ބޭންކް އޮފް މޯލްޑިވްސް (ބީއެމްއެލް) ގެ ނަމުގައި ފޭކު މެސެޖެއް ފޮނުވަމުން ދާތީ އެކަމަށް ސަމާލުވުމަށް އެ ބޭންކުން އެދެފި އެވެ.
ބީއެމްއެލްގެ ނަމުގައި ފޮނުވަމުންދާ މެސެޖުގައި ބުނެފައިވަނީ ޓްރާންސެކްޝަނެއްގެ ސަބަބުން އެކައުންޓު ލިމިޓުވެފައިވާ ކަމަށާއި އެކައުންޓު ރިއެކްޓިވޭޓު ކުރުމަށް މެސެޖުގައިވާ ލިންކަށް ފިތުމަށެވެ.
ބޭންކުން ބުނި ގޮތުގައި މިއީ އަސްލެއް ނެތް މެސެޖެއް ކަމަށާއި ވަރަށް ގިނަ ބަޔަކަށް މި މެސެޖު ލިބެމުންދާ ކަމުގެ މައުލޫމާތު ބޭންކަށް ލިބިފައިވާ ކަމަށެވެ.
"ބޭންކުން އެކައުންޓު އެކްޓިވޭޓް ކުރުމަށް އެދި އެއްވެސް ލިންކެއް ހިމަނާފަ މެސެޖެއް ނުފޮނުވާނެ، ކަސްޓަމަރުން މިފަދަ އެސްއެމްއެސް ތަކަށް ސަމާލުކަން ދިނުމަށް އިލްތިމާސްކުރަން" ބޭންކުގެ އޮފިޝަލަކު މި ނޫހާ ވާހަކަ ދައްކަމުން ބުނެފައިވެ އެވެ.
ބީއެމްއެލްގެ ނަމުގައި އޮޅުވާލައިގެން ފޮނުވަމުންދާ މެސެޖުގެ ސްކްރީންޝޮޓެއް
މިފަދައިން ކުރާ މެސެޖުތައް ހިމެނޭހެން އެކި ބާވަތުގެ ސްކޭމްތަކުގެ މައްސަލަތައް ރިކޯޑު ކުރަން ފެށީއްސުރެ މިހައިތަނަށް އާންމުންގެ އަތުން ގެއްލުނު ފައިސާގެ އަދަދު 150 މިލިއަނަށްވުރެ އިތުރު ކަމަށް ފުލުހުންގެ އިދާރާއިން ވަނީ މިދިޔަ މަހު ބޭއްވި ނޫސްވެރިންގެ ބައްދަލުވުމެއްގައި ބުނެފަ އެވެ.
"2021 އިން ފެށިގެން އަޅުގަނޑުމެން ރިކޯޑު ބަލަހައްޓަން ފެށިއިރުގައި މިހައިތަނަށް އަޅުގަނޑުމެންނަށް ހުށަހެޅިފައި އެބައޮތް 28،003 މައްސަލައެއް، 28،003 ސްކޭމްގެ އެކި ބާވަތުގެ މައްސަލަތައް ހުށަހެޅިފައިވާއިރު އޭގެ ޖުމުލަ ގެއްލުން 57.8 މިލިއަން ވަރު އެބައުޅޭ، އެއީ ހަމައެކަނި ދިވެހި ފައިސާއިން އަދި ޑޮލަރު ވެސް އެބަހުރި، 64 ލައްކަ ޑޮލަރު ގެއްލިފައި ޖުމުލަ ޓޯޓަލް އަދަދު،" ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ހެޑް ސުޕްރިޓެންޑެންޓް އޮފް ޕޮލިސް އަބްދުﷲ ރަޝީދު ނޫސްވެރިންގެ ބައްދަލުވުމެއްގައި ހާމަކުރައްވާފައިވެ އެވެ.
ނަމަވެސް މި ހުރިހާ ފައިސާގެ ތެރެއިން މިހާތަނަށް އަނބުރާ ހޯދިފައިވަނީ އެންމެ މިލިއަނެއް ކަމަށްވެސް ފުލުހުން އެދުވަހު ހާމަކުރި އެވެ.
