އިސްތަންބޫލް (އޭޕްރީލް 3) - ތުރުކީގެ ސުޕަ ލީގުން ވަކިވުމާމެދު ގޮތެއް ނިންމުމަށް ފެނަބާޗޭގެ މެމްބަރުންގެ މެދުގައި ނެގި ވޯޓުން އެ ކްލަބުގެ މެމްބަރުން ނިންމީ ލީގުން ވަކިނުވެ، ލީގުގައި ދެމިތިބުމަށް ނިންމައިފި އެވެ.
ތުރުކީ ސުޕަ ލީގުން ވަކިވުމަށް ފެނަބާޗޭ އިން ވިސްނީ މިދިޔަ މަހު ލީގުގައި ޓްރަބްޒޮންސްޕޯއާ ދެކޮޅަށް ކުޅުނު މެޗުގައި ފެނަބާޗޭގެ ކުޅުންތެރިންނަށް ޓްރަބްޒޮންސްޕޯގެ ސަޕޯޓަރުން ހަމަލާ ދިނުމުންނެވެ.
ލީގުން ވަކިވުމާމެދު ވިސްނަމުންދާ ކަމަށް އެ ހަމަލާއަށް ފަހު ފެނަބާޗޭ އިން ވަނީ ބުނެފަ އެވެ.
އެކަމަކު ފެނަބާޗޭ އިން އިއްޔެ ބޭއްވި އެކްސްޓްރާ އޯޑިނަރީ ބައްދަލުުވުމުގައި އެ ކްލަބުން މެމްބަރުންގެ ވޯޓުން ނިންމީ ލީގުން ވަކިނުވުމަށެވެ.
"ހުރިހާ ބައްދަލުވުމެއްގައިވެސް، ގިނަ މެމްބަރުން ބޭނުމެއްނުވި ލީގުން ވަކިވާކަށް،" ފެނަބާޗޭގެ ޗެއާމަން އަލީ ޔޯކް ބުންޏެވެ. "މެމްބަރުން ގަބޫލްކުރާ ގޮތުގައި ސުޕަ ލީގުން ދަށުގައި އޮތް ލީގުތަކުގައިވެސް ހަމަ މިހާރު ދިމާވާ މައްސަލަތައް ދިމާވާނެ. އެއީ މެމްބަރުންގެ ވިސްނުމަކީ."
އަލީ ބުނީ ލީގުން ވަކިވުމާ ގުޅޭގޮތުން ދެން އިތުރަށް މަޝްވަރާކުރަނީ މި ސީޒަނަށް ފަހު އޮންނަ އެ ކްލަބުގެ އަހަރީ އާންމު ޖަލްސާގައި ކަމަށެވެ.
ތުރުކީ ލީގުގެ ޗެމްޕިއަންކަން 19 ފަހަރު ހޯދާފައިވާ ފެނަބާޗޭ މި ވަގުތު އޮތީ ތުރުކީ ލީގުގެ ދެވަނައިގައެވެ. އެއްވަނައިގައި އޮތް ގަލަޓަސަރާއީ އޮތީ ފެނަބާޗޭ އަށްވުރެ 2 ޕޮއިންޓް ކުރީގައެވެ.
މި ފަހަކަށް އައިސް ތުރުކީ ލީގުގައި ވަނީ ގިނަ މައްސަލަތަކެއް ފެންމަތިވެފައެވެ. އޭގެ ތެރޭގައި ކްލަބެއްގެ ރައީސެއް ރެފްރީއަކަށް ހަމަލާ ދިން މައްސަލައެއް ހިމެނެއެވެ. ފެނަބާޗޭ ލީގުން ވަކިވާން ނިންމައިފިނަމަ، ތުރުކީގެ ލީގަށް އޭގެ އަސަރުކުރާނެ އެެވެ.
