ރަށު ކައުންސިލްތަކަށް ރަށްތަކާއި ފަޅުތައް ހިމެނޭހެން ކައުންސިލުތަކަށް ރަށްތައް ދޫކުރާ ގަވާއިދުގެ ދަށުން ފަޅުރަށްތައް ދޫކުރެވޭ ބޭނުންތައް ސަރުކާރުން ގެޒެޓުކޮށްފި އެވެ.
އާ ގަވާއިދުގެ ދަށުން އެ ރަށެއްގެ އިހުތިސާސްގައި ނުހިމެނޭ ރަށެއް ނުވަތަ ފަޅެއްވެސް ރަށު ކައުންސިލަށް ދޫކުރެވޭނެ އެވެ. އެ ރަށްތައް ދޫކުރުން މަތިކޮށްފައި ވަނީ މި ސަރުކާރުން އުފެއްދި ލޯކަލް ގަވަމަންޓު މިނިސްޓްރީއަށެވެ.
މިދިޔަ ސަރުކާރުން އެކުލަވާލި "މަސްވެރިކަމާއި ދަނޑުވެރިކަމާއި އިގުތިސޯދީ ބޭނުންތައް ފިޔަވައި އެ ނޫން ބޭނުންތަކަށް ފަޅު ރަށްރަށް ދޫކުރުމާ ބެހޭ ގަވާއިދު" އުވާލާ އެ ގަވާއިދަށް ގެނައި އިސްލާހުތަކާއެކު އިއްޔެ ގެޒެޓުކޮށްފައިވާ އާ ގަވާއިދުގައި ބުނެފައިވާ ގޮތުން ކައުންސިލްތަކުގެ އިހުތިސާސްގައި ނުހިމެނޭ ރަށެއް ނުވަތަ ފަޅެއް ދޫކުރާނީ ލޯކަލް ގަވަމަންޓު މިނިސްޓްރީންނެވެ.
ދަތުރުދިޔުމާއި މޫދުކުޅިވަރުގެ ހިދުމަތްތައް ހިމެނޭހެން މި ރަށްތައް ދޫކުރެވޭނެ ޖުމްލަ 17 ބޭނުމެއް ސަރުކާރުން ވަނީ މިއަދު އާއްމުކޮށްފަ އެވެ. އެގޮތުން ސަރުކާރުން ބުނެފައިވަނީ އާ ގަވާއިދުގެ ދަށުން ކައުންސިލްތަކަށް ރަށްތައް ދޫކުރެވޭނީ ރައްޔިތުންގެ މަންފާއަށް ބޭނުންކުރެވޭ ގޮތަށް އެ ބޭނުންތަކަށް ކަމަށެވެ.
އޭގެ ތެރޭގައި ހިމެނެނީ:
- ގަސް ހެއްދުން ނުވަތަ ކާބޯތަކެތި ހެއްދުން
- ތަކެތި ގުދަންކުރުން
- ކުކުޅާއި ގެރިބަކަރި ފަދަ ތަކެތި ގެންގުޅުން
- ދޫނި ގެންގުޅުން
- މަސްކައްކައި ހިއްކުން
- ލޮނުމަހުގެ މަސައްކަތް ކުރުން
- ފަރުދީ ފެންވަރުގައި ހުއިފިލަނޑާ ކައްކައި ހިއްކުން
- އެކުއަކަލްޗަރގެ މަސައްކަތް ކުރުން
- ފާނަކޮށިއެޅުމާއި ފާނައިގެ މަސްވެރިކަން ކުރުން
- ދިރޭމަސް ގެންގުޅުން
- އޮޑިދޯނިފަހަރު ބަނުމުގެ މަސައްކަތް ކުރުން
- ފައިބަރުގެ މަސައްކަތް ކުރުން
- ވަޑާމުގެ މަސައްކަތް ކުރުން
- ވޯކްޝޮޕް ހެދުން
- އެޅިގަލުގެ މަސައްކަތް ކުރުން
- ދަތުރުދިޔުމާއި މޫދުކުޅިވަރުގެ ހިދުމަތް ދިނުން
- ލުއި ބުއިން ނުވަތަ ލުއި ކެއުން ތައްޔާރުކޮށް ވިއްކުން
އާ ގަވާއިދުގައި ބުނެފައިވާ ގޮތުން، ސަރުކާރުން އިއުލާނުކުރާ ރަށެއް ބޭނުންވާ ނަމަ ރަށު ކައުންސިލުން ޖެހޭނީ ބޭނުންވާ ރަށެއްގައި ކުރަން ބޭނުންވާ ތަފުސީލު ރިޕޯޓެއް ހުށަހަޅާށެވެ. ރިޕޯޓާއެކު ފަޅުރަށް ހިމެނޭ އިދާރީ ދާއިރާ ނިސްބަތްވާ އަތޮޅު ކައުންސިލްގެ ހުއްދައިގެ ލިޔުމެއްވެސް ހުށަހަޅަންޖެހެ އެވެ.
މީގެ އިތުރުން، އެއް ފަޅު ރަށެއް ހޯދުމަށް އެކަކަށްވުރެ ގިނަ ރަށެއްގެ ކައުންސިލުން ގުޅިގެން ވެސް މިނިސްޓްރީއަށް ރިޕޯޓު ހުށަހެޅުމުގެ ފުރުސަތު އާ ގަވާއިދުން ލިބިދެ އެވެ.
މިގޮތަށް ދޫކުރެވޭ ރަށްތަކުގައި ކުރެވޭ މަސައްކަތަކުގެ ތަފުސީލާއި އާމްދަނީއާއި ހަރަދުތައް ހިމެނޭ އަހަރީ ރިޕޯޓެއް ހުށަހެޅުމަށް ވެސް އާ ގަވާއިދުން ވަނީ ލާޒިމްކޮށްފަ އެވެ. ކައުންސިލްތަކަށް ދޫކުރާ ރަށެއް ނަމަ އެ ރިޕޯޓު ހުށަހަޅަންވާނީ ރައްޔިތުންގެ ބައްދަލުވުމަކުން ފާސްކޮށްފަ އެވެ.
