ޒިކުރާ މިސްކިތާއެކު ދިގު ތާރީހެއް އޮތް އެސްޖޭ ކޮންސްޓްރަކްޝަން ކުންފުނީގެ ހަރަދުގައި އެ މިސްކިތް ތިން ބުރިއަށް އިމާރާތް ކުރަން އިސްލާމިކް މިނިސްޓްރީއާއެކު މިއަދު ސޮއިކޮށްފި އެވެ.
ޒިކުރާ މިސްކިތް ތިން ބުރިއަށް ނެގުމުގެ މަސައްކަތް ކުރުމަށް އިސްލާމިކް މިނިސްޓްރީއާއެކު އެސްޖޭ ކޮންސްޓްރަކްޝަނުން މިއަދު އެމްއޯޔޫއެއްގައި ސޮއިކުރީ, އެސްޖޭގެ ސޯޝަލް ސާވިސް އިނީޝިއޭޓިވްގެ ދަށުން އެ މަޝްރޫއަށް ހަރަދު ކުރާ ގޮތަށެވެ.
އެސްޖޭގެ ހަރަދުގައި ޒިކުރާ މިސްކިތް ހެދުމުގެ އެއްބަސްވިއިރު, މިއަދު އިސްލާމިކް މިނިސްޓްރީން ވަނީ ހުޅުމާލޭގައި މިސްކިތް އެޅުމަށް އަމިއްލަ ދެ ފަރާތަކާއެކު ވެސް އެމްއޯޔޫއެއްގައި ސޮއިކޮށްފަ އެވެ.
ހުޅުމާލޭގައި މިސްކިތް އެޅުމަށް ލީސާ މޯލްޑިވްސްއާއެކު ސޮއިކުރި -- ފޮޓޯ: އިސްލާމިކް މިނިސްޓްރީ
އެއީ ލީސާ މޯލްޑިވްސް ޕްރައިވެޓް ލިމިޓެޑުން ހަރަދު ކުރާ ގޮތަށް އަޅާ މިސްކިތަކާއި, ކެންސަރު ބަލީގައި މަރުވި އަހުމަދު އަލީމްގެ ހަނދާނުގައި އުފެއްދި އަލީމް ފައުންޑޭޝަނުން ހަރަދު ކުރާ ގޮތަށް އަޅާ މިސްކިތެކެވެ.
ހުޅުމާލޭގައި މިސްކިތް އެޅުމަށް އަލީމް ފައުންޑޭޝަނާއެކު ސޮއިކުރި -- ފޮޓޯ: އިސްލާމިކް މިނިސްޓްރީ
ކުރީގެ ރައީސް މައުމޫން އަބްދުލްގައްޔޫމްގެ ބައްޕާފުޅުގެ ހަނދާނުގައި ބިނާކޮށްފައި ހުރި ޒިކުރާ މިސްކިތް ތަޅާލުމަށް ފަހު އެތަނުގައި "ދާރުލް ޒިކުރާ" ގެ ނަމުގައި 10 ބުރީގެ އިމާރާތެއް އަޅަން ރައީސް އަބްދުﷲ ޔާމީންގެ ސަރުކާރުގައި ނިންމި އެވެ. އެ ނިންމުމުގެ ދަށުން އިސްލާމިކް މިނިސްޓްރީ އާއި އެސްޖީ ކުންފުންޏާ ދެމެދު، 130 މިލިއަން ރުފިޔާ ޖުމްލަ މަޝްރޫއުއަށް ލިބޭ ގޮތަށް ސޮއިކުރި އެވެ.
ނަމަވެސް, އެ އެއްބަސްވުން ބާތިލު ކުރި މައްސަލައިގައި ދެ ފަރާތުން ވެސް ކޯޓަށް ދިޔަ އެވެ. އެ މައްސަލައިގައި އެންމެ ފަހުން ދެ ފަރާތުން އެއްބަސްވީ, ބަދަލުގައި އެސްޖޭގެ ހަރަދުގައި ހުޅުމާލެ ދެވަނަ ފިޔަވަހީގައި މިސްކިތެއް އެޅުމަށެވެ.
