ބެންގަލޫރު، އިންޑިއާ (ޖެނުއަރީ 23) - އަމިއްލަ ސަބަބަކާ ހުރެ މަޝްހޫރު ތަރި، ވިރާތު ކޯލީ، އިންޑިއާގެ ޓެސްޓް ކްރިކެޓް ޓީމުން ބްރޭކެއް ނަގައިފި އެވެ.
އިންގްލެންޑާ ދެކޮޅަށް އިންޑިއާ އިން ކުޅެން ހަމަޖެހިފައިވާ ފަސް މެޗު ހިމެނޭ ޓެސްޓް ސީރީސްގައި ކުރީގެ ކެޕްޓަން، ވިރާތު، 35، ނުކުޅެން ނިންމީ ފުރަތަމަ ދެ މެޗުގަ އެވެ.
އިންޑިއާގެ ކްރިކެޓް ބޯޑުން ނެރުނު ބަޔާނެއްގައި ބުނެފައިވަނީ، އިންޑިއާ ޓެސްޓް ކްރިކެޓް ޓީމުގެ ވެސް ކެޕްޓަން ރޯހިތު ޝަރްމާއާ އެކު ވިރާތު ބޭއްވި ބައްދަލުވުމެއްގައި ވަނީ ޓެސްޓް ޓީމުން ބްރޭކެއް ނަގަން ޖެހުނީ ކީއްވެކަން އޮޅުންފިލުވައިދީފައި ކަމަށެވެ. އެއީ، މި ވަގުތު އަމިއްލަ ކަމެއްގައި ކޮންމެ ހެން ވެސް ބައިވެރިވާން ޖެހޭ ހާލަތެއް އޮތުމުން ކަމަށް ވިރާތު، އިންޑިއާގެ ކްރިކެޓް ބޯޑަށް ފޮނުވި ލިޔުމުގައިވެ އެވެ.
އިންޑިއާ އަށް 113 ޓެސްޓް މެޗު ކުޅެދީފައިވާ ވިރާތު އަކީ ޓެސްޓް މެޗުތަކުގައި އިންޑިއާ އަށް ހަތަރު ވަނަ އަށް އެންމެ ގިނަ އިން ލަނޑު ހަދައިދިން ކުޅުންތެރިޔާ އެވެ. އެ ގޮތުން، ވިރާތު ވަނީ ޓެސްޓް މެޗުތަކުގައި އިންޑިއާ އަށް 8848 ލަނޑު ހަދައިފަ އެވެ.
މި މެޗުގެ ކުރިން، އިންޑިއާ އިން މިދިޔަ ދެ އަހަރު ކުޅުނު ޓެސްޓް މެޗެއް ވިރާތަށް ގެއްލިފައިނުވެ އެވެ. އެންމެ ފަހުން އޭނާ އަށް ޓެސްޓް މެޗެއް ގެއްލުނީ ބުރަކަށްޓަށް ލިބުނު އަނިޔާއަކާ ހެދި އެވެ. ވިރާތު، އިންޑިއާގެ ޓެސްޓް ޓީމުގެ ކެޕްޓަނަކަށް ހުރިއިރު، 2014 އިން 2022 އާ ދެމެދު ވަނީ 68 މެޗު ކުޅެފަ އެވެ.
