ދިރާގުން އެ ކުންފުނީގެ 2024 ވަނަ އަހަރުގެ ކަލަންޑަރު "އިންޓު ދަ ފިއުޗާ" ލޯންޗުކޮށްފި އެވެ.
ރޭ އޮތް ހާއްސަ ހަފްލާއެއްގައި ދިރާގުގެ އައު އަހަރުގެ ކަލަންޑަރު އިފްތިތާހު ކޮށްދެއްވީ އެޑިއުކޭޝަން މިނިސްޓަރު، ޑރ. އިސްމާއީލް ޝަފީއު އެވެ.
ދިރާގުގެ ހިދުމަތަށް 35 ވަނަ އަހަރު ފާހަގަކުރަމުންދާއިރު، އަލަށް ލޯންޗުކުރި 2024 ވަނަ އަހަރުގެ ކަލަންޑަރުން ދައްކުވައިދެނީ ތުއްތު ކުއްޖެއްގެ ލޮލުން މިހާރަށްވުރެ ކުރިއަރާފައިވާ "ޑިޖިޓަލް ރާއްޖެ" އެއްގެ ތަސައްވަރެވެ.
އެގޮތުން, ކުރިއަރަމުންދާ ޓެކްނޮލޮޖީގެ ސަބަބުން މުސްތަގުބަލުގައި އާންމު ދިރިއުޅުން ލުއިފަސޭހަވެ، އިތުރަށް މުއްސަނދިވެފައިވާ ގޮތް ކަލަންޑަރުގެ ގަނޑުތަކުން ދައްކުވައިދެ އެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ، ދިރާގަކީ ރާއްޖެ ޓެކްނޮލޮޖީގެ ގޮތުން ކުރިއަރުވާ، ގައުމުގެ ޑިޖިޓަލް ދަތުރުގެ މޭސްތިރިއެއް ކަމަށެވެ. އަދި ދިރާގަކީ ކުޑަކުދިންނާއި ޒުވާނުން ބާރުވެރިކޮށް، އެ ދާއިރާއަށް ނެރުމަށް އިސް ސަފުގައި ހަރަކާތްތެރިވާ ކުންފުންޏެއް ކަމަށް ވެސް ވިދާޅުވި އެވެ.
ދިރާގުގެ ޗީފް ކޮމާޝަލް އޮފިސާ އަލީ ރިޔާޒް ވަނީ، އެ ކުންފުނީގެ އައު ކަލަންޑަރުގައި ދައްކުވައިދޭ "ޑިޖިޓަލް ރާއްޖެ"އެއްގެ ތަސައްވަރަކީ ދިރާގުން ވެސް އެކަމަށް މަސައްކަތް ކުރާ ކަމެއް ކަން ފާހަގަކުރައްވާފަ އެވެ.
އެގޮތުން, ދިވެހި ރައްޔިތުންގެ ދިރިއުޅުން މިހާރަށްވުރެ ފަސޭހަކުރުމަށް އެކުންފުނިން ކުރަމުންދާ މަސައްކަތްތަކުގެ މައްޗަށް އަލިއަޅުއްވާލައްވައި، އަލީ ވިދާޅުވީ، އައު ކަލަންޑަރުގެ ސަބަބުން ކުރިއަށްވުރެ ފާގަތި މުސްތަގުބަލެއް ބިނާކުރުމަށް މިއަދުގެ ޒުވާން ޖީލު "އިންސްޕަޔާ" ވެގެން ދާނެ ކަމަށް ވެސް އުއްމީދު ކުރައްވާ ކަމަށެވެ.
މި ކަލަންޑަރުގައި ކޮންމެ މަހެއްގެ ވެސް ކުރެހުމާއި ގުޅުވާލާފައިވާ 12 ސްނެޕްޗެޓް ގޭމް ހިމަނާފައިވެ އެވެ. ކަލަންޑަރުގައި ވާ ސްނެޕްކޯޑް ސްކޭންކޮށްލައިގެން، ގޭމް ކުޅުމަށްފަހު އެ ފަރާތެއްގެ ސްކޯގެ ސްކްރީންޝޮޓެއް އިންސްޓަގްރާމް، ފޭސްބުކް ނުވަތަ ޓްވިޓަރގައި "DhiraaguCalendarGames#" މި ހޭޝްޓެގާއެކު ޕޯސްޓުކޮށްގެން ހާއްސަ ގުރުވަތެއްގައި ބައިވެރިވެވޭނެ އެވެ.
ކަސްޓަމަރުން ޕޯސްޓްކުރާ ސްކްރީންޝޮޓްތަކުން ކޮންމެ ތިން މަހަކު ދިރާގުން ހާއްސަ ގުރުވަތެއް ބާއްވާ، ނަސީބުވެރި ފަރާތަކަށް ހަދިޔާއެއްގެ ގޮތުގައި ޓެކް ބަންޑްލްއެއް ދިނުމަށް ވަނީ ހަމަޖެހިފަ އެވެ.
