ދޯހާ، ގަތަރު (ޖެނުއަރީ 26) - މިހާރު ކުރިއަށްދާ އޭޝިއަން ކަޕްގެ ގަދަ 16 ބުރުގައި ސައުދީ އަރަބިއްޔާ އިން ދެކުނު ކޮރެއާއާ ދެކޮޅަށް ނުކުންނަން ޖެހިއްޖެ އެވެ.
ދެކުނު ކޮރެއާ ދިޔައީ ވާދަކުރި ގްރޫޕްގެ ދެ ވަނަ އެވެ. ދެކުނު ކޮރެއާ ހިމެނުނު ގްރޫޕް އީގެ އެއް ވަނަ ހޯދީ ބަހްރެއިން އެވެ. ދެކުނު ކޮރެއާ އިން ފުރަތަމަ މެޗުގައި ބަހްރޭން 3-1 އިން ބަލިކުރި ނަމަވެސް، ފަހުން ޖޯޑަން އާއި 2-2 އިން އެއްވަރުވެ، މެލޭޝިއާ އަތުން 3-3 އިން އެއްވަރުވީ އެވެ.
އޭޝިއާގެ ގަދަ ބާރެއްގެ ގޮތުގައި އޮތް ދެކުނު ކޮރެއާ އިން 64 އަހަރުތެރޭ ފުރަތަމަ ފަހަރަށް އޭޝިއަން ކަޕް ކާމިޔާބުކުރަން މަސައްކަތް ކުރާއިރު، އެ ޒިންމާއާ ހަވާލުވެ ހުރި ކޯޗަކީ، ޖަރުމަނުގެ ކުރީގެ ފޯވާޑް، ޔާގަން ކްލިންސްމަން އެވެ.
"އެއްވެސް ޓީމެއްގެ ނަމަަށް ބަލައިގެން ފަސޭހައެއް ނުވާނެ، އޭޝިއާ ފުޓްބޯޅަ ކުރިއަރައިފި، މެޗުތައް އުނދަގޫ،" ކްލިންސްމަން ބުންޏެވެ.
ގަދަ 16 ބުރުގައި ދެކުނު ކޮރެއާ އިން ނުކުންނާނީ އިޓަލީގެ ރޮބާޓޯ މަންޗިނީ ކޯޗުކޮށްދޭ ސައުދީއާ ދެކޮޅަށެވެ. ސައުދީން ގްރޫޕްގެ ފުރަތަމަ ދެ މެޗުން އޮމާން އާއި ކިރްގިސްތާން އަތުން މޮޅުވި ނަމަވެސް، ފަހު މެޗުން ވަނީ ތައިލެންޑާ 0-0 އިން އެއްވަރުވެފަ އެވެ.
މި ފަހަރުގެ އޭޝިއަން ކަޕްގެ ތާރީހީ އެންމެ ބޮޑު އުސްއައްޔަކީ، ފަލަސްތީނާއި ސީރިއާ އިން މުޅިން އަލަށް ނޮކައުޓް ބުރުން ފުރުސަތު ހޯދުމެވެ. ހަނގުރާމައިގެ ސަބަބުން މި ދެ ގައުމަށް އަމިއްލަ ގައުމުގައި މެޗުތައް ކުޅެ ކުރިއެރުން ހޯދަން ހަނި ފުރުސަތުތަކެއް އޮތް ނަމަވެސް ފުޓްބޯޅައިން މި ދެ ޓީމު ހޯދަމުން އަންނަ ކުރިއެރުމަށް ގިނަ ބަޔަކު ތައުރީފުކުރެ އެވެ.
އޭޝިއަން ކަޕް ގަދަ 16 ބުރުގެ މެޗުތައް:
ތަޖިކިސްތާން - ޔޫއޭއީ (28 ޖެނުއަރީ)
އޮސްޓްރޭލިއާ - އިންޑޮނޭޝިއާ (28 ޖެނުއަރީ)
އިރާގު - ޖޯޑަން (29 ޖެނުއަރީ)
ގަތަރު - ފަލަސްތީން (29 ޖެނުއަރީ)
ސައުދީ އަރަބިއްޔާ - ދެކުނު ކޮރެއާ (30 ޖެނުއަރީ)
އުޒްބެކިސްތާން - ތައިލެންޑް (30 ޖެނުއަރީ)
އިރާން - ސީރިއާ (31 ޖެނުއަރީ)
ބަހްރޭއިން - ޖަޕާން (31 ޖެނުއަރީ)
