ސަރުކާރުގެ އެންމެ ބޮޑު ބޯހިޔާވަހި ކަމުގެ ޕްރޮޖެކްޓް، ފުށިދިއްގަރުފަޅުގައި އަސާސީ ހިދުމަތްތައް ގާއިމުކޮށް ކުރިއަށް އޮތް 30 އަހަރު ދުވަހުގެ ތެރޭގައި ވެސް އެ ފަޅު ތަރައްގީ ނުކުރެވޭނެ ކަމަށް މާލޭގެ މޭޔަރު ކަމަށް ވާދަކުރައްވާ އާދަމް އާޒިމް ވިދާޅުވެއްޖެ އެވެ.
އެމްޑީޕީ ސަރުކާރުގައި ގިނަ ޕްރޮޖެކްޓްތަކެއް ހިންގި، އެމްޓީސީސީގެ މެނޭޖިން ޑިރެކްޓަރުކަން ކުރެއްވި އާދަމް އާޒިމް އެކްސް ސްޕޭސްގައި ވާހަކަ ދައްކަވަމުން ރޭ ވިދާޅުވީ މާލޭގެ ރައްޔިތުންގެ ބޯހިޔާވަހިކަން ހައްލުކުރެވޭނެ ބިން މާލެ އާއި ހުޅުމާލެ އާއި ގުޅިފަޅާއި އުތުރު ތިލަފަޅާއި ގިރާވަރު ފަޅުން ލިބޭއިރު، ފުށިދިއްގަރުފަޅު ހިއްކުމަކީ ވަރަށް ބޮޑު އިސްރާފެއް ކަމަށެވެ.
"އަޅުގަނޑު ގަބޫލެއް ނުކުރަން ފުށިއްގަރުފަޅަށް ދޯންޏަކަށް އަރުވައިގެން މާލޭގެ ރައްޔިތުން ދާންޖެހޭނެ ކަމަކަށެއް، އަޅުގަނޑު ގަބޫލުކުރަނީ ބްރިޖަކުން ގުޅިފައިވާ އަވަށްތަކަކަށޭ މާލޭގެ ރައްޔިތުން ދާންޖެހޭނީ، މާލޭގެ ރައްޔިތުންނަށް އެކަށީގެންވާ ވަރަށް ގޯތިގެދޮރު ދެވޭނެ ބިން މާލެ ކައިރީ އެބަހުރި،" އާޒިމް ވިދާޅުވި އެވެ. "އެތަނެއް ޑިވެލޮޕެއް ނުކުރެވޭނެ ކުރިއަށްއޮތް 30 އަހަރުވާއިރު ވެސް، ފެނާއި ކަރަންޓާއި ސްކޫލާއި މިސްކިތާއި ހޮސްޕިޓަލާއި، މިތަންތަން އަޅާ އެކަން ނުކުރެވޭނެ."
މާލެ އަތޮޅު ގުޅިއާ ޖެހިގެން އޮންނަ ފުށިދިއްގަރުފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެފަޅުން 1153 ހެކްޓަރު ހިއްކާ "ރަސްމާލެ" ގެ ނަމުގައި ޒީރޯ ކާބަން ސިޓީ އެއް ތަރައްގީ ކުރުމުގެ މަސައްކަތް ސަރުކާރުން ވަނީ ޑިސެމްބަރު 18، 2023 ގައި ވަނީ ފަށައިފަ އެވެ.
އާޒިމް ވިދާޅުވީ ފުށިދިއްގަރުފަޅު ހިއްކުމަށްވުރެ މާލޭގެ ބޯހިޔާވަހިކަމާއި ޓްރެފިކް މައްސަލަތައް ހައްލުކުރަން، މާލެ ސަހަރައްދުގައި މިހާރު ހިއްކަން ފަށާފައިވާ ތަންތަން ތަރައްގީ ކުރުން މިވަގުތައް މާ ބޮޑަށް މުހިންމު ކަމަށެވެ. ފުށިދިއްގަރުފަޅަކީ، މިވަގުތަށް ބޭނުންވާ ތަނެއް ނޫން ކަމަށް އާޒިމް ގެންދަވަނީ ތަކުރާރުކޮށް ވިދާޅުވަމުންނެވެ.
އާޒިމް ވިދާޅުވީ މާލޭގެ ބިމުގެ މައްޗެކޭ އެއްގޮތަށް ބިމުގެ އަޑިވެސް އޮތީ ތޮއްޖެހިފައި ކަމަށެވެ. ފެނާއި ކަރަންޓާއި ނަރުދަމާ އަށް ބާލާއިރު ވެސް، މާލޭގައި ހައްލުކުރަން ޖެހޭ ކަންކަން އެބަހުރި ކަމަށާއި އެ ހުރިހާ މައްސަލަތަކެއް ހައްލުވާނީ ހުޅުމާލެ، ގުޅިފަޅު، އުތުރު ތިލަފަޅު އަދި ގިރާވަރުފަޅު ތަރައްގީ ކުރެވިގެން ކަމަށް އާޒިމް ވިދާޅުވި އެވެ.
