ރައީސް ޑރ. މުހައްމަދު މުއިއްޒަކީ ގައުމު ހިންގެވުމާ ހަވާލުވެ ހުންނެވި ލީޑަރެވެ. އަދި ސިފައިންގެ އެންމެ މަތީ ވެރިޔާ އެވެ. ހޯމް މިނިސްޓަރާއި ޕޮލިސް ކޮމިޝަނަރު އައްޔަން ކުރައްވަނީ ވެސް އެމަނިކުފާނެވެ.
އެ ހުރިހާ ބާރުތަކާއެކު ރައީސް ތުހުމަތު ކުރައްވަނީ، ގާނޫނު ހަދާ މަޖިލީހުގެ މެންބަރުންތަކެއް ވަތަނަށް ޣައްދާރުވަމުންދާ ކަމަށެވެ. ވިދާޅުވަނީ، މަޖިލީހުގައި ތިބި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ބައެއް މެންބަރުން ކޮންޓްރޯލް ކުރަނީ ބާރުގަދަ އެހެން ފަރާތެއް ކަމަށެވެ.
"އެނގިވަޑައިގަންނަވާނެ، ރާއްޖެއިން ބޭރުގެ އެކިކަހަލަ ބާރުތައް، އެކިކަހަލަ މަސްލަހަތުތައް ހިމާޔަތްކޮށް ކުރިއެރުވުމަށްޓަކައި އެބަ ބާރުފޯރުވާ، އަޅުގަނޑުމެންގެ އިދިކޮޅު އެކިއެކި ޕާޓީތަކުގެ މައްޗަށް. އެކަންކަން މި ވަންނަނީ މަޖިލިސް ތެރެއަށް ވެސް. އެހެންވީމާ، މިކަންކަމަށް އަޅުގަނޑުމެން ލޯމަރާލައިގެން ނުވާނެ،" ފެބްރުއަަރީ 25، ގައި ހއ. ދިއްދޫގައި ބޭއްވި ޖަލްސާއެއްގައި ރައީސް ވިދާޅުވި އެވެ.
ރައީސް އެ ކުރައްވަނީ ސީރިއަސް ތުހުމަތެކެވެ. ރައްޔިތުންގެ މަޖިލީހުގެ އިންތިހާބު ކުރިއަށް އޮއްވައި، ސިޔާސީ ޕޯޑިއަމެއްގައި ނަމަވެސް އެ ކުރައްވާ ތުހުމަތަކީ ލުއިލުއިކޮށް ނެގޭވަރުގެ ކަމެއް ނޫނެވެ. ތުހުމަތަކީ ބަޔަކު ވަތަނަށް ޣައްދާރުވަމުންދާކަމުގެ ތުހުމަތެވެ. ރާއްޖޭގެ މަސްލަހަތު ދޫކޮށްލައި، އެހެން ގައުމެއް، އެހެން ބައެއްގެ މަސްލަތު ހިމާޔަތް ކުރާކަމުގެ ތުހުމަތެވެ.
އެހެންވިއްޔާ އެ މައްސަލަތައް ވަރަށް ސީރިއަސްކޮށް ތަހުގީގު ކުރަންޖެހެ އެވެ. އެއަށްވުރެ އަހަންމިއްޔަތުކަން ދޭންޖެހޭނެ އެހެން ތަހުގީގެއް ފުލުހުން ހިންގާކަށް ނޯންނާނެ އެވެ. ރާއްޖޭގެ ގާނޫނު ހަދާ މަޖިލީހުގެ ބަޔަކަށް ބޭރުގެ ބަޔަކު ނުފޫޒު ފޯރުވާ ނަމަ އެ ކުޅެވެނީ ގައުމުގެ މިނިވަންކަމާ އެވެ.
ރައީސްގެ ކުރައްވަނީ ބޮޑު، ސީރިއަސް ތުހުމަތުތަކެއް
ރައީސް މުއިއްޒު ވެރިކަމަށް ވަޑައިގެންނެވީ ދިވެހިންގެ އެންމެ މަތީ މަސްލަހަތު ހިމާޔަތް ކުރައްވާނެކަމުގެ ވައުދާއެކު އެވެ. ބައެއް ރަށްރަށަށް ރައީސް ވަޑައިގެން ދައްކަވާ ވާހަކަތަކުން ދޭހަވަނީ މިހާރު މި އޮތީ އެ މަސައްކަތް ކުރަންޖެހިފައި ކަމަށެވެ.
ރައީސް އެކުލަވައިލި ކެބިނެޓުގެ ތިން ވަޒީރަކަށް ރުހުން ނުދިނީ ވެސް ބޭރުގެ ބަޔަކު ނުފޫޒު ފޯރުވައިގެން ކަމަށް އެމަނިކުފާނު ތުހުމަތު ކުރައްވަ އެވެ. އެއީ އެމަނިކުފާނަށް އެނގިވަޑައިގަންނަވާ މައުލޫމާތެއް ކަމަށް ރައީސް ވިދާޅުވި އެވެ.
"ދެން ހަމަ އެކަން ކުރަމުންދިޔަ ގޮތް އަޅުގަނޑުމެންނަށް ވެސް މައުލޫމާތު ލިބޭ. އެ ބޭފުޅުންގެ މައްޗަށް ބާރުހިންގާ، ރާއްޖެއިން ބޭރުގެ ކޮންމެވެސް ބަޔަކު ކަމަށް ބޮޑަށް ގަބޫލުކުރެވޭ ފަރާތަކުން އަމުރުކުރާ ގޮތަކަށް. ހަމަ މަޖުބޫރުވެއޭ، ތިމަންނަމެން ޖެހެޔޭ، ކޮންމެވެސް ތިން ހަތަރު ވަޒީރުންނަށް ރުހުން ނުދޭން. އެހެން އަޅުގަނޑުމެންގެ އެމްޕީ އިން ކައިރީގައި ވެސް ބުނަމުންދިޔައީ," ފެބްރުއަރީ 25، ގައި ހދ. ނޮޅިވަރަންފަރުގައި ވާހަކަ ދައްކަވަމުން ރައީސް ވިދާޅުވި އެވެ.
މަޖިލީހުގެ ބައެއް މެންބަރުން ހިމާޔަތް ކުރަނީ ބޭރު ބައެއްގެ މަސްލަހަތު ކަމަށް ހަމަ އެ ދުވަހު އެހެން ރަށެއްގައި ވާހަކަ ދައްކަވަމުން ވެސް ރައީސް މުއިއްޒު ވިދާޅުވި އެވެ.
"އެނގިވަޑައިގަންނަވާނެ، ރާއްޖެއިން ބޭރުގެ އެކިކަހަލަ ބާރުތައް، އެކިކަހަލަ މަސްލަހަތުތައް ހިމާޔަތްކޮށް ކުރިއެރުވުމަށްޓަކައި އެބަ ބާރުފޯރުވާ، އަޅުގަނޑުމެންގެ އިދިކޮޅު އެކިއެކި ޕާޓީތަކުގެ މައްޗަށް. އެކަންކަން މި ވަންނަނީ މަޖިލިސް ތެރެއަށް ވެސް. އެހެންވީމާ، މިކަންކަމަށް އަޅުގަނޑުމެން ލޯމަރާލައިގެން ނުވާނެ،" ހއ. ދިއްދޫގައި ވާހަކަ ދައްކަވަމުން ރައީސް އެ ދުވަހު ވިދާޅުވި އެވެ.
އޭގެ ހަތަރު ދުވަސް ފަހުން ނ. ކެނދިކުޅުދޫގައި ވާހަކަ ދައްކަވަމުން ރައީސްގެ ތުހުމަތު އެމަނިކުފާނު ތަކުރާރު ކުރެއްވި އެވެ. އެމަނިކުފާނު ވިދާޅުވީ "ހަގީގަތަކީ" އެމްޑީޕީގެ ބައެއް މެންބަރުންނަކީ ޕަޕެޓުތަކެއް ކަމަށްވުން ކަމަށެވެ.
"އެ ބޭފުޅުންނަށް [އެމްޑީޕީ މެންބަރުންނަށް] ބާރު ހިންގާ، އެ ބޭފުޅުން އޮޕަރޭޓް ކުރާ އެހެން ފަރާތެއް އެބަ އޮތް. ޖޯއިސްޓިކް އޮތީ އެހެން ފަރާތެއްގައި. އެ ޖޯއިސްޓިކް އަނބުރާ ގޮތަކަށް، ޕަޕެޓްތަކެއް ގޮތަށް އެނބުރެމުން މިދަނީ ރައްޔިތުންގެ މަޖިލީހުގެ އެމްޑީޕީގެ ބައެއް މެންބަރުން. މިއީ ހަގީގަތް. މިއަށް ލޯ މަރައިލެވޭނެ ގޮތެއް ނޯންނާނެ،" ފެބްރުއަރީ 29، ގައި ރައީސް ވިދާޅުވި އެވެ.
ފުލުހުން ބުނާނެ އެއްޗެއް ނެތް
އެމްޑީޕީއަށް ރައީސް މުއިއްޒު ކުރައްވާ ތުހުމަތަކީ ބޭރުގެ ބައެއްގެ ނުފޫޒުން ރައްޔިތުންގެ މަޖިލީހުގައި މަސައްކަތް ކުރުމެވެ. އެހެންކަމުން އެއީ ގައުމަށް ހިޔާނާތްތެރިވުމެވެ. އެފަދަ މީހަކު ވާނީ ހާއިނެއް ކަމަށެވެ.
ދިވެހިރާއްޖޭގެ ގާނޫނުލްއުގޫބާތުގައި "ހާއިނަކަށްވުން" ސީދާ ބަޔާންކޮށްފައި ނެތް ނަމަވެސް އެފަދަ މީހަކަށްވާން ކުރަންޖެހޭ އަމަލުތައް ހުރީ ކުށުގެ ގޮތުގައި ބަޔާންކޮށްފަ އެވެ. ރިޝްވަތު ނެގުން، ކުލީ ސިފައިން ގެނައުން ފަދަ ކަންކަން އެއީ ކުށުގެ ގޮތުގައި ގާނޫނުލްއުގޫބާތުގައި ވަނީ ބަޔާންކޮށްފަ އެވެ.
އެހެންކަމުން އެމްޑީޕީގެ ގައުމަށް ނުވަތަ ވަތަނަށް ޣައްދާރުވެ، ރައްޔިތުންގެ މަޖިލީހުގައި މަސައްކަތް ކުރާ ނަމަ އެއީ ފުލުހުންނަށް ބެލޭނެ މައްސަލައެކެވެ. ނަމަވެސް އެމްޑީޕީ މެންބަރުންނާ ގުޅޭ އެފަދަ މައްސަލައެއް ތަހުގީގު ކުރަމުންދޭތޯ މި ނޫހުން ފުލުހުންގެ ތަރުޖަމާނު އަހުމަދު ޝިފާންއާ ސުވާލު ކުރުމުން އޭނާ މިހާތަނަށް ޖަވާބެއް ނުދެއްވަ އެވެ.
އެމްޑީޕީ ބުނަނީ ޣައްދާރުވަނީ ރައީސް މުއިއްޒު ކަމަށް
ބޭރުގެ ބާރަކުން ކޮންޓްރޯލް ކުރާ ކަމަށް ރައީސް ތުހުމަތު ކުރެއްވި އެމްޑީޕީއަކީ ރާއްޖޭގެ އެންމެ ބޮޑު އަދި މިވަގުތު އޮތް މައި އިދިކޮޅު ޕާޓީ އެވެ. އެ ޕާޓީ އާއި ޕާޓީގެ މަޖިލިސް މެންބަރުންނަށް ރައީސް ކުރެއްވި ތުހުމަތު އެމްޑީޕީން ނަގަނީ ސީރިއަސް މައްސަލައެއްގެ ގޮތުގަ އެވެ.
މަޖިލިސް އިންތިހާބުގެ ކެމްޕެއިނަށް އެމްޑީޕީން ކަނޑައެޅި ތަރުޖަމާނު އަހުމަދު އީސާ މި ނޫހާ ވާހަކަ ދައްކަވަމުން ވިދާޅުވީ، ގައުމުގެ ވެރިޔަކަށް ހުންނަވާ ބޭފުޅާ "ސަމާސާ ތުހުމަތެއް" ނުކުރައްވާނެ ކަމަށާއި އެކަން އެ ޕާޓީން ނަގާނީ ސީރިއަސް ތުހުމަތެއްގެ ގޮތުގައި ކަމަށެވެ.
"ދިވެހިރާއްޖޭގެ ރައީސުލްޖުމްހޫރިއްޔާގެ މަގާމުގައި ހުންނަވައި ދައުލަތުގެ އަނެއް ބާރަށް ސަމާސާ ތުހުމަތެއް ނުކުރައްވާނެ. ކުރައްވައިގެން ވެސް ނުވާނެ. އަޅުގަނޑުމެން އެކަން ނަގާނީ ވަރަށް ސީރިއަސްކޮށް ކުރައްވާ ތުހުމަތެއްގެ ގޮތުގައި،" އީސާ ވިދާޅުވި އެވެ.
ރައީސް އެމްޑީޕީގެ މެންބަރުންނަށް ކުރެއްވި ތުހުމަތަކީ ގައުމަށް ހިޔާނާތްތެރިވުންކަން ފާހަގަ ކުރައްވަމުން އީސާ ވިދާޅުވީ، އެ މެންބަރުންނަކީ އިހުލާސްތެރިންކަން ރައްޔިތުން ގަބޫލު ކުރާނެ ކަމަށެވެ.
"ހަމަ ގައިމު ވެސް ދިވެހިރާއްޖޭގެ ރައްޔިތުން، އެމްޑީޕީ މެންބަރުންނަކީ ހިޔާނާތްތެރިން ކަމެއް ނުދެކޭ. މި ޕާޓީއަކީ ދިވެހިރާއްޖެއަށް ގެނައި ހުރިހާ އިސްލާހީ ބަދަލެއް ގެނައުމުގެ އެންމެ އިސްކޮށް މަސައްކަތް ކުރި ޕާޓީ. މަޖިލީހުގައި ތިބި އެމްޑީޕީގެ ވަރަށް ގިނަ މެންބަރުންނަކީ އެއް ދައުރަށް ވުރެ ގިނަ ދައުރު މެންބަރުކަން ކުރައްވާ ބޭފުޅުން. ރައްޔިތުންގެ ތާއީދާއެކު މަޖިލީހަށް ވަދެވެނީ. އެހެންވީމާ ރައްޔިތުން ގަބޫލު ކުރެވޭ ރައްޔިތުންގެ މަޖިލީހުގައި ތިބި އެމްޑީޕީ މެންބަރުންނަކީ ހިޔާނާތްތެރިން ނޫން ކަމަށް،" އޭނާ ވިދާޅުވި އެވެ.
ގައުމަށް ހިޔާނާތްތެރިވާކަމުގެ ތުހުމަތު އެމްޑީޕީ މެންބަރުންނަށް ކުރައްވާއިރު، ރައީސް މުއިއްޒުގެ އަމަލާއި ބަސް ދިމާނުވާ ކަމަށް އީސާ ގަބޫލު ކުރައްވަ އެވެ. އެކަމުގެ އެއް ހެއްކަކީ އޭނާ ވިދާޅުވާ ގޮތުން ނަމަ މަޖިލީހުގައި ތިބި އެމްޑީޕީގެ ބައެއް މެންބަރުން ވެރިކަން ހިންގާ ޕާޓިން "ގަތުން" ކަމަށް އީސާ ވިދާޅުވި އެވެ.
"އެކަމަކު، ހަމަ ގައިމު ވެސް ރައީސުލްޖުމްހޫރިއްޔާގެ އަމަލާއި ބަސް ދިމައެއް ނުވިކަން ރާއްޖޭގެ ރައްޔިތުންނަށް އެނގޭނެ. ދީނީ ތާކިހާ އަޅުއްވައިގެން ވެރިކަމަށް ވަޑައިގެން އެންމެ ފުރަތަމަ ކުރެއްވި ކަމަކީ ރައްޔިތުންގެ މަޖިލީހުގެ 13 މެންބަރަކު ގަނެގެން ގެންދިޔައީ،" އީސާ ވިދާޅުވި އެވެ.
އެމްޑީޕީން ގަބޫލު ކުރަނީ ގައުމަށް ފައިދާނުވާ އަދި ބޭރުގެ ބަޔަކަށް ފައިދާނެ ފަދަ ގޮތަކަށް މަސައްކަތް ކުރައްވަނީ ހުދު ރައީސް މުއިއްޒު ކަމަށެވެ. އެގޮތަށް ބުނަންޖެހޭ ސަބަބު ވެސް އީސާ ވިދާޅުވި އެވެ.
"ދިވެހި ރައްޔިތުން ތުހުމަތު ކުރޭ އަދި އަޅުގަނޑުމެން ތުހުމަތު ކުރަން އެ ފައިސާއަކީ ސަރުކަރާ ހަވާލުވެވަޑައިގެން ސަރުކާރުގެ ޕްރޮޖެކްޓުތަކެއް ބޭރުގެ ކުންފުނިތަކަށް ނުއަގުގައި ދީގެން، އަޅުގަނޑުމެން ދިވެހި ބަހުން މި ކިޔާ ގޮތަށް ކަޓު ނަގައިގެން، އެ ފައިސާއިން ރައްޔިތުންގެ މަޖިލީހުގެ މެންބަރުން ގަނެގެން ގެންދިޔައީ. އެހެންވީމާ، އިހުލާސްތެރިންނަކީ ކޮބައިކަން، ރައްޔިތުންނަށް ޣައްދާރުވަނީ ކާކުކަން މިހާ ހިސާބުން ރައްޔިތުންނަކަށް ނުއޮޅޭނެ،" އޭނާ ވިދާޅުވި އެވެ.
ކޮންމެ މަގުސަދެއްގައި ނަމަވެސް ރައީސް ކުރައްވަނީ ވަރުގަދަ ތުހުމަތެކެވެ. އެއި ތެދެއް ކަމަށް އެމަނިކުފާނު ހަމަ ހަގީގަތުގައި ވެސް ގަބޫލު ކުރައްވާ ގައުމުގެ އެންމެ މަތީ ވެރިޔާގެ ހައިސިއްޔަތުން އެ މައްސަލަތައް ބަލަންޖެހެ އެވެ. ނޫން ނަމަ އެ ދައްކަވަނީ ސިޔާސީ ވާހަކައެކެވެ. އެ ދައްކަވާ ވާހަކަތަކުގެ ހަގީގަތާމެދު ރައްޔިތުން ސުވާލު ކުރާނެ އެވެ.
