މޮޅެކެވެ. ދިހަ ޓީމު ވާދަކުރާ އައިޕީއެލްގައި އެ ޓީމު އޮތީ ނުވަ ވަނައިގަ އެވެ. ރޭގެ މެޗަކީ، ޗިންނަސްވާމީ ސްޓޭޑިއަމްގައި ބެންގަލޫރުގެ ތަރި، ވިރާތު ކޯލީގެ 100 ވަނަ މެޗެވެ. ވިރާތަކީ އެއް ސްޓޭޑިއަމެއްގައި އެ އަދަދަށް ޓީ20 މެޗު ކުޅުނު އިންޑިއާ އަށް ނިސްބަތްވާ ފުރަތަމަ ކުޅުންތެރިޔާ އެވެ.
ރޭގެ މެޗުގައި ޓޮސް ދިމާވުމުން، ބެންގަލޫރުން ނިންމީ ފީލްޑް ކުރާށެވެ. މި އިނިންގްސްގައި ކުޅެން އަރައި، ލަކްނައު އިން ވަނީ 20 އޯވަރުގެ ތެރޭގައި، ފަސް ކުޅުންތެރިން ނުބައިވެގެން 181 ލަނޑު އެއްކޮށްފަ އެވެ. ލަކްނައު އަށް އެންމެ ރަނގަޅު ކުޅުމެއް ދެއްކީ، 56 ބޯޅައިން 81 ލަނޑު ހެދި ކުއިންޓަން ޑި ކޮކް އާއި ނުބައިނުވެ، 21 ބޯޅައިން 40 ލަނޑު އެއްކުރި، ނިކޮލަސް ޕޫރަން އެވެ. އެ ޓީމުގެ ކެޕްޓަން، ކޭއެލް ރާހުލް ނުބައިވީ، 14 ބޯޅައިން 20 ލަނޑު ހަދާފައިވަނިކޮށެވެ.
މި އިނިންގްސްގައި ބެންގަލޫރުގެ ގްލެން މެކްސްވެލް ދެ ވިކެޓް ނެގި އެވެ.
ޖަވާބުގައި ކުޅެން އަރައި، ބެންގަލޫރަށް 19.4 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން އެއްކުރެވުނީ 153 ލަނޑެވެ. ކުރިން ދެ މެޗުގައި، ހާފް ސެންޗަރީ ހެދި ވިރާތު އަށް ރޭގެ މެޗުގައި، އެއްކުރެވުނީ 16 ބޯޅައިން 22 ލަނޑެވެ. ބެންގަލޫރަށް އެންމެ ރަނގަޅު ކުޅުމެއް ދައްކައިިދިން މަހިޕާލް ލޮމްރޯރް ވަނީ 13 ބޯޅައިން 33 ލަނޑު އެއްކޮށްފަ އެވެ.
އައިޕީއެލްގައި މިރޭ ކުޅޭނީ ކަލްކަތާ އާއި ދިއްލީ އެވެ.
