މާލެ ސަރަހައްދުގެ ވަށާޖެހޭ، ދެމެހެއްޓެނިވި، ތިމާވެއްޓާ ރައްޓެހި ދަތުރުފަތުރުގެ ނިޒާމެއް ގާއިމުކުރުމަށް ޓްރާންސްޕޯޓު މިނިސްޓްރީން އެކުލަވާލާ އާބަން ޓްރާންސްޕޯޓު މާސްޓާ ޕްލޭން އިފްތިތާހްކޮށްފި އެވެ.
ޓްރާންސްޕޯޓް މާސްޓާޕްލޭން އެކުލަވާލުމުގެ މަސައްކަތަކީ ގްލޯބަލް އެންވަޔަރަމަންޓް ފެސިލިޓީ (ޖީއީއެފް)ގެ ހިލޭ އެހީގެ ދަށުން އެންވަޔަރަމަންޓް މިނިސްޓްރީން ހިންގަމުން އަންނަ "އިންޓެގްރޭޓަޑް ސަސްޓެއިނަބަލް އެންޑް ލޯ އެމިޝަން ޓްރާންސްޕޯޓް އިން ދަ މޯލްޑިވްސް" ޕްރޮޖެކްޓުގެ ބައެކެވެ.
މި މަސައްކަތް އިފްތިތާހުކުރުމަށް މިއަދު ބޭއްވި ރަސްމިއްޔާތެއްގައި ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ، މާލެ ސަރަައްދުގެ ޓްރެފިކުގެ މައްސަލައަށް ހައްލެއް ހޯދުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެންމެ ބޮޑު އެއް އަމާޒު ކަމަށެވެ.
"މި މައްސަލަތަކަށް ހައްލު ހޯދުމުގެ މަސައްކަތް އަޅުގަނޑުމެން މިނިސްޓްރީ މެދުވެރިކޮށް ކޮށް އެކަށޭނެ ހައްލެއް ހޯދުނީ," މިނިސްޓަރު އަމީން ވިދާޅުވި އެވެ.
ދިހަ އަހަރަށް އެކުލަވާލާ މި ޕްލޭނުގެ ތެރެއިން ކުރު ރާސްތާގައި އެޅެން ހުރި ފިޔަވަޅުތަކަކީ ކޮބައިތޯ ބަލައި ޓްރެފިކް މައްސަލައަށް އަވަސް ހައްލުތައް ގެނައުމަށް މަސައްކަތް ކުރައްވާނެ ކަމަށް މިނިސްޓަރު ވިދާޅުވި އެވެ.
"އެގޮތުން އަޅުގަނޑުމެން މިހާރު މާލޭގަ ވެހިކަލްތައް އިތުރުވަމުންދާ ދިއުން ރެގިއުލޭޓުކުރުމަށް ކަމާ ގުޅޭ ހުރިހާ ފަރާތްތަކާ އަދި ގަވައިދާ ހިލާފަށް މި ހިނގާ ކަންތައްތައް ބެލެހެއްޓުމަށް މިހިނގާ ކަންތައްތަކާ ވެސް ގުޅިގެން އަޅުގަނޑުމެން އަވަހަށް އެޅޭނެ ފިޔަވަޅުތައް ބެލުމަށްޓަކާ އެ މަސައްކަތްތައް ކުރަމުން އެބަ ގެންދަން," މިނިސްޓަރު އަމީން ވިދާޅުވި އެވެ.
މިނިސްޓަރު ވިދާޅުވީ ކުރިއަށް އޮތް ދެ ހަފްތާއެއްގެ ތެރޭގައި ބަދަލުތައް ދެނެގަނެވި މަސައްކަތް ފެށޭނެ ކަމަށެވެ.
މި މާސްޓާ ޕްލޭނުން ސަރުކާރާއި ކަމާގުޅޭ އެހެން ފަރާތްތަކުގެ މެދުގައި މުއާމަލާތްކުރުން ހަރުދަނާކޮށް، ތިމާވެއްޓާ ރައްޓެހި ދަތުރުފަތުރުގެ ނިޒާމަކަށް ފަހިކޮށްދޭނެ އެވެ. އަދި މިހާރު ހުރި ސިޔާސަތުތަކާއި ޕްރޮގްރާމުތަކާ ގުޅިގެން ގާނޫނީ ގޮތުން ހުރި ހުރަސްތައް ދެނެގަތުމާ އެކު އެކަންކަން ތަންފީޒުކުރަން އިދާރާތަކަށް ދިމާވާ ގޮންޖެހުންތައް ދެނެގަނެ، އެކަންކަން ހައްލުކުރަން ފަހިކޮށްދޭނެ އެވެ.
އޭގެ އިތުރުން ދަތުރުފަތުރު ނިޒާމު ތަރައްގީކުރަން ހިންގާ ޕްރޮޖެކްޓުތަކުގައި މާލެ ސަރަހައްދުގައި ތޮއްޖެހުން ކުޑަކުރެވޭނެ ގޮތަކަށް ޕަބްލިކް ޓްރާންސްޕޯޓް ނިޒާމުގެ ރޯޑްމެޕް އެކުލަވާލުމާއި މަގުތައް ފަރުމާކުރާއިރު ތޮއްޖެހުން ކުޑަކުރަން ކުރެވިދާނެ ކަންކަން ދެނެގަނެވޭނެ އެވެ.
