މިދިޔަ ހަފުތާގެ އެންމެ ބޮޑު ހަބަރަކަށްވީ ރައްޔިތުންގެ މަޖިލީހުގެ 13 މެމްބަރަކު ވެރިކަން ހިންގާ ޕީޕަލްސް ނެޝަނަލް ކޮންގްރެސްއާ ގުޅުނު ހަބަރެވެ.
ވެރިކަން ހިންގާ ޕާޓީއާ މެމްބަރުންތަކެއް ގުޅޭނެ ކަމަށް އަޑުގަދަވެފައި އޮއްވާ އެންމެ ފަހުން އެކަން ރަސްމީވީ، ބުރާސްފަތި ދުވަހުގެ ރޭ ދަރުބާރުގޭގައި ބޭއްވި ހާއްސަ ހަފުލާއެއްގައި މޯލްޑިވިއަން ޑިމޮކްރެޓިކް ޕާޓީގެ 12 މެމްބަރަކާއި ކުރިން އެ ޕާޓީން ކެނޑިގެން ހުރި މެމްބަރަކު ޕީއެންސީއަށް ސޮއިކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ފޯމު ހަވާލު ކުރެއްވުމުންނެވެ.
އެ ހަފުލާގައި ރައީސް މުއިއްޒު ވިދާޅުވީ މެމްބަރުންތައް ޕީއެންސީއަށް ބަދަލުވީ ގައުމުގެ ހައްގުގައި ކަމަށެވެ.
"އަޅުގަނޑުމެން އަބަދުވެސް ބުނަން ވާނީ ގައުމަށްޓަކައި ތިމަންނާއަށް ކޮށްދެވޭނީ ކޮން ކަމެއްތޯ. ތިބޭފުޅުން ތި ހިޔާރު ކުރެއްވީ އެ މަގު. ފަށްފަށުން ޝުކުރު ދަންނަވަން, ޝުކުރިއްޔާ،" އެމަނިކުފާނު ވިދާޅުވި އެވެ.
ނަމަވެސް، އިދިކޮޅު މެމްބަރުންނަށް ރިޝްވަތު ހުށަހަޅަމުންދާ ވާހަކަތަކުގެ އަޑު ގަދަވެފައި އޮއްވާ، ހައިރާންވާހާ ގިނަ އަދަދެއްގެ މެމްބަރުން ބަދަލުވި ސަބަބު ރައްޔިތުންނަށް އޮޅިފައެއް ނެތެވެ. އެ ބަދަލުގެ ފަހަތުގައި އޮތް ހަގީގީ ސަބަބު އެންމެނަށް ވެސް އެނގެ އެވެ.
ޝޯޝަލް މީޑިއާގެ ޕްލެޓްފޯމުތަކަށް ބަލައިލި ނަމަވެސް "ގައުމަށްޓަކައި" ޕާޓީ ބަދަލުކުރި މެމްބަރުންނާމެދު ރައްޔިތުންގެ ހިޔާލު ހުރި ގޮތް ފެނެ އެވެ. ވެރިކަން ހިންގާ ޕާޓީއަށް ނިސްބަތްނުވާ، އެ ހަބަރު އަޑުއިވުނު ކޮންމެ މީހަކު ވެސް ބުނަމުންދަނީ އެއް ވާހަކައެކެވެ. އެންމެންގެ ތުހުމަތަކީ ވެސް އެ ބަދަލުގެ ފަހަތުގައި ވަނީ ލައްކަ ގިނަ ފައިސާ ކަމަށެވެ. އެންމެން ވެސް ބުނަނީ "މެމްބަރުންތައް ވިކުނީ" ކަމަށެވެ.
"އެމްޑީޕީން، 13 މެމްބަރުން ނަގުދު ފައިސާއަށް ވިކިގެން ދާއިރު އެމްޑީޕީއަށް ކުރެވޭނެ ކަމެއް ނެތިފައި ބަލަން ތިބުމަކީ ވަރަށް ފިނޑިއަމަލެކެވެ. އަވަހަށް، ވީހާ އަވަސްކޮށް އެޅެން ހުރި ހުރިހާ ފިޔަވަޅު ތަކެއް އަޅާށެވެ! މިއީ ރާއްޖޭގައި ތަކުރާރުވަމުންދާ އެންމެ ބޮޑުފަސާދަ އެވެ. ހަރާބު. ސީދާ ކަނޑައެޅިގެން އެންމެންނަށް އެނގޭ ކޮރަޕްޝަން. ހިންގާން ތިބެނީ ގައުމުގެ އެންމެ މަތިފަޑީގައި ތިބި ވެރީންނެވެ! ދެން، ފަހެ، ގައުމު ކޮބައިތޯ އެވެ،" ސިޔާސީ ދާއިރާގައި ގިނަ ދުވަހު މަސައްކަތް ކުރެއްވި އިލްޔާސް ހުސެއިން އިބްރާހިމް ވިދާޅުވި އެވެ.
މެމްބަރުންގެ ބަދަލުވުން އެހެން މީހަކު ސިފަ ކުރީ ސްޓޮކް އެކްސްޗޭންޖުގައި ހިނގާ ވިޔަފާރީގެ މުއާމަލާތެއްގެ ގޮތުގަ އެވެ.
"ސްޓޮކް އެކްސްޗޭންޖް އޮފް މޯލްޑިވްސް ޕާލަމެންޓް،" އޭނާ ބުނެފައިވެ އެވެ.
ބަދަލުވި މެމްބަރުންގެ ފޮޓޯއަކާއެކު އެހެން މީހަކު ސޯޝަލް މީޑިއާގައި މެމްބަރުން ސިފަ ކުރީ "ފައިސާގެ އަޅުން" ގެ ގޮތުގަ އެވެ.
"ފައިސާގެ އަޅުން އެއް ފޮޓޯގަނޑަކުން،" އެހެން މީހަކު ބުނެފައިވެ އެވެ.
ބައެއް މީހުން ބުނެފައި ވަނީ، މެމްބަރުން ޕާޓީ ބަދަލު ކުރުން ހުއްޓުވޭނީ ރައްޔިތުންގެ ވިސްނުމަށް އަންނަ ބަދަލަކުން ކަމަށެވެ.
"ލާރިކޮޅެއްގެ އަވައިގަ ރައްޔިތުން ޖައްސައިގެން ލީޑަރުން ގައުމު ލޫޓުވުމުގެ ސަގާފަތް މިދަނީ ހައްދުފަހަނައަޅާ. ދެން ގައުމު ސަލާމަތް ކުރަން އަންނަން ހުންނާނީ ފަހެ ކާކު؟ މި މުޑުދާރު ހާލަތު ބަދަލުވާނީ ރައްޔިތުންގެ ވިސްނުމަށް އަންނަ އިންގިލާބީ ބަދަލަކުން. ނުވަތަ ﷲ ގެ ކޯފާއަކުން،"
މެމްބަރުން ޕާޓީ ބަދަލު ނުކުރޭވެނެ ގޮތް ހެދުމަށް ވެސް ވަރަށް ގިނަ ބަޔަކު ގޮވާލި އެވެ.
"ލައްކަ ދުވަސްވެއްޖެ ރައްޔިތުންގެ މަޖްލިސް ގެ މެމްބަރުން އެބޭފުޅުންނަށް ވޯޓު ދެއްވައި އަދި ރައްޔިތުންގެ މަޖިލީހަށް އިންތިހާބު ކޮށްދެއްވާ ރައިއްޔަތުންގެ މަތިން ހަނދުމަފުޅުނެތި، އަމިއްލަ ލާބަ އާއި މަންފާ ހާސިލު ކުރެއްވުމަށް މަގުކޮށްޓަވާތާ! އެކަމަކެ ދެނެއް ނޫން. ފުދިއްޖެ. މަޖިލިސް އަށް އިންތިހާބުވާ ހައިސިއްޔަތު ބަދަލު ކުރުމާ ދެކޮޅު! އިސްލާހުކުރޭ!،" އެހެން މީހަކު ބުންޏެވެ.
އެންޓި-ޑިފެކްޝަނުގެ ގާނޫނެއް މުހިންމުކަން ފާހަގަކޮށް އެހެން މީހަކު ބުނީ މެމްބަރުން ހިންގާ "ރިޝްވަތުގެ އަމަލު" ހުއްޓުވޭނީ ގާނޫނުތައް އިސްލާހުކޮށްގެން ކަމަށެވެ.
"ރައްޔިތުން އިންތިހާބުކުރި ޕާޓީ ނޫން އެހެން ޕާޓީއަކަށް މެންބަރުން ދައުރު ނުނިމެނީސް ބަދަލުވާނަމަ، މެންބަރުންގެ ގޮނޑި ގެއްލޭނެ ގަވާއިދެއް ގާނޫނުގައި ބަޔާންވެފަ އޮތުން މުހިންމު. މަޖިލިސް މެންބަރުން ހިންގާ ރިޝްވަތުގެ އަމަލު ހުއްޓުވުން މުހިންމު،" އޭނާ ބުނެފައި އޮތެވެ.
އެހެން މީހަކު ބުނީ އެންޓި-ޑިފެކްޝަނުގެ ބައެއް އިތުރު ކުރަންވީ ސީދާ ގާނޫނު އަސާސީއަށް ކަމަށެވެ.
"ކުރަންވީ ކަމަކީ މެންބަރުން ޕާޓީ ބަދަލުކުރުމުން ގޮނޑި ގެއްލުން އިޔާދަކުރަންވީ. މި ފަހަރު އިސްލާހު ގާނޫނު އަސާސީ އަށް ގެންނަންވީ. އޭރުން އެކަން ބަދަލުކުރަން ފަސޭހައެއް ނުވާނެ،" އޭނާ ބުންޏެވެ.
ޕާޓީ ބަދަލު ކުރި މެމްބަރުން:
- މަރަދޫ ދާއިރާގެ އިބްރާހިމް ޝަރީފް
- ފޭދޫ ދާއިރާގެ މެމްބަރު މުހައްމަދު ނިހާދު
- މައްޗަންގޮޅި އުތުރު ދާއިރާގެ އަހުމަދު ހައިތަމް (ކުރިން އެމްޑީޕީން ވަކިވެފަ)
- އިސްދޫ ދާއިރާގެ އަލީ ހަމީދު
- ކަނޑިތީމު ދާއިރާގެ އަބްދުﷲ ޝަހީމް އަބްދުލްހަކީމް
- ކުރެންދޫ ދާއިރާގެ ޢަބްދުލްޣަނީ އަބްދުލްހަކީމް
- މަތިވެރި ދާއިރާގެ ހަސަން ޒަރީރު
- މުލަކު ދާއިރާގެ އިބްރާހިމް ނަސީރު
- ނިލަންދޫ ދާއިރާގެ އަބްދުލްމުހްސިން ހަމީދު
- މާފަންނު ދެކުނު ދާއިރާގެ އާދަމް އަލީ
- ކޮމަންޑޫ ދާއިރާގެ މުހައްމަދު ރާޝިދު (ރާޑޯ)
- ތޮއްޑޫ ދާއިރާގެ ހަސަން ޝިޔާން (ގިޓާ)
- ގުރައިދޫ ދާއިރާގެ އިބްރާހިމް ޝާޒު
މެމްބަރުން ޕާޓީ ބަދަލުވި ގޮތް އިލެކްޝަންސް ކޮމިޝަނުން ތަހުގީގު ކުރުމަށް ވެސް ބައެއް މީހުން ގޮވާލާފައި ހުއްޓެވެ.
"މަޖިލިސް މެންބަރުން ރިޝްވަތު ނެގުމާ އަދި ސަރުކާރުން ރިޝްވަތު ދީފައިވޭތޯ ބެލުމަކީ އިލެކްޝަން ކޮމިޝަނުން ކުރަން ޖެހޭ ކަމެއް. އަދި ރިޝްވަތުގެ ހަޑި މުޑުދާރު އަމަލު ހިންގި ދެ ފަރާތައް ފިޔަވަޅު އަޅަން ޖެހޭ،" އޭނާ ބުންޏެވެ.
މެމްބަރުންގެ ޕާޓީ ބަދަލު ކުރުމުން ރައްޔިތުންގެ މަޖިލީހުގެ ބައެއް މެމްބަރުން ވެސް އެކަމަށް ފާޑު ވިދާޅުވި އެވެ.
"ރިޝްވަތު ހިފާ މީހާ އެކަންޏެއް ނޫން. ރިޝްވަތު ދޭ މީހާވެސް އެހާ ނުބައި،" އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވި އެވެ.
ޕާޓީ ބަދަލުކުރުން އެހެން މެމްބަރަކު ސިފަ ކުރެއްވީ "މުޑުދާރު" އަދި "ނާތަހުޒީބީ" އަމަލެއްގެ ގޮތުގަ އެވެ.
"ތިޔައީ ހަޑި މުޑުދާރު ނާތަހުޒީބު ފެށުމެއް. ރައްޔިތުންނަށް ތިޔަ ބުނެދެވެނީ، ތިޔަ ހިތްވަރު ދެވެނީ ތިޔަޒާތުގެ ނާތަހުޒީބީ ކަންކަންކޮށްލުމަކީ އެންމެ ރަނގަޅު ކަމެއް ކަމަަށް،" މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެފައިވެ އެވެ.
އެހެން މެމްބަރަކު ވިދާޅުވީ، ޕާޓީ ދޫކޮށް އެހެން ޕާޓީއަކަށް ބަދަލުވާ ނަމަ ރީތި ގޮތަކީ މަޖިލީހުން އިސްތިއުފާ ދެއްވުން ކަމަށެވެ.
"އަޅުގަނޑު ވޯޓްލާ ދާއިރާގެ މެންބަރަށް ވޯޓު ދިނީ އާދަމް އަލީ ވެގެންނެއްނޫން، އެމްޑީޕީ ޓިކެޓްގަ ވާދަކުރި ކެނޑިޑޭޓްވެގެން. ޕާޓީ ބަދަލް ކުރުމާ އެކު އަޅުގަނޑުގެ ވޯޓް މިހާރު ހައްގެއް ނުވާނެ. ޕާޓީން ވަކިވާންވާނި ގޮނޑި ދޫކޮއްލާފަ. ރީތި ގޮތަކީ މަޖްލިސް ގޮނޑިން އިސްތިއުފާ ދިނުން،" ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެފައިވެ އެވެ.
މީގެ ކުރިން ވެސް މެމްބަރުން ޕާޓީ ބަދަލުކޮށްފައި ވެ އެވެ. ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް އިދިކޮޅު މެމްބަރުންތަކެއް ވެރިކަން ކުރާ ޕާޓީއާ ގުޅުނެވެ. އޭގެ ފަހުން ވެސް އެފަދަ ކިތަންމެ "ޓްރާންސްފަރ" އެއް ހިނގާފައި އެބަ ހުއްޓެވެ. އެއިން ކޮންމެ ފަހަރަކު ވެސް، ބަދަލުގެ ހަގީގީ ސަބަބު ރައްޔިތުންނަކަށް ވަންހަނާ ވެފައެއް ނޯވެ އެވެ. އެންމެނަށް ވެސް ހަގީގަތް އެނގެ އެވެ.
