ބާސެލޯނާ (މާޗް 14) - ސްޕެއިންގެ ގެޓަފޭ އަށް ލޯން އުސޫލުން ދޫކޮށްފައި ހުރި މެންޗެސްޓާ ޔުނައިޓެޑްގެ ފޯވާޑް މޭސަން ގްރީންވުޑް ބާސެލޯނާ އަށް ވިއްކާލަން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފި އެވެ.
ޔުނައިޓެޑާ އެކު ގްރީންވުޑް ހަދާފައިވާ ކޮންޓްރެކްޓް ހަމަވާނީ 2025 ގަ އެވެ. އެހެންވެ ޔުނައިޓެޑުން ބޭނުންވަނީ އަންނަ ޓްރާންސްފާ މާކެޓުގައި ގްރީންވުޑް ބާސެލޯނާ އަށް ވިއްކާލުމަށެވެ.
މި ސީޒަނުގައި ގެޓަފޭ އަށް ބަދަލުވެ ގްރީންވުޑް އަންނަނީ މޮޅު ކުޅުމެއް ދައްކަމުންނެވެ. އެގޮތުން މިހާތަނަށް އެ ޓީމަށް އަށް ގޯލު ޖަހާދިން އިރު, މެޗުތަކުގައި ގެޓަފޭ ކޮޅަށް ނަތީޖާ ބަދަލުކޮށްލުމުގައި ގްރީންވުޑްގެ ދައުރު ބޮޑެވެ.
އެހެންވެ, ބާސެލޯނާ އިން ގްރީންވުޑްގެ ސޮއި ހޯދުމަށް ހުށަހަޅާފައިވާ ކަމަށް ރިޕޯޓްތައް ބުނެ އެވެ. އަދި ބާސެލޯނާ އަށް ގްރީންވުޑް ވިއްކާލާނަމަ ޔުނައިޓެޑުން ބޭނުންވަނީ 43 މިލިއަން ޔޫރޯގެ ފީއެއް ކަމަށްވެ އެެވެ. އަދި މި ޑިމާންޑު ޔުނައިޓެޑުން ކުޑަ ނުކުރާނެ ކަމަށް އެ ކުލަބުން ވަނީ ބާސެލޯނާ އަށް އަންގައިފަ އެވެ.
ގްރީންވުޑް 22, ގަތުމަށް ބާސެލޯނާގެ އިތުރުން ސްޕެއިންގެ އެތުލެޓިކޯ މެޑްރިޑުން ވެސް ވަނީ ޝައުގުވެރިކަން ފާޅުކޮށްފަ އެވެ. އެކަމަކު، އެތުލެޓިކޯ އިން ވެސް ގްރީންވުޑް ހޯދުމަށް 43 މިލިއަން ޔޫރޯ ހޭދަނުކުރާނެ ކަމަށް ބެލެވެ އެވެ.
ޔުނައިޓެޑް އެކަޑަމީން ތަމްރީނުވި, ގްރީންވުޑް ވަނީ އެ ޓީމުގެ އުމުރުފުރާތަކުގެ ޓީމުތަކުގެ އިތުރުން ސީނިއާ ޓީމުގައިވެސް ކާމިޔާބު ދުވަސްތަކެއް ހޭދަކޮށްފަ އެވެ. އެކަމަކު، ގެވެށި އަނިޔާގެ މައްސަލަ އެއް 2022 ވަނަ އަހަރުގެ ޖެނުއަރީގައި ފެންމަތިވެ, އޭނާ ހައްޔަރު ކުރުމުން ޔުނައިޓެޑުން ވަނީ އޭނާ ސަސްޕެންޑް ކޮށްފަ އެވެ.
އެކަމަކު ފަހުން ލަންޑަންގެ ޕްރޮސެކިއުޓަރުން ވަނީ ގްރީންވުޑްގެ މައްޗަށް ދައުވާ ނުކުރާން ނިންމާފަ އެވެ.
