ސެނަގަލާގް ރިޔާސީ އިންތިހާބު ފަސްކުރުމުން އެ ގައުމުގެ އިދިކޮޅު ސަޕޯޓަރުން އިހުތިޖާޖުކުރަން ފަށައިފި އެވެ.
ހޮނިހިރު ދުވަހު ބޭއްވުމަށް ހަމަޖެހިފައިވާ ސެނަގާލްގެ ރިޔާސީ އިންތިހާބު ފެބްރުއަރީ 25 ވަނަ ދުވަހަށް ފަސްކުރިކަން އެ ގައުމުގެ ރައީސް މެކީ ސަލް އިއުލާންކުރެއްވީ އާދީއްތަ ދުވަހު އެވެ.
ގައުމާ މުހާތަބު ކުރައްވާ ސަލް ވިދާޅުވީ އިންތިހާބުގައި ވާދަކުރައްވާ ކެންޑިޑޭޓުންގެ ލިސްޓާ ގުޅޭ މައްސަލައަކާ ގުޅިގެން އިންތިހާބާ ބެހޭ ގާނޫނުވެސް ބާތިލު ކޮށްފައިވާ ކަމަށެވެ.
މިއާއެކު، ސެނެގާލްގެ އިދިކޮޅު ސިޔާސީ ލީޑަރުންނާއެކު ގިނަ ރައްޔިތުންތަކެއް ވަނީ އެކަމާ ދެކޮޅު ހަދައި އިންތިހާބު އަވަސް ކުރުމަށް ގޮވާލައި އެ ގައުމުގެ މަގުތަކަށް އެއްވެފަ އެވެ. ފުލުހުން ވަނީ މަގުތަކަށް އެއްވި ބައެއް މީހުން ހައްޔަރުކޮށް، ކަރުނަ ގޭސްވެސް ޖަހައިފަ އެވެ.
އިންތިހާބުގައި ވާދަކުރާ އިދިކޮޅު 19 ކެންޑިޑޭޓުން ވެސް ސަޕޯޓަރުން ގޮވާލައިފައި ވަނީ މަގުމައްޗަށް ނިކުމެ އަޑު އުފުލުމަށެވެ.
އިންތިހާބު ފަސް ކޮށްފައި ވަނީ މަގުބޫލު އުޒުރެއް ނެތި ކަމަށް ޔޫރަޕިއަން ޔޫނިއަން އިން ވަނީ ބުނެފަ އެވެ. އަދި އެމެރިކާ އިން ވެސް ވަނީ އިންތިހާބު އަވަސް ކުރުމަށް ގޮވާލައިފަ އެވެ.
ސެނަގާލްގެ އިންތިހާބާ ބެހޭ ގާނޫނު ބުނާ ގޮތުން އިންތިހާބު ފަސް ކުރެވޭނީ 80 ދުވަސް ދިނުމަށްފަހު އެވެ. މިގޮތުން އިންތިހާބު ފަސްކުރާނަމަ ފަސްކުރަން ޖެހޭނީ އަންނަ އެޕްރީލް މަހުގެ ފަހުކޮޅަށެވެ.
ސެނަގާލްގެ ރައީސްކަމާ 2012 ވަނަ އަހަރު ހަވާލުވެވަޑައިގެންނެވި ސަލްގެ ރިޔާސީ ދައުރު ހަމަވާނީ އަންނަ އެޕްރީލް މަހުގެ ދެވަނަ ދުވަހު އެވެ.
