ޕްރޮސެކިއުޓާ ޖެނެރަލް، ހުސެއިން ޝަމީމްއަށް ދިން ހަމަލާއަކީ ދުރާލައި ރާވައިގެން ދިން ހަމަލާއެއް ކަމަށާއި އެއީ މުޅި ނިޒާމަށް ދިން ހަމަލާއެއްކަމަށް ދަ ޑިމޮކްރެޓްސް އިން ބުނެފި އެވެ.
ޝަމީމްއަށް މަގުމަތިން މިއަދު ހެނދުނު މަރުތޭލަކުން ހަމަލާދީ ޒަހަމުކޮށްލި ކޮށްލުން ހަރުއަޑުން ކުށްވެރިކޮށް ޑިމޮކްރެޓްސްއިން ނެރުނު ބަޔާނުގައި ވަނީ ސީރިއަސް މައްސަލައެއްގެ ގޮތުގައި ބަލައި ޒިންމާ ފަރާތްތައް އިންސާފުގެ ކުރިމައްޗަށް ވީހައި ވެސް އަވަހަށް ގެނައުމަށް ގޮވާލައިފަ އެވެ.
"ސިޔާސީ ކަންކަމުން އެއްކިބާވެ، ޖިނާއީ އަދުލުގެ ނިޒާމުގެ ތެރޭގައި މުހިއްމު މަސްއޫލިއްޔަތުތަކެއް އަދާކުރުމަށް ގާނޫނުއަސާސީގެ ދަށުން މަތިކޮށް އައްޔަނުކޮށްފައިވާ ދައުލަތުގެ މިފަފަ މަގާމެއް އަދާކުރައްވަމުން ގެންދަވާ ފަރާތަކަށް މިގޮތަށް ދޭ ހަމަލާއަކީ މުޅި ނިޒާމަށް ދެވޭ ހަމަލާއެކެވެ. އަދި މިއީ ނުރައްކާތެރި ސިގްނަލެކެވެ." އެ ބަޔާނުގައި ބުނެފައިވެ އެވެ.
"އަދަދު" އަށް އެނގިފައި ވާގޮތުގައި ޝަމީމްއަށް ހަމަލާ ދީފައި ވަނީ ސައިކަލު ޕާކޮށްފައި ގެެއަށް ވަދެވަޑައިގަންނަވަނިކޮށްނެވެ. ހަމަލާ އެރީ ޝަމީމްގެ ވައަތުގެ މުލައްދަނޑިއަށެވެ. މަރުތޭލައިން ޖެހުމުގެ ސަބަބުން ޝަމީމްގެ ވައަތު މުލައްދަނޑީގެ ކަށިގަނޑެއްގައި ރެނދެއްލާފައި ވާތީ އޭނާއަށް އޭޑީކޭގައި އަންނަނީ ފަރުވާ ދެމުންނެވެ.
މިއަދު ނެރުނު ބަޔާނުގައި ޑިމޮކްރެޓްސްއިން ވަނީ އެ ހަމަލާއަކީ ދުރާލައި ރާވައިގެން ދިން ހަމަލާއެއް ކަމަށް ތުހުމަތުކޮށްފަ އެވެ.
"ޕްރޮސިކިއުޓާ ޖެނެރަލް ހުސެއިން ޝަމީމަށް ދިން ހަމަލާގެ މައްސަލަ ސީރިއަސް މައްސަލައެއްގެ ގޮތުގައި ބައްލަވައިދެއްވައި، ޒިންމާވާ ފަރާތްތައް އަވަސް ފުރުސަތެއްގެ ތެރޭގައި އިންސާފުގެ ކުރިމައްޗަށް ގެނެސްދެއްވުމަށް މޯލްޑިވްސް ޕޮލިސް ސާވިސްއަށާއި ދައުލަތުގެ ކަމާބެހޭ ފަރާތްތަކަށް މި ޕާޓީން ގޮވާލަމެވެ." އެ ބަޔާނުގައި ބުނެފައިވެ އެވެ.
ޝަމީމްއަށް ދިން ހަމަލާ ކުށްވެރިކޮށް ޑިމޮކްރެޓްސްއިން ބަޔާނެއް ނެރެފައިވާއިރު، އިދިކޮޅު އެންމެ ބޮޑު ޕާޓީ، އެމްޑީޕީން ވެސް ވަނީ އެކަން ކުށްވެރިކޮށް މިއަދު ބަޔާނެއް ނެރެފަ އެވެ.
