ސަރުކާރުގެ ނިންމުމާ އެއްގޮތަށް ބޭރުގައި ކިޔަވާ ކުދިންގެ ބީއެމްއެލް އެކައުންޓުން ނެގޭ އަދަދު 1200 ޑޮލަރަށް ބޮޑުކުރަން ނިންމި ނިންމުން، ޑޮލަރު ތާށިކަމާ ހުރެ މާދަމައިން ފެށިގެން ތަންފީޒުނުކުރެވޭނެ ކަމަށް ފިނޭންސުން ހާމަކޮށްފި އެވެ.
މީގެ ކުރިން "އަދަދު" ނޫޙުން ވާނީ އިތުބާރު ހުރި މަސްދަރުތަކާ ހަވާލާދީ މިކަން ނުކުރެވޭނެ ކަމުގެ ހަބަރު ޝާއިއުކޮށްފަ އެވެ.
މިކަމާ ގުޅޭގޮތުން ފިނޭންސުން ނެރުނު ބަޔާނެއްގައި ބުނީ އެ ސިޔާސަތު ތަންފީޒުކުރެވޭޏެ ނިޒާމެއް އެކުލަވާލަން ބޭންކާއި އެމްއެމްއޭ އާއި ހަޔާ އެޑިޔުކޭޝަން މިނިސްޓްރީގެ ގުޅިގެން މަސައްކަތް ކުރަމުން އަންނަ ކަމަށެވެ. ނަަމަވެސް މި ވަގުތު އެކަން ކުރެވެން ނެތް ކަމަށް މިނިސްޓްރީގެ ބަޔާނުގައިވެ އެވެ.
"މި ސިޔާސަތު މި ވަގުތު ތަންފީޒުކުރުމުގެ ދަތިތަކެއް ހުރިކަން ފާހަގަވެ، ދިވެހިރާއްޖޭގައި މި ވަގުތު ޑޮލަރު ޑިމާންޑު އަދި ހުރި ހުރަސްތައް މިދަނީ ދެނެގަންނަމުންނެވެ" ފިނޭންސް މިނިސްޓްރީގެ ބަޔާނުގައިވެ އެވެ.
ފިނޭންސުން އިތުރަށް ބުނީ ކާޑު ލިމިޓު އިތުރުކުރުމުގެ މަސައްކަތުގެ ތެރެއިން ރާއްޖެއިން ބޭރުގައި ކިޔަވާ ކުދިންގެ އަދާހަމަ ދަފްތަރެއް ވެސް އެކުލަވާލަމުން އަންނަ ކަމަށެވެ. ހަމައެހެންމެ ރަސްމީ ރިޒާވު އިތުރުކުރުމަށާއި، ބޭންކިން ނިޒާމަށް މާރުކުރެވޭ ޑޮލަރުގެ ނިސްބަތް އިތުރުކުރުމުގެ މަސައްކަތް ވެސް މިނިސްޓްރީ އާއި އެމްއެމްއޭ އާއި ބޭންކުތަކާ ގުޅިގެން ކުރަމުން އަންނަ ކަމަށް ވެސް މިނިސްޓްރީން ބުންޏެވެ.
ފިނޭންސުގެ ބަޔާނުން މި ސިޔާސަތު ތަންފީޒުކުރަން ފެށޭނެ ދުވަހެއް ބަޔާންކޮށްފައި ނެތެވެ.
ބޭންކަށް ޑޮލަރު ތާށިވެގެން އުޅެނީ ރަސްމީ ނިޒާމުގެ ތެރެއިން ބޭންކުން މާރުކުރާ ޑޮލަރުގެ އަދަދު ދަށްވުމުންނެވެ. ބޭންކުން ބުނީ ކަޅުބާޒާރުން ޑޮލަރު މާރުކުރާ މައްސަލަ ހައްލުނުވަނީސް ޑޮލަރު ތާށިކަމުގެ މައްސަލަ ހައްލުނުވާނެ ކަމަށެވެ.
ޑޮލަރު ދަތިވެ، މި މަހުގެ ކުރީކޮޅުން ފެށިގެން އެހާތަނަށް ވިޔަފާރިވެރިން ބޭރަށް ފޮނުވާ ޓީޓިތަކަށް ބީއެމްއެލްއިން ދެމުން އައި ޑޮލަރު ސަޕޯޓު ވަނީ ހުއްޓާލާފަ އެވެ. މި މައްސަލަގަނޑުގެ ތެރެއިން ބޭންކުގެ ޗެއާމަނާއި ބައެއް ބޯޑު މެމްބަރުން ވަކިކޮށް، ވަކިކުރި ބައެއް މެމްބަރުން އަލުން ބޯޑަށް އައްޔަނުކޮށްފައިވެ އެވެ.
