ޓައިވާނުގެ ކަނޑުގެ ސަރަހައްދަށް ވަނތް ޗައިނާގެ މަސް ބޯޓެއް ހުއްޓުވަން އުޅުމުގެ ތެރޭގައި އެ ބޯޓުގައި ތިބި ދެ މަސްވެރިން ގެނބިގެން މަރުވެއްޖެ އެވެ.
ޓައިވާނުން ބުނީ ބޯޓު ހުއްޓުވަން އުޅުނީ ކަނޑުގެ ސަރަހައްދަށް ވަނުމުން ކަމަށާއި، ބޯޓު ބަލައި ފާސް ކުރަން އެދުނު ނަމަވެސް ފުރުސަތު ނުދިނުމުން ސުވާލު އުފެދުނު ކަމަށެވެ.
"ބޯޓުން ދަތުރުކުރި ދެ މީހަކު ގެނބިގެން ހޮސްޕިޓަލުގައި ފަރުވާ ދެމުން ދަނިކޮށް ވަނީ މަރުވެފައި. ބޯޓުގައި ބާކީ ތިބި ދެ މީހުންގެ ހާލު ރަނގަޅު. މި މައްސަލަ އިތުރަށް ދަނީ ތަހުގީގު ކުރަމުން" ޓައިވާނުން ބުނި އެވެ.
މިކަމާ ގުޅިގެން ޗައިނާއިން ވަނީ ކަންބޮޑުވުން ފާޅުކޮށް ޓައިވާންގެ އަމަތައް ކުށްވެރި ކޮށްފަ އެވެ.
ނަމަވެސް ޓައިވާންގެ ކަމާބެހޭ ފަރާތްތަކުން ވަނީ ހާދިސާއާ ގުޅިގެން އެ ގައުމު ދިފާއުކޮށް، ކަން ހިނގައިދިޔަ ގޮތް ތަހުގީގު ކުރާނެ ކަމަށް ބުނެފަ އެވެ.
ދާދި ފަހުންވެސް ޓައިވާނުން ވަނީ އެ ގައުމުގެ ކަނޑުގެ ސަރަހައްދަށް ޗައިނާގެ އުޅަނދުތައް ވަދެ ނުރައްކާތެރިކޮށް އުޅޭ ކަމަށް ތުހުމަތު ކޮށްފަ އެވެ.
ޓައިވާންއަކީ ޗައިނާގެ ބައެއް ކަމަށް ޗައިނާއިން ދައުވާ ކުރާއިރު، ޓައިވާންއަކީ މިނިވަން ދައުލަތެއް ކަމަށް ބައެއް ގައުމުތަކުން ގަބޫލު ކުރެ އެވެ.
