ޗައިނާއިން ފަސް އަހަރާއި އަދި އެއަށްވުރެ ދިގު މުއްދަތަކުން އަދާކުރާ ލޯނުގެ އިންޓްރެސްޓު ރޭޓު ކުޑަކޮށްފި އެވެ.
ޗައިނާގެ ސެންޓްރަލް ބޭންކުން ބުނީ، އެ ގައުމުގެ ޕްރޮޕަޓީ މާކެޓު ރަނގަޅު ހާލަތަކަށް ގެންދިއުމަށް ފަސް އަހަރު ދުވަހާއި އެއަށްވުރެ ދިގު މުއްދަތުން އަދާ ކުރާ ލޯނުގެ އިންޓްރެސްޓު ރޭޓު 3.95 ޕަސެންޓަށް ކުޑަކޮށްފައިވާ ކަމަށެވެ.
ނަމަވެސް ސެންޓްރަލް ބޭންކުން ގެތަކާއި ކޯޕަރޭޓްތަކަށް ދޫކުރާ ލޯނުގެ އިންޓްރެސްޓު ރޭޓު ވަނީ 3.45 ޕަސެންޓުގައި ހިފަހައްޓާފަ އެވެ.
ސެންޓްރަލް ބޭންކުން އެޅި މި ފިޔަވަޅުތަކާ އެކުވެސް ޗައިނާގެ ޕްރޮޕަޓީ މާކެޓަށް އަންނާނީ ކުޑަ ބަދަލެއް ކަމަށާއި އަދިވެސް މާކެޓު ރަނގަޅު ކުރުމަށް ގިނަ މަސައްކަތްތަކެއް ކުރަން ޖެހޭ ކަމަށް ޗައިނާގެ ތަޖުރިބާކާރުން ބުނެ އެވެ.
ޗައިނާގެ ޕްރޮޕަޓީ މާކެޓުގައި ދަރަނި އަދާ ކުރާ މިންވަރު 2020 ވަނަ އަހަރުން ފެށިގެން އިތުރުވަމުން އަންނައިރު، ގައުމުގެ ބައެއް ކުންފުނިތައް ވަނީ ބަނގުރޫޓު ވެސް ވެފަ އެވެ.
ދުނިޔޭގެ ދެވަނައަށް އެންމެ ބޮޑު އިގްތިސާދެއް އޮންނަ ޗައިނާގެ އިންފްލޭޝަން ރޭޓު ފާއިތުވި 15 އަހަރު ދަށަށް ނުދާ ވަރަށް ވެއްޓިފައިވާއިރު، އެ ގައުމު ޑިފްލޭޝަނަކަށް ދިޔުމުގެ ބިރުވެސް ވަނީ ބޮޑުވެފަ އެވެ.
މިގޮތުން ޕްރޮޑިއުސާ ޕްރައިސް އިންޑެކްސް (ޕީޕީއައި) ފާއިތުވި 16 މަހު ޖެހިޖެހިގެން ވަނީ ދަށް ގޮސްފަ އެވެ. އަދި ކާބޯތަކެތީގެ އަގު ވަނީ މިދިޔަ މަހު 5.9 އިންސައްތައަށް ދަށްވެފަ އެވެ.
